Ezekiel 33 FHB Father's Heart Bible™

33 ¹Amar Pitri laga kotha moi ke ahhise:

²“Manuh laga Putro, tumi laga manuh khan ke kobi aru tarkhan ke koi dibi: Jitia Moi ekta desh laga bhirodh te taroar anibo, hei desh laga manuh khan pora tarkhan majot pora ekjon manuh ke loi kene tarkhan laga pohora manuh bonabo, ³aru tai taroar desh laga bhirodh te aha dikhise aru manuh khan ke hoshiyar koribole bigul bajaise, ⁴tetiya jodi kunba manuh bigul laga awaj hunise kintu hoshiyar kotha ke mana nai, aru taroar ahhi kene tai ke loi loise, tai laga khoon tai nijor matha uporte thakibo. ⁵Tai bigul laga awaj hunise aru hoshiyar kotha ke mana nai; tai laga khoon tai uporte thakibo. Jodi tai hoshiyar kotha loise hoi, tai nijor jivon bachabo pare thakise. ⁶Kintu jodi pohora manuh taroar aha dikhise aru bigul bajua nai, