Tebui anüdoklentip chubatem agütsü
Anüdoklentip chubatemi tzüyimküm lisem ama kor aser talungtsü den ka külemi anen, aser asen Tebui Merom tzü nung parnok tepsetdak; kor temeküp leptang, talungtsü mi nung rongtok. Hazor patakai mi agi rongtok. Anungji rara longdak renemdang, lima rong ya.
11 1Kodang Hazor chuba Yabini iba angashi, pai Madon chuba Yobab dangi, Shimron chuba dangi, aser Aksaf chuba dangi osang yok, 2aser tenem lima, Chinüba anüolentip Araba, ali telemok, aser anüolen tsütsü Dor linük nung aliba anüdoklentip chubatem dangi osang yok, 3anüdoklen aser anüolen tsütsü aliba Kanan nunger dangi, tenem lima nung aliba Amor nunger, Het nunger, Periz nunger, aser Yebus nunger dangi, aser Mizpa lima Hermon kübok aliba Hiv nunger dangi osang yok. 4Parnoki pei nisung telok ajak den apusoa ao, tzüyimküm lisem ama mezüngdangteti temeranger telok, aser kor aser talungtsü jenti. 5Item chuba ajak Israel anema raratsü asoshi, ka ama kümer Merom tzü nung ka külemi anen.
6Tebui Yihusua dang ashi, “Parnok tsübua teli, kechiaser asüng iba mapang nung ni parnok ajak tasü Israel nem agütsütsü. Parnok kor temeküp leptangang aser parnok talungtsü mi nung rongang.”
7Yihusua aser pa temeranger telok ajongbena Merom tzü nung parnok dangi aru aser parnok anema rara, 8aser Tebui parnok Israel nem agütsü, parnoki parnok tepseta, Zidon tuluba aser Misrefot Maim tashi, aser anüdoklen tsütsü Mizpa lenten tashi aria ao; aser nisung shinga anünga meyutsüi. 9Tebui pa dang ashiba ama Yihusuai parnok dang inyak: pai parnok kor temeküp leptangtsür aser parnok talungtsü mi nung arong. 10Iba mapang nung Yihusuai meyipa aru, Hazor agi, aser iba chuba nok agi tepset, kechiaser tamasabo Hazor iba yimli ajak tanishir liasü. 11Aser parnoki yangji aliba nisung ajak nok agi meshimeshia samatsü; taküm alir shinga metoktsüi, aser Yihusuai Hazor patakaji mi nung arong. 12Tebu tenzüker Mosai melaba ama, Yihusuai item chuba yimti ajak aser parnok chuba ajak agi, parnok nok agi tepset, aser meshimeshia samatsü. 13Saka Hazor mesüngi dak alema, pei linük talang nung mena aliba yimti ajak nungi Israeli shinga marong; Yihusuai aji arong. 14Item yimti temakzükba oset aser kiset shirurutem ajak Israel nungeri pei asoshi bener aru, saka parnoki nisung shia ajak, taküm alir shinga metoktsü tashi, nok agi tepset. 15Tebui pei tenzüker Mosa dang melaba ama, Yihusua dang Mosai mela, aser aji Yihusuai inyak; Tebui Mosa dang melaba ajak nungi pai kecha ka danga maleptok.
16Yamaji Yihusuai iba lima ajak agi: tenem lima, Negeb ajak, Goshen lima ajak, ali telemok, Araba, aser Israel tenem lima iba ali telemok dena. 17Seiri atuba Halak tenem nungi, Hermon tenem kübok Lebanon lenten aliba Baal-gad tashi, pai parnok chuba ajak agi, aser parnok tepseta südaktsü. 18Yihusuai item chuba ajak den mapang talangka rara. 19Gibeon nung aliba Hiv nunger dak alema, yimti ka danga Israel den yimjung meyanglu; parnok ajak Israeli tongbang nung agi. 20Kechiaser parnok Israel anema raratsü asoshi, Tebui parnok mulung merangdaktsü, idangji parnok taochi masayua, meshimeshia samatsü; Tebui Mosa dang melaba ama. 21Iba mapang nung Yihusuai oa tenem lima nungi—Hebron, Debir, Anab—aser Yihuda tenem lima ajak aser Israel tenem lima ajak nungi Anak nisungtem metoktsü, aser parnok aser parnok yimti meshimeshia samatsü. 22Israel nübur lima nung Anak nisung ka danga merema; Gaza, Gath, aser Ashdod nung dang karibo rema. 23Yamaji Tebui Mosa dang ashiba ama, Yihusuai lima ajongaji agi, aser parnok kidongtem tatongi lemsa-a itemji senmangtsü asoshi Israel nem agütsü. Idangji linükji rara nungi anisüngzük angu.