Mutanen Gibeyon Sun Yaudari Mutanen Allah

Gibeyonawa suka iso da tsofaffin takalma da gurasa mai fumfuna, suna cewa sun yi doguwar tafiya. Isra'ila suka duba guzurinsu amma ba su tambayi Ubanmu ba, suka kuma rantse yarjejeniya. Bayan kwana uku ƙaryar ta fito fili — duk da haka rantsuwar ta tsaya, sai suka zama masu saran itace.

Babi na 9.

Da dukan sarakuna da suke a hayin Urdun suka ji haka—wato waɗanda suke a ƙasar tuddai, da ƙasa mai fili, da ko'ina a bakin babban Teku wajen Lebanon—Hittiyawa, da Amoriyawa, da Kan'aniyawa, da Ferizziyawa, da Hiwiyawa, da Yebusiyawa, sai suka tattaru gaba ɗaya domin su yaƙi Yoshuwa da Isra'ila. Amma da mutanen Gibeyon suka ji abin da Yoshuwa ya yi wa Yariko da Ai, su ma suka yi dabara, suka kama hanya kamar jakadu, suka ɗauki tsofaffin buhuna da tsofaffin salkunan ruwan inabi, waɗanda suka tsage aka kuma yi musu faci, a kan jakunansu, da tsofaffin takalma masu faci a ƙafafunsu, da yagaggun tufafi a jikinsu; dukan burodinsu kuwa busasshe ne ya kuma ragargaje. Suka je wurin Yoshuwa a sansani a Gilgal, suka ce masa da mutanen Isra'ila, “Daga ƙasa mai nisa muka zo; yanzu ku yi alkawari da mu.”

Amma mutanen Isra'ila suka ce wa Hiwiyawa, “Wataƙila kuna zama a tsakaninmu kaɗai. Yaya za mu iya yin alkawari da ku?”

Suka ce wa Yoshuwa, “Bayinka ne mu.” Yoshuwa ya tambaye su, “Su wane ne ku, kuma daga ina kuka zo?”

Suka ce masa, “Bayinka sun zo daga ƙasa mai nisa ƙwarai saboda sunan Ubangiji Allahnka, domin mun ji shaharar sa—dukan abin da ya yi a Masar, da kuma dukan abin da ya yi wa sarakuna biyu na Amoriyawa da suke a hayin Urdun—wato Sihon sarkin Heshbon da Og sarkin Bashan, wanda yake mulki a Ashtarot. Saboda haka dattawanmu da dukan mutanenmu suka ce, ‘Ku ɗauki guzuri don tafiya, ku je ku tarye su, ku ce musu, “Bayinku ne mu; yanzu ku yi alkawari da mu.”’ Burodinmu yana da ɗumi sa'ad da muka ɗauke shi daga gida a ranar da muka tashi zuwa wurinku; yanzu kuma, ga shi—ya busa ya kuma ragargaje. Waɗannan salkunan ruwan inabi sababbi ne sa'ad da muka cika su—yanzu kuwa sun tsage. Tufafinmu kuma da takalmanmu sun tsufa saboda tafiya mai tsawo ƙwarai.”

Sai mutanen suka ɗanɗana guzurinsu, amma ba su nemi shawarar Ubanmu ba. Sa'an nan Yoshuwa ya yi sulhu da su, ya kuma yanke alkawari ya bar su su rayu, shugabannin jama'a kuma suka rantse musu. ^a Bayan kwana uku, da suka riga suka yi alkawari da su, sai suka ji waɗannan mutane maƙwabta ne da suke zama a tsakaninsu. Mutanen Isra'ila suka kama hanya, suka isa biranensu a rana ta uku. Biranensu kuwa su ne, Gibeyon, da Kefira, da Be'erot, da Kiriyat-Yeyarim. Amma Isra'ila ba su kai musu hari ba, domin shugabannin jama'a sun rigaya sun rantse musu da Ubanmu, Allah na Isra'ila. Dukan jama'a kuwa suka yi gunaguni a kan shugabannin. Amma dukan shugabannin suka ce wa dukan taron, “Mun rantse musu da Ubanmu, Allah na Isra'ila, saboda haka yanzu ba za mu iya taɓa su ba. Ga abin da za mu yi musu, mu bar su su rayu, domin kada fushi yă sauko a kanmu saboda rantsuwar da muka yi musu.” Shugabannin suka ce musu, “Ku bar su su rayu.” Sai suka zama masu yanka itace da masu ɗiban ruwa domin dukan jama'a, yadda shugabannin suka yi alkawari.

Sa'an nan Yoshuwa ya kira su, ya ce, “Me ya sa kuka yaudare mu, kuna cewa, ‘Muna zama mai nisa ƙwarai da ku,’ alhali kuna zama a tsakaninmu kaɗai? Saboda haka yanzu kun zama la'anannu, kullum za ku zama bayi—masu yanka itace da masu ɗiban ruwa domin gidan Ubana.”

Suka amsa wa Yoshuwa suka ce, “An faɗa wa bayinka sarai cewa Ubangiji Allahnka ya umarci bawansa Musa yă ba ku dukan ƙasar, yă kuma hallaka dukan mazaunanta a gabanku. Saboda haka, da yake mun ji tsoro ƙwarai saboda rayukanmu sabo da ku, shi ya sa muka yi haka. Yanzu muna a hannunka. Ka yi mana duk abin da ya yi kyau ya kuma yi daidai a idanunka.”

Haka kuwa ya yi musu, ya cece su daga hannun mutanen Isra'ila, ba su kuwa kashe su ba. A ranar nan Yoshuwa ya mai da su masu yanka itace da masu ɗiban ruwa domin taron da kuma bagaden Ubanmu a wurin da zai zaɓa—haka kuwa yake har yă zuwa yau.