Joshua 8

8 ¹Chieina ithumwui Avāna Joshuali hānga, "Mangacheealu lah malung matātungalu. Raimi saikora ngasoda Aishong zatphoklu. Ina Aiwui awunga, awui mibing, awui keinung, kala awui ngalei napāngli sangmihaira. ²Jericho eina chiwui awungali nana sākahai athishurda, Ai eina chiwui awungali sālu; kha chiwui sāshai kala sha̱kei nathum khalattawui vangla khuilu. Keinungwui khanukli ngathirai sālu."

³Chieina Joshuana raimi saikora khuiphungda Aishong zatphokuwa. Ana raikapinga mi thing thumrā kapangkhuilaga ngayāshong chihoserhaowa. ⁴Ana athumli hāngchithei, "Nathumna keinungwui khanukli ngathirai sāda rimpamlu; keinungwui eina katā matāthuialu. Nathum saikora ningngasharlu. ⁵Ina kala iwui mibing saikora keinung ngalemli vāra. Athumna kharethangwui tākam eina ithumli ngarar khavai shokkharā tharan, ithum athumwui mangāli yāmra. ⁶Ithumna athumli keinungwui eina khuithuiranglakha eina tangda athumna ithumli shurda shokra, kaja athumna, 'Athum kharethangwui tākam eina ithumwui mangāli yāmura' da hāngra. Chitharan ithum athumwui eina yāmra. ⁷Nathum ngathiraipamwui eina ngakarthuida keinung chi tukkhuilu, kaja nathumwui Avāna chi nathumwui pāngli sangmira. ⁸Nathumna keinung chi khui tharan, chi mei eina riktāhaolu. Ithumwui Avāna kaso kahai athishurda sālu. Yanglu, ina nathumli hāngchitheihaira."

⁹Chieina Joshuana athumli chihovāhaowa, kala athumna ngathiraipamli vaida Bethel eina Aiwui ngachaili Aiwui zingtunshong rimpama, kha ana chithang ngayā mibingwui ngachaili pamsanghaowa. ¹⁰Joshuana ngathorthak thuida mibingli kazipkhuilaga, Israelwui khararnaobing ngasoda athumli Aishong thānvai. ¹¹Awui raimi saikora zatphokta, vānganaida keinung chili kāroda vāshunga, kala Aiwui atungshong rairum vasāpama; athum eina Aiwui ngachaili tampāk akha lei. ¹²Ana mi thing phangā sha̱kha khuilaga, Bethel eina Aiwui ngachaili, keinungwui zingtunshong ngathirai sāpama. ¹³Chithāda athumna rāmrah katonga keinungwui atungshong, kala awui khanukwui khamayonabing keinungwui zingtunshong pamngasaka; kala chithang ngayā Joshuana tampākwui alungthungli vai. ¹⁴Aiwui awungana chi kathei tharan, ana kala awui mibing saikora, keinungwui mibingna ngathorthak thuida, Arabahshong yangkhangasung apam chili Israelli rai ngarar khavai heng sāda shokngararhaowa. Kha keinungwui khanukli ngathirai rimpama kaji ana matheimana. ^a a v14 Arabah hi Galilee Shamadruwui eina azingshong Salt Sea shong longkatā, Jordan tampākwui kathuk kahai apamna. ¹⁵Joshua kala Israel saikorana athum makhayui thāda lamhāngshong yāmvāhaowa. ¹⁶Keinungli khalei mibing saikora athumli kharom khavai ahokhuiserhaowa; athumna Joshuali kharomkhuida keinungwui eina thuihaowa. ¹⁷Ai lah Bethelli, Israelwui khanukli mashokkharā mi khipānakha maleimana; athumna keinung chi phut kahai horhaida Israelli kharomhaowa.

¹⁸Chiwui thili ithumwui Avāna Joshuali hānga, "Nawui pāngli khalei kazei chi Aishong katinglu, kaja ina chi nawui pāngli horsangmira." Chieina Joshuana awui pāngli khalei kazei chi keinung chishong katinga.

¹⁹Awui pāng khāngkhui mikkhayip akhawui alungli, ngathirai chi athumwui pam eina ngakarthuilaga, keinung chiwui alungli yongvāda, chi tukkhuida, ngalāngda mei eina chuingasaka. ²⁰Aiwui mibingna ngareiungda keinungwui meikhut kazingramshong kāhaira chi theilaga, athum yāmshok khavai apong maleithuwa; kaja lamhāngshong yāmvākasābing china kakharomabing tungli ngalanhaowa. ²¹Joshuana kala Israelnaobing saikorana ngathirai china keinung chi khuihaira, kala chiwui meikhut kāhaira kaji chi theilaga, athum ngalanhailaga Aiwui mibingli shaothata. ²²Kaikhabing china athumli samphang khavai keinung chiwui eina shokta, chieina Aiwui mibing chi Israelna khaphei khanini eina kuikhanam ngasaka. Israelna athumli shaothata, akha eina tangda mataimimana lah manganaishokmana. ²³Kha Aiwui awunga chi athumna kharing eina tukkhuilaga Joshuali khuiungmi.

²⁴Israelna Aiwui kapambing saikorali ngalemli kala athumna kakharomvā lamhāngli shaothat kuphaowa tharan, kala saikora raighai eina pitāda akha eina tangda maleithuwa, Israelnaobing saikora Aili latunglaga raighai eina shaothata. ²⁵Chithang pitākabing Aiwui mi saikora, mayarnao kala sha̱nao ngarumda, thing tharāda khanina. ²⁶Joshuana Aiwui kapambing saikorali shimān ngasak khavai tharchigat kupha kahaiwui eina tangda, awui kazei khāngkhuida pamsai. ²⁷Ithumwui Avāna Joshuali kaso kahai athishurda, Israelna keinung chiwui sha̱kei kala ngapon kakhui kasaikha khalattawui vang khuiya. ²⁸Chieina Joshuana Aili mei eina riktāhailaga, katang makhavai ruinganai akha sāhaira, aja zimiksho eina tangda ramchona. ²⁹Ana Aiwui awunga chi ngazin eina tangda thingli hokthanghaowa. Zimik katun eina Joshuana awui phasā chi thing eina khuithui keinung ngavei zangkhavaili horsang khavai kasoi, kala chiwuitungli lungkhor kahaka akha khorhaowa; chi aja eina tangda chili lei.

Israelna Avāwui Kadhara Sāluishit

³⁰Chiwui thili Joshuana ithumwui Avā, Israelwui Varewui vang Ebal Kaphungli hanphut akha sāhaowa, ³¹ithumwui Avāwui rao Mosesna Israelnaobingli kaso kahai athishurda, Moseswui ainwui lairikli kapihaida khalei tākam eina, chi mari eina maza̱kahai mashānkakhui lunggui eina sākahai hanphut akhana. Chiwuitungli athumna ithumwui Avāwui vang rikkatā kachigat chigata, kala pha̱kaphayā chigata. ³²Chili Israelnaobingwui mangāli ana Mosesna kapi kahai Moseswui ain chi lungguitungli kapiluishita. ³³Israelnaobing saikora, kha̱mila luinganai ngarumda, khararnaobing, otva̱bing, kala bichar sābing ngarumda, ithumwui Avāwui tuingashit oko chi kapānabing Leviwui pāngmonbingli ngaherlaga, oko chiwui khaphei khaninili nganinga. Ngakaipak Gerizim Kaphungshong ngaher, kala ngakaipak Ebal Kaphungshong ngaher; chithāda ithumwui Avāwui rao Mosesna Israelwui mibingli somi khavai rida kaso kahaina. ³⁴Chiwui thili ana ainwui lairikli kapihaida khalei tākam eina, sokhami kala khonkashi, ainwui tui saikora pāhaira. ³⁵Joshuana Mosesna kaso kahai tui saikora, tui akha nida mathumhailakla, sha̱nao, naoshinaobing, kala athumli ngasokazat kha̱mibing ngasoda Israel yarui ashangva̱ saikorawui mangāli pāchithei.