Esekiẹli 33

33 ¹Ọ̀rọ̀ Baba wa tọ̀ mí wá, pé:

²“Ọmọ ènìyàn, sọ̀rọ̀ sí àwọn ènìyàn rẹ, kí o sì wí fún wọn pé: Nígbà tí mo bá mú idà wá sí orí ilẹ̀ kan, àwọn ènìyàn ilẹ̀ náà a mú ọkùnrin kan nínú wọn, wọ́n a sì fi í ṣe olùṣọ́ wọn, ³tí ó bá sì rí idà tí ń bọ̀ wá sí orí ilẹ̀ náà, tí ó sì fọn ìpè láti kìlọ̀ fún àwọn ènìyàn, ⁴nígbà náà bí ẹnikẹ́ni bá gbọ́ ìpè náà, tí kò sì kọbi ara sí ìkìlọ̀ náà, tí idà sì dé, tí ó sì gbé e lọ, ẹ̀jẹ̀ rẹ̀ yóò wà lórí ara rẹ̀. ⁵Ó gbọ́ ìpè náà, ó sì kọ ìkìlọ̀ náà sílẹ̀; ẹ̀jẹ̀ rẹ̀ wà lórí ara rẹ̀. Ìbá ṣe pé ó gba ìkìlọ̀ náà, òun ìbá ti gba ẹ̀mí rẹ̀ là. ⁶Ṣùgbọ́n bí olùṣọ́ náà bá rí idà tí ń bọ̀, tí kò sì fọn ìpè, tí a kò sì kìlọ̀ fún àwọn ènìyàn, tí idà sì dé, tí ó sì gbé ọ̀kan nínú wọn lọ, ẹni náà kú nítorí ẹ̀ṣẹ̀ ara rẹ̀, ṣùgbọ́n èmi yóò béèrè ẹ̀jẹ̀ rẹ̀ lọ́wọ́ olùṣọ́ náà.

⁷“Ìwọ, ọmọ ènìyàn, mo fi ọ́ ṣe olùṣọ́ fún ilé Israẹli. Nígbà tí o bá gbọ́ ọ̀rọ̀ láti ẹnu mi, kìlọ̀ fún wọn láti ọ̀dọ̀ mi.” ⁸Nígbà tí mo bá sọ fún ènìyàn búburú pé, “Ìwọ ènìyàn búburú, ìwọ yóò kú dandan,” tí ìwọ kò sì sọ̀rọ̀ láti kìlọ̀ fún un kí ó yípadà kúrò ní ọ̀nà rẹ̀, òun yóò kú nítorí ẹ̀ṣẹ̀ rẹ̀, ṣùgbọ́n èmi yóò béèrè ẹ̀jẹ̀ rẹ̀ lọ́wọ́ rẹ. ⁹Ṣùgbọ́n bí ìwọ bá kìlọ̀ fún ènìyàn búburú kí ó yípadà kúrò ní ọ̀nà rẹ̀, tí kò sì yípadà kúrò nínú rẹ̀, òun yóò kú nínú ẹ̀ṣẹ̀ rẹ̀; ìwọ ti gba ẹ̀mí ara rẹ là.

Ẹ Yípadà kí Ẹ sì Yè

¹⁰“Ìwọ, ọmọ ènìyàn, sọ fún ilé Israẹli pé: Báyìí ni ẹ̀yin ń wí: ‘Àwọn àìtọ́ wa àti ẹ̀ṣẹ̀ wa wà lórí wa, àwa sì ń díbàjẹ́ nínú wọn. Báwo ni àwa ṣe lè yè?’” ¹¹Sọ fún wọn pé: Bí mo ti wà láàyè, ni Baba Olódùmarè wí, èmi kì í ní inú dídùn sí ikú ènìyàn búburú, bí kò ṣe pé kí ènìyàn búburú yípadà kúrò ní ọ̀nà rẹ̀ kí ó sì yè. Ẹ yípadà, ẹ yípadà kúrò ní àwọn ọ̀nà búburú yín! Èéṣe tí ẹ ó fi kú, ẹ̀yin ilé Israẹli?

¹²“Ìwọ, ọmọ ènìyàn, wí fún àwọn ènìyàn rẹ pé: Òdodo ènìyàn olódodo kì yóò gbà á là ní ọjọ́ tí ó bá ṣọ̀tẹ̀, ìwà búburú ènìyàn búburú kì yóò sì mú un ṣubú ní ọjọ́ tí ó bá yípadà kúrò nínú rẹ̀; ènìyàn olódodo kì yóò lè yè nípa òdodo rẹ̀ ní ọjọ́ tí ó bá dẹ́ṣẹ̀. ¹³Bí mo bá sọ fún olódodo pé, ‘Ìwọ yóò yè dandan,’ tí ó bá sì gbẹ́kẹ̀lé òdodo ara rẹ̀, tí ó sì ṣe búburú, kò sí ọ̀kan nínú àwọn iṣẹ́ òdodo rẹ̀ tí a ó rántí; òun yóò kú nítorí búburú tí ó ṣe. ¹⁴Bí mo bá sọ fún ènìyàn búburú pé, ‘Ìwọ yóò kú dandan,’ tí ó bá sì yípadà kúrò nínú ẹ̀ṣẹ̀ rẹ̀, tí ó sì ṣe ohun tí ó tọ́ tí ó sì dọ́gba, ¹⁵bí ènìyàn búburú náà bá dá ẹ̀rú padà, tí ó san ohun tí ó jí padà, tí ó tẹ̀lé àwọn òfin ìyè, tí kò sì ṣe búburú kankan—òun yóò yè dandan; kì yóò kú. ¹⁶Kò sí ẹ̀ṣẹ̀ kankan tí ó dá tí a ó rántí sí i lọ́rùn. Ó ṣe ohun tí ó tọ́ tí ó sì dọ́gba; òun yóò yè dandan.

¹⁷“Àwọn ènìyàn rẹ ń wí pé, ‘Ọ̀nà Baba Olódùmarè kò tọ́’—ṣùgbọ́n ọ̀nà tiwọn fúnra wọn ni kò tọ́. ¹⁸Nígbà tí olódodo bá yípadà kúrò nínú òdodo rẹ̀, tí ó sì ṣe búburú, òun yóò kú nítorí rẹ̀. ¹⁹Nígbà tí ènìyàn búburú bá yípadà kúrò nínú ìwà búburú rẹ̀, tí ó sì ṣe ohun tí ó tọ́ tí ó sì dọ́gba, òun yóò yè nípa rẹ̀. ²⁰Síbẹ̀ ẹ̀yin ń wí pé, ‘Ọ̀nà Baba Olódùmarè kò dọ́gba.’ Èmi yóò ṣe ìdájọ́ olúkúlùkù yín gẹ́gẹ́ bí ọ̀nà ara rẹ̀, ẹ̀yin ilé Israẹli.”

Jerusalemu Ti Ṣubú

²¹Ní ọdún kejìlá ìgbèkùn wa, ní oṣù kẹwàá, ní ọjọ́ karùn-ún, ọkùnrin kan tí ó sá àsálà láti Jerusalemu wá bá mi, ó sì wí pé, “Ìlú náà ti ṣubú.” ²²Ọwọ́ Baba wa wà lórí mi ní ìrọ̀lẹ́ ṣáájú kí ọkùnrin tí ó sá àsálà náà tó dé, Baba wa sì ya ẹnu mi ṣáájú kí ọkùnrin náà tó wá bá mi ní òwúrọ̀. A ya ẹnu mi, èmi kò sì tún dákẹ́ mọ́.

