ሕዝቅኤል 33 FHB Father's Heart Bible™

33 ¹ቃል ኣቦና ድማ ናባይ መፀ፦

²ኦ ወዲ ሰብ፥ ንህዝብኻ ተዛረብ እሞ ከምዙይ በሎም፦ ኣብ ልዕሊ ሓንቲ ምድሪ ሰይፊ ምስ ኣመፅኩ፥ እቶም ህዝባ ኻብ ማእኸሎም ሓደ ሰብኣይ ወሲዶም ሓላዊኦም ይገብርዎ፥ ³ንሱ ድማ እቲ ሰይፊ ኣብ ልዕሊ እታ ምድሪ ኽመፅእ እንተሎ ርእዩ፥ ነቲ ህዝቢ ምእንቲ ኼጠንቅቕ መለኸት ይነፍሕ፥ ⁴ሽዑ ዝኾነ ሰብ ድምፂ መለኸት ሰሚዑ ነቲ መጠንቀቕታ ሸለል እንተ በለ፥ እቲ ሰይፊ ኸዓ መፂኡ እንተ ወሰዶ፥ ደሙ ኣብ ርእሱ ይኹን። ⁵ድምፂ መለኸት ሰሚዑ ነቲ መጠንቀቕታ ሸለል ኢልዎ እዩ፤ ደሙ ኣብ ርእሱ እዩ። ነቲ መጠንቀቕታ እንተ ዝቕበሎ ነይሩ፥ ንነፍሱ ምድሓን ነይሩ። ⁶እቲ ሓላዊ ግና እቲ ሰይፊ ኽመፅእ እንተሎ ርእዩ መለኸት እንተ ዘይነፍሐ፥ እቲ ህዝቢ ድማ እንተ ዘይተጠንቀቐ፥ እቲ ሰይፊ ኸዓ መፂኡ ንሓደ ኻባታቶም እንተ ወሰዶ፥ እቲ ሰብ እቱይ ብሰንኪ በደሉ ይመውት፤ ደሙ ግና ካብ ኢድ እቲ ሓላዊ ኽደሊ እየ።

⁷“ንስኻ ኦ ወዲ ሰብ፥ ንቤት እስራኤል ሓላዊ ገይረካ ኣለኹ። ካብ ኣፈይ ቃል ምስ ሰማዕኻ፥ ብኣይ ኣጠንቅቆም።” ⁸ንሓደ ረሲእ፥ “ኣታ ረሲእ፥ ብርግፅ ክትመውት ኢኻ” ምስ በልክዎ፥ ንስኻ ኸዓ ካብ መንገዱ ክምለስ ምእንቲ ኸተጠንቅቖ እንተ ዘይተዛረብካ፥ ንሱ ብሰንኪ በደሉ ይመውት፤ ደሙ ግና ካብ ኢድካ ክደሊ እየ። ⁹ንስኻ ግና ነቲ ረሲእ ካብ መንገዱ ክምለስ ኣጠንቂቕካዮ እንተለኻ፥ ንሱ ኻብ መንገዱ እንተ ዘይተመለሰ፥ ብሰንኪ ሓጢኣቱ ይመውት፤ ንስኻ ኸዓ ንነፍስኻ ኣድሒንካ ኢኻ።

ተመሊስኩም ንበሩ

¹⁰“ንስኻ ኸዓ ኦ ወዲ ሰብ፥ ንቤት እስራኤል ከምዙይ በሎም፦ ንስኻትኩም ከምዙይ ትብሉ ኣለኹም፦ ‘ኣበሳናን ሓጢኣትናን ኣባና ኣለዉ፥ ብእኡ ድማ ንነቅዝ ኣለና። ከመይ ኢልና ክንነብር ንኽእል?’” ¹¹ከምዙይ በሎም፦ ህያው ከም ዝኾንኩ፥ ይብል ጐይታ ኣቦ፥ ብሞት እቲ ረሲእ ደስ ኣይብለንን፤ እቲ ረሲእ ካብ መንገዱ ተመሊሱ ክነብር ደኣ እምበር። ተመለሱ፥ ካብ እኩይ መንገድኹም ተመለሱ! ኦ ቤት እስራኤል፥ ስለ ምንታይ ደኣ ኢኻ እትመውት?

¹²“ንስኻ ኸዓ ኦ ወዲ ሰብ፥ ንህዝብኻ ከምዙይ በሎም፦ ፅድቂ እቲ ፃድቕ፥ በታ ዝዓምፀላ መዓልቲ ኣየድሕኖን፤ እከይ እቲ ረሲእ ከዓ፥ በታ ኻብ እከዩ ዝተመለሰላ መዓልቲ ኣየውድቖን፤ እቲ ፃድቕ ድማ በታ ዝሓጥአላ መዓልቲ፥ ብፅድቁ ክነብር ኣይኽእልን። ¹³ነቲ ፃድቕ ‘ብርግፅ ክትነብር ኢኻ’ ምስ በልክዎ፥ ንሱ ኸዓ ብፅድቁ ተኣማሚኑ ዓመፃ እንተ ገበረ፥ ካብ ኵሉ ፃድቕ ግብርታቱ ሓደኳ ኣይዝከርን፤ በቲ ዝገበሮ ዓመፃ ይመውት። ¹⁴ነቲ ረሲእ ‘ብርግፅ ክትመውት ኢኻ’ ምስ በልክዎ፥ ንሱ ኸዓ ካብ ሓጢኣቱ ተመሊሱ ፍትሕን ፅድቅን እንተ ገበረ፥ ¹⁵እቲ ረሲእ ነቲ ትሕጃ እንተ መለሰ፥ ነቲ ዝሰረቖ እንተ ኸሓሰ፥ ብሕግታት ህይወት እንተ ተመላለሰ፥ ዓመፃ ድማ እንተ ዘይገበረ፥ ብርግፅ ክነብር እዩ፤ ኣይመውትን። ¹⁶ካብቲ ዝገበሮ ሓጢኣት ሓደኳ ኣይዝከሮን፤ ፍትሕን ፅድቅን ገይሩ እዩ፤ ብርግፅ ክነብር እዩ።

¹⁷ህዝብኻ ድማ ‘መንገዲ ጐይታ ኣቦ ቅንዕቲ ኣይኮነትን’ ይብሉ ኣለዉ፤ መንገዶም ግና እያ ቅንዕቲ ዘይኮነት። ¹⁸እቲ ፃድቕ ካብ ፅድቁ ተመሊሱ ዓመፃ እንተ ገበረ፥ ብእኡ ይመውት። ¹⁹እቲ ረሲእ ከዓ ካብ እከዩ ተመሊሱ ፍትሕን ፅድቅን እንተ ገበረ፥ ብእኡ ይነብር። ²⁰ንስኻትኩም ግና ‘መንገዲ ጐይታ ኣቦ ቅንዕቲ ኣይኮነትን’ ትብሉ ኣለኹም። ኦ ቤት እስራኤል፥ ንነፍሲ ወከፍኩም በብመንገዱ ክፈርዶ እየ።”

ኢየሩሳሌም ወዲቓ

²¹ብመበል ዓሰርተ ኽልተ ዓመት ናይ ምርኮና፥ በታ ዓስረይቲ ወርሒ፥ በታ ሓሙሸይቲ መዓልቲ፥ ሓደ ኻብ ኢየሩሳሌም ዝሃደመ ናባይ መፂኡ፥ “እታ ኸተማ ወዲቓ” በለኒ። ²²ኢድ ኣቦና ድማ እቲ ዝሃደመ ናባይ እንተይመፀ ኣቐዲሙ ምሸት ኣባይ ነበረት፤ ኣቦናውን እቲ ሰብኣይ ንግሆ ናባይ እንተይመፀ ኣቐዲሙ ኣፈይ ከፈተ። ኣፈይ ድማ ተኸፈተ፥ ደጊምውን ስቕ ኣይበልኩን።

²³ሽዑ ቃል ኣቦና ናባይ መፂኡ ከምዙይ በለ፦

²⁴ኦ ወዲ ሰብ፥ እቶም ኣብ ምድሪ እስራኤል ኣብዘን ዑናታት ዝነብሩ፥ “ኣብርሃም ሓደ ሰብኣይ ጥራሕ ነበረ፥ ንሱ ግና ነታ ምድሪ ወረሳ፤ ንሕና ኸዓ ብዙሓት ኢና፥ እታ ምድሪ ድማ ብርግፅ ርስቲ ኽትኾነና ተዋሂባትና” እናበሉ ይብሉ ኣለዉ። ²⁵ስለዙይ ከምዙይ በሎም፦ ጐይታ ኣቦ ከምዙይ ይብል ኣሎ፦ ስጋ ምስ ደሙ ትበልዑ፥ ኣዒንትኹም ናብ ጣዖታትኩም ተልዕሉ፥ ደም ድማ ተፍስሱ ኣለኹም፤ ነታ ምድሪ ኽትወርስዋዶ ኢኹም? ²⁶ኣብ ኣስይፍትኹም ትእመኑ፥ ፅያፍ ትገብሩ፥ ነፍሲ ወከፍኩም ድማ ምስ ሰበይቲ ብፃዩ ይዝሙ ኣለኹም፤ ነታ ምድሪዶ ደኣ ኽትወርስዋ ኢኹም?

²⁷ከምዙይ በሎም፦ ጐይታ ኣቦ ከምዙይ ይብል ኣሎ፦ “ህያው ከም ዝኾንኩ፥ እቶም ኣብ ዑናታት ዘለዉ ብሰይፊ ክወድቁ እዮም፤ ነቶም ኣብ ጎልጎል ዘለዉ ድማ ንኣራዊት ክበልዑ ኣሕሊፈ ክህቦም እየ፤ እቶም ኣብ ፅኑዕ ቦታን ኣብ በዓትታትን ዘለዉ ኸዓ ብመቕሰፍቲ ክሞቱ እዮም። ²⁸ነታ ምድሪ ዑናን ባዶን ክገብራ እየ፤ ሓይሊ ትዕቢታ ድማ ክውዳእ እዩ፤ እምባታት እስራኤል ክባድማ እየን፥ ብእአን ዝሓልፍ ድማ ኣይህሉን። ²⁹ሽዑ ብሰንኪ እቲ ዝገበርዎ ዅሉ ፅያፍ ነታ ምድሪ በረኻን ዑናን ምስ ገበርክዋ፥ ኣነ ኣቦኦም ምዃነይ ክፈልጡ እዮም።”

³⁰ንስኻ ኦ ወዲ ሰብ፥ ህዝብኻ ኣብ ጥቓ መናድቕን ኣብ ኣፍ ደገ ኣባይትን፥ ሓደ ምስ ካልእ፥ ነፍሲ ወከፍ ድማ ምስ ሓዉ ብዛዕባኻ ይዛረቡ ኣለዉ፤ “ንዑ እስኪ ካብ ኣቦና እንታይ ቃል ከም ዝመፅእ ስምዑ” ይብሉ ኣለዉ። ³¹ከምቲ ህዝቢ ዝገብሮ ናባኻ ይመፁ፥ ከም ህዝበይ ኣብ ቅድሜኻ ይቕመጡ፥ ቃላትካ ድማ ይሰምዑ፤ ግና ኣይገብርዎን። በኣፎም ፍቕሪ ይዛረቡ፥ ልቦም ግና ድሕሪ ረብሓኦም ይስዕቦ ኣሎ። ³²እንሆ፥ ንስኻ ናባታቶም ፅቡቕ ድምፂ ዘለዎን ብጥበብ ዝተወቕዐን መዝሙር ፍቕሪ ኢኻ፤ ቃላትካ ይሰምዑ፥ ግና ኣይገብርዎን። ³³ምስ መፀ ኸዓ፥ ብርግፅ ድማ ክመፅእ እዩ፥ ኣብ ማእኸሎም ነቢይ ከም ዝነበረ ክፈልጡ እዮም።