Avāna Atungshongwui Awungabingli Maishi Ngasaka
Rāmthi wungamayar sakor kala rathleng haida, ngāphonwui leisāba kaji rālmi chumkhai, kala ithumwui Avāna Merom tuili athumli kachāthai; sakormayarwui khong kaphāthai, rathlengmayar meiwāhai. Hazor tangkha meiwāhai. Ashida rāl kaji kachāthai, kala ramna ngāsāmhai.
11 1Hazorwui awunga Jabinna chi kashā eina, Madonwui awunga Jobabli, Shimronwui awungali, Achshaphwui awungali, 2kaphungramli, Chinnerothwui azingshong khalei Arabahli, angakoramli, kala zingtunshong khalei Dorwui kaphungbingli khalei atungshongwui awungabingli, 3zingsho eina zingtunshong khalei Canaannaobingli, kaphungramli khalei Amornaobing, Hitnaobing, Periznaobing, kala Jebusnaobingli, kala Mizpah ngaleili Harmon azingli khalei Hivnaobingli pao chihovai. 4Athumna shamadrupheiwui situi ngayāda khamashā athumwui raimibing saikora, kala hāngkhavai maleila kachungkha sigui eina siguigari zangda zatphoka. 5Awungabing hi saikorana khokkha sāda, Israelli ngarar khavai Meromwui tara̱li katonga rairum vasai.
6Ithumwui Avāna Joshuali hānga, "Athumwui vang mangacheealu, kaja akhama hi atamna ina athum saikora chi Israelwui mangāli kathi thāda sangmira. Athumwui siguibingli hamsanglu kala athumwui siguigaribingli mei eina riktālu."
7Chieina Joshua eina awui raimi saikorana kashuirak eina Meromwui tara̱li athumli rai atanga, athumli ngarara, 8kala ithumwui Avāna athumli Israelwui pāngli sangmi, kala athumna Khareiya Sidon eina Misrephoth-maim vāshungda, kala zingshoshong Mizpeh tampākli vāshungda athumli yuida kharomkhuida, khipākha mataimana. 9Ithumwui Avāna ali kahānga tākam eina Joshuana athumwui siguibingli hamsangda, athumwui siguigaribingli mei eina riktāhaowa. 10Atam chitharan Joshuana latunghaida, Hazor khuihaowa, kala chiwui awungali raighai eina sāthathaowa; kaja khareli Hazorna hi wungram saikorawui khamunga sāsai. 11Chiwui alungli khalei mi kachiva̱ raighai eina sāthatserhaida, athum saikora peichaoda sākazammiserhaowa; manglā kazanga akhala mataimana, kala Joshuana Hazor chi mei eina riktāhaowa. 12Joshuana hi awungabingwui keinung saikora kala athumwui awungabing saikora khuihaida, ithumwui Avāwui rao Mosesna kakaso athishurda, athumli raighai eina peichaoda sākazammiserhaowa. 13Kha athumwui shungtittungli nganinga keinungbing chi Israelna akhala mariktāmana; Hazor chi Joshuana riktāhaowa. 14Israelna hi keinungbingwui ngapon otbing kala sha̱kei saikora athum khalattawui vang khuiya, kha mi kachiva̱ manglā kazanga akhala matairanglakha eina tangda raighai eina sāthatserhaowa. 15Ithumwui Avāna awui rao Mosesli kakaso athishurda, chithāda Mosesna Joshuali kasoi; kala Joshuana chi sāmi, ithumwui Avāna Mosesli kakaso saikorawui lungli khiotkha masālaga mahormana.
16Chithāda Joshuana hi ngalei katonga kaphungram, Negeb saikora, Goshenwui ngalei saikora, angakoram, Arabah, kala Israelwui kaphungram eina chiwui angakoramla khuihaowa. 17Seir vākhangasun Halak Kaphungwui eina thuida, Harmon Kaphungwui azingli khalei Lebanon Leiwukli Baal-gad vāshungda, ana athumwui awunga saikorali khuihaida, yuida sāthatserhaowa. 18Joshuana awungabing hi saikorali kasāngkha rai ngarara. 19Gibeonli khalei Hivnaobing maningla keinung akhala Israelli mashitkhui maleimana; Israelna athum saikorali rai eina khuiserhaowa. 20Khikhalajila ithumwui Avāna Israelli rai ngarar khavai athumwui wuklung marartit ngasakhaira; chithakha ithumwui Avāna Mosesli kaso kahai athishurda athumli lukhamashan masamphangla sākazamlaga sāshimitmiserhaora. 21Atam chitharan Joshuana vāda kaphungram, Hebron, Debir, Anab eina, kala Judahwui kaphungram saikora eina, kala Israelwui kaphungram saikora eina Anakimnaobing shaothatserhaowa; ana athum eina athumwui keinungbingla sākazammiserhaowa. 22Israelnaobingwui ngaleili Anakimnaobing akhala mataishokmana; Gaza, Gath, kala Ashdodli maningla kaikha shākkahaia. 23Chieina Joshuana, ithumwui Avāna Mosesli hāngkahai tākam eina, ngalei saikora khuihaowa, kala Israelli athumwui shang maron-maron athishurda shimlui sākhavai mihaowa. Chieina ngalei chi rai kasāwui eina khangasām samphanga.