²³Nígbà náà ni ọ̀rọ̀ Baba wa tọ̀ mí wá wí pé:

²⁴Ọmọ ènìyàn, àwọn tí ń gbé inú àwọn ahoro wọ̀nyí ní ilẹ̀ Israẹli ń wí nígbà gbogbo pé, “Abrahamu jẹ́ ọkùnrin kan ṣoṣo, síbẹ̀ ó jogún ilẹ̀ náà; àwa pọ̀—dájúdájú a ti fi ilẹ̀ náà fún wa gẹ́gẹ́ bí ogún wa.” ²⁵Nítorí náà, sọ fún wọn pé: Báyìí ni Baba Olódùmarè wí: Ẹ̀yin ń jẹ ẹran pẹ̀lú ẹ̀jẹ̀ rẹ̀, ẹ ń gbé ojú yín sókè sí àwọn òrìṣà yín, ẹ sì ń ta ẹ̀jẹ̀ sílẹ̀—ǹjẹ́ ẹ̀yin yóò ha jogún ilẹ̀ náà bí? ²⁶Ẹ gbẹ́kẹ̀lé idà yín, ẹ ń ṣe àwọn ohun ìríra, olúkúlùkù yín sì ń bá aya aládùúgbò rẹ̀ ṣe panṣágà—ǹjẹ́ ẹ̀yin yóò ha jogún ilẹ̀ náà bí?

²⁷Sọ fún wọn pé: Báyìí ni Baba Olódùmarè wí: “Bí mo ti wà láàyè, àwọn tí ń bẹ nínú àwọn ahoro yóò ti ọwọ́ idà ṣubú, àwọn tí ń bẹ ní gbangba pápá ni èmi yóò fi fún àwọn ẹranko igbó láti jẹ, àwọn tí ń bẹ nínú àwọn odi agbára àti nínú àwọn ihò àpáta yóò sì kú nípa àjàkálẹ̀-àrùn. ²⁸Èmi yóò sọ ilẹ̀ náà di ahoro àti ìdahoro; agbára ìgbéraga rẹ̀ yóò dópin; àwọn òkè Israẹli yóò dahoro, láìsí ẹni tí yóò la wọn kọjá. ²⁹Nígbà náà ni wọn yóò mọ̀ pé èmi ni Baba wọn, nígbà tí mo bá sọ ilẹ̀ náà di ìdahoro àti ahoro nítorí gbogbo àwọn ohun ìríra tí wọ́n ṣe.”

³⁰Ìwọ, ọmọ ènìyàn: àwọn ènìyàn rẹ ń sọ̀rọ̀ nípa rẹ ní ẹ̀gbẹ́ àwọn odi àti ní àwọn ẹnu-ọ̀nà ilé, ọ̀kan pẹ̀lú èkejì, olúkúlùkù pẹ̀lú arákùnrin rẹ̀ pé: “Ẹ wá nísinsìnyí, ẹ gbọ́ ọ̀rọ̀ tí ó jáde wá láti ọ̀dọ̀ Baba wa. ³¹Wọ́n a tọ̀ ọ́ wá bí àwọn ènìyàn ti ń ṣe, wọ́n a jókòó níwájú rẹ bí àwọn ènìyàn mi, wọ́n a sì gbọ́ àwọn ọ̀rọ̀ rẹ—ṣùgbọ́n wọn kì í ṣe wọ́n. Nítorí pé ẹnu wọn ni wọ́n fi ń sọ ìfẹ́, ṣùgbọ́n ọkàn wọn ń lé èrè ara wọn. ³²Kíyèsí i, ìwọ dàbí orin ìfẹ́ lọ́dọ̀ wọn, tí a fi ohùn dídùn kọ, tí a sì lù dáradára; wọ́n ń gbọ́ àwọn ọ̀rọ̀ rẹ ṣùgbọ́n wọn kì í ṣe wọ́n. ³³Nígbà tí ó bá sì ṣẹ—yóò sì ṣẹ dandan—wọn yóò mọ̀ pé wòlíì kan ti wà láàrin wọn.”