ኢያሱ 11

11 ¹የአሶር ንጉሥ ኢያቢስ ይህን በሰማ ጊዜ፣ ወደ ማዶን ንጉሥ ኢዮባብ፣ ወደ ሺምሮን ንጉሥና ወደ አክሳፍ ንጉሥ መልእክት ላከ፤ ²በሰሜንም ወዳሉት ነገሥታት — በተራራማው አገር፣ ከኪኔሮት በስተ ደቡብ ባለችው ዓረባ፣ በቈላውና በምዕራብ በኩል ባለው በዶር ኰረብታዎች ላይ ወዳሉት፤ ³ወደ ምሥራቅና ወደ ምዕራብ ወዳሉት ከነዓናውያን፣ ወደ አሞራውያን፣ ወደ ኬጢያውያን፣ ወደ ፌርዛውያንና በተራራማው አገር ወዳሉት ኢያቡሳውያን፣ በሚስጳ ምድር በኤርሞን ግርጌ ወዳሉት ኤዊያውያን መልእክት ላከ። ⁴እነርሱም እንደ ባሕር ዳር አሸዋ ብዙ የሆነውን ሰራዊታቸውን ሁሉ፣ እጅግ ብዙ ፈረሶችንና ሰረገሎችን ይዘው ዘመቱ። ⁵እነዚህ ነገሥታት ሁሉ ተባብረው እስራኤልን ለመውጋት በሜሮም ውሃ ዘንድ አብረው ሰፈሩ።

⁶አባታችንም ኢያሱን እንዲህ አለው፤ “አትፍራቸው፤ ነገ በዚህ ሰዓት ሁሉንም ተገድለው ለእስራኤል አሳልፌ እሰጣቸዋለሁና። የፈረሶቻቸውን ጅማት ቍረጥ፤ ሰረገሎቻቸውንም በእሳት አቃጥል።”

⁷ኢያሱና ሰራዊቱ ሁሉ በሜሮም ውሃ ዘንድ በድንገት ወደ እነርሱ መጥተው ወጓቸው፤ ⁸አባታችንም ለእስራኤል አሳልፎ ሰጣቸው፤ እስራኤልም መትተው እስከ ታላቂቱ ሲዶና፣ እስከ ሚስሬፎት ማይም፣ በምሥራቅም በኩል እስከ ሚስጳ ሸለቆ ድረስ አሳደዱአቸው፤ ከእነርሱም አንድም በሕይወት የተረፈ አላስቀሩም። ⁹ኢያሱም አባታችን እንዳዘዘው አደረገባቸው፤ የፈረሶቻቸውን ጅማት ቈረጠ፤ ሰረገሎቻቸውንም በእሳት አቃጠለ። ¹⁰በዚያም ጊዜ ኢያሱ ተመልሶ አሶርን ያዘ፤ ንጉሧንም በሰይፍ መታ፤ አሶር ቀድሞ የእነዚህ መንግሥታት ሁሉ ራስ ነበረችና። ¹¹በውስጧም የነበሩትን ሁሉ በሰይፍ መቱ፤ ፈጽመውም አጠፉአቸው፤ ሕያው የሆነ ምንም አልቀረም፤ ኢያሱም አሶርን ራሷን በእሳት አቃጠለ። ¹²ኢያሱም የእነዚህን ነገሥታት ከተሞች ሁሉና ነገሥታታቸውን ሁሉ ያዘ፤ የአባታችን አገልጋይ ሙሴ እንዳዘዘ በሰይፍ መትቶ ፈጽሞ አጠፋቸው። ¹³ነገር ግን እስራኤል በጕብታቸው ላይ ከተቀመጡት ከተሞች አንዲቱንም አላቃጠለም፤ ከአሶር ብቻ በቀር፤ ኢያሱም ያችን አቃጠለ። ¹⁴እስራኤልም የእነዚህን ከተሞች ምርኮ ሁሉና ከብቶቻቸውን ሁሉ ለራሳቸው ወሰዱ፤ ሰውን ሁሉ ግን ሕያው ሆኖ የተረፈ እስከሚጠፋ ድረስ በሰይፍ መቱ። ¹⁵አባታችን አገልጋዩን ሙሴን እንዳዘዘው፣ ሙሴም ኢያሱን እንዲሁ አዘዘው፤ ኢያሱም እንደዚሁ አደረገ፤ አባታችን ሙሴን ካዘዘው ሁሉ ሳያደርገው የቀረ ምንም ነገር አልነበረም።

¹⁶ኢያሱም ይህን ምድር ሁሉ ወሰደ፤ ተራራማውን አገር፣ የኔጌብን ሁሉ፣ የጌሤንን ምድር ሁሉ፣ ቈላውን፣ ዓረባውንና የእስራኤልን ተራራማ አገር ከቈላው ጋራ። ¹⁷ወደ ሤዒር ከሚወጣው ከኻላቅ ተራራ አንሥቶ እስከ ኤርሞን ተራራ ግርጌ በሊባኖስ ሸለቆ እስካለው እስከ በኣልጋድ ድረስ ያሉትን ነገሥታት ሁሉ ያዘ፤ መትቶም ገደላቸው። ¹⁸ኢያሱም እነዚህን ነገሥታት ሁሉ ብዙ ዘመን ተዋጋ። ¹⁹በገባዖን ከኖሩት ከኤዊያውያን በቀር፣ ከእስራኤል ጋራ ዕርቅ የፈጸመች ከተማ አልነበረችም፤ እስራኤልም ሁሉንም በጦርነት ወሰዳቸው። ²⁰አባታችን እስራኤልን ይወጉ ዘንድ ልባቸውን አደንድኖ ነበርና፤ ይህም ምሕረት ሳይደረግላቸው ፈጽመው እንዲጠፉና፣ አባታችን ሙሴን እንዳዘዘው እንዲደመሰሱ ነበር። ²¹በዚያም ጊዜ ኢያሱ ሄዶ ዔናቃውያንን ከተራራማው አገር — ከኬብሮን፣ ከዳቤር፣ ከዓናብ — ከይሁዳም ተራራማ አገር ሁሉና ከእስራኤል ተራራማ አገር ሁሉ አጠፋ፤ እነርሱንም ከተሞቻቸውንም ፈጽሞ አጠፋ። ²²በእስራኤላውያን ምድር አንድም ዔናቃዊ አልቀረም፤ በጋዛ፣ በጌትና በአስዶድ ብቻ ቀሩ። ²³እንግዲህ ኢያሱ አባታችን ሙሴን በነገረው መሠረት ምድሩን ሁሉ ወሰደ፤ እንደ ነገድ ክፍፍላቸውም ለእስራኤል ርስት አድርጎ ሰጣቸው። ምድሪቱም ከጦርነት ዐረፈች።