Yoshua 8

8 ¹Kisha Baba yetu akamwambia Yoshua, "Usiogope wala usikate tamaa. Uwachukue watu wote wa vita pamoja nawe, upande Ai. Tazama, nimekutia mkononi mwako mfalme wa Ai, watu wake, mji wake, na nchi yake. ²Umtendee Ai na mfalme wake kama ulivyomtendea Yeriko na mfalme wake—ila nyara zake na wanyama wake mtajitwalia. Weka waviziao nyuma ya mji."

³Basi Yoshua na watu wote wa vita wakainuka kwenda Ai. Akachagua mashujaa hodari elfu thelathini, akawapeleka usiku. ⁴Akawaagiza, akisema, "Angalieni, mtavizia nyuma ya mji—msiwe mbali sana na mji. Nanyi nyote mwe tayari. ⁵Nami na watu wote nilio nao tutaukaribia mji. Nao watakapotoka kutupinga kama mara ya kwanza, tutakimbia mbele yao. ⁶Nao watatufuata hata tuwavute mbali na mji, kwa maana watasema, 'Wanatukimbia kama mara ya kwanza.' Basi tutakimbia mbele yao. ⁷Ndipo mtatoka mahali mlipovizia na kuuteka mji, kwa maana Baba yenu atautia mkononi mwenu. ⁸Nanyi mtakapokwisha kuuteka mji, mtauteketeza kwa moto. Fanyeni kama Baba yetu alivyoamuru. Angalieni, nimewaamuru."

⁹Basi Yoshua akawapeleka, nao wakaenda mahali pa kuvizia, wakakaa kati ya Betheli na Ai, upande wa magharibi wa Ai; lakini Yoshua akalala usiku ule kati ya watu. ¹⁰Yoshua akaamka asubuhi na mapema, akawakusanya watu, naye pamoja na wazee wa Israeli akawaongoza kupanda Ai. ¹¹Watu wote wa vita waliokuwa pamoja naye wakainuka, wakasogea mbele hata wakafika mkabala wa mji, wakapiga kambi upande wa kaskazini wa Ai; palikuwa na bonde kati yao na Ai. ¹²Akatwaa kama watu elfu tano, akawaweka wavizie kati ya Betheli na Ai, upande wa magharibi wa mji. ¹³Basi wakawaweka watu, kambi yote iliyokuwa upande wa kaskazini wa mji, na waviziao wake upande wa magharibi wake; naye Yoshua akaenda usiku ule katikati ya bonde. ¹⁴Ikawa mfalme wa Ai alipoona hayo, watu wa mji wakaamka mapema, wakatoka haraka kupigana na Israeli, yeye na watu wake wote, mahali palipoamriwa, mkabala wa Araba; lakini hakujua ya kuwa palikuwa na waviziao nyuma ya mji. ^a a v14 Araba ni bonde refu la Yordani lililoshuka chini, likienda kusini kutoka Bahari ya Galilaya kuelekea Bahari ya Chumvi. ¹⁵Yoshua na Israeli wote wakajifanya kama walioshindwa mbele yao, wakakimbia kuelekea jangwani. ¹⁶Watu wote waliokuwa mjini wakaitwa ili wawafuatie; wakamfuatia Yoshua, wakavutwa mbali na mji. ¹⁷Hakubaki mtu ye yote katika Ai wala Betheli asiyetoka kuwafuatia Israeli; wakauacha mji wazi, wakawafuatia Israeli.

¹⁸Ndipo Baba yetu akamwambia Yoshua, "Nyosha mkuki ulio mkononi mwako kuuelekea Ai, kwa maana nitautia mkononi mwako." Basi Yoshua akaunyosha mkuki uliokuwa mkononi mwake kuuelekea mji.

¹⁹Mara alipouinua mkono wake, wale waviziao wakainuka upesi mahali pao, wakapiga mbio, wakaingia mjini, wakauteka, wakafanya haraka kuuteketeza mji kwa moto. ²⁰Basi watu wa Ai wakageuka nyuma, wakatazama, na tazama, moshi wa mji ulikuwa ukipanda mbinguni, wala hawakuwa na nafasi ya kukimbilia huku wala huku; nao watu waliokimbilia jangwani wakawageukia wale waliowafuatia. ²¹Yoshua na Israeli wote walipoona ya kuwa wale waviziao wameuteka mji, na ya kuwa moshi wa mji unapanda, wakageuka nyuma, wakawapiga watu wa Ai. ²²Nao wale wengine wakatoka mjini kuwaelekea; hivyo watu wa Ai wakawa katikati ya Israeli, wengine upande huu na wengine upande huu. Wakawapiga hata usibaki hata mmoja aliyesalia wala kuokoka. ²³Lakini mfalme wa Ai wakamtwaa hai, wakamleta kwa Yoshua.

²⁴Ikawa hapo Israeli walipokwisha kuwaua wenyeji wote wa Ai katika mashamba na jangwani mahali walipowafuatia, nao wote walipokwisha kuanguka kwa makali ya upanga hata wakaangamia, Israeli wote wakarudi Ai, wakaupiga kwa makali ya upanga. ²⁵Nao wote walioanguka siku ile, waume kwa wake, walikuwa watu elfu kumi na mbili, ndio watu wote wa Ai. ²⁶Kwa maana Yoshua hakuurudisha mkono wake aliouinua pamoja na mkuki, hata alipokwisha kuwaangamiza kabisa wenyeji wote wa Ai. ²⁷Ila wanyama na nyara za mji ule Israeli wakajitwalia, kama Baba yetu alivyomwamuru Yoshua. ²⁸Basi Yoshua akauteketeza Ai kwa moto, akaufanya kuwa chungu cha magofu milele, ukiwa hata leo hii. ²⁹Naye akamtundika mfalme wa Ai mtini hata jioni; na jua lilipokuchwa Yoshua akaamuru maiti yake ishushwe kutoka mtini, wakaitupa penye maingilio ya lango la mji, wakainua juu yake chungu kikubwa cha mawe, kilichoko hata leo hii.

Israeli Wafanya Upya Agano la Baba

³⁰Ndipo Yoshua akamjengea Baba yetu, Mungu wa Israeli, madhabahu katika Mlima Ebali, ³¹kama vile Musa, mtumishi wa Baba yetu, alivyowaamuru wana wa Israeli—kama ilivyoandikwa katika kitabu cha torati ya Musa—madhabahu ya mawe yasiyochongwa, ambayo hakuna mtu aliyeyagusa kwa chuma. Juu yake wakamtolea Baba yetu sadaka za kuteketezwa, na kutoa sadaka za amani. ³²Hapo, mbele ya wana wa Israeli, akaandika juu ya mawe nakala ya torati ya Musa, aliyoiandika Musa. ³³Israeli wote—mgeni na mzalia sawasawa—pamoja na wazee wao, na maakida, na waamuzi wao, wakasimama pande zote mbili za sanduku, wakiwaelekea makuhani Walawi waliolichukua sanduku la agano la Baba yetu. Nusu yao wakaelekea Mlima Gerizimu, na nusu wakaelekea Mlima Ebali, kama vile Musa, mtumishi wa Baba yetu, alivyoamuru tangu awali, ili kuwabariki watu wa Israeli. ³⁴Kisha akasoma maneno yote ya torati, baraka na laana, sawasawa kabisa na yote yaliyoandikwa katika kitabu cha torati. ³⁵Hapana neno lo lote katika yale yote aliyoamuru Musa ambalo Yoshua hakulisoma mbele ya kusanyiko lote la Israeli, pamoja na wanawake, na watoto, na wageni waliokaa kati yao.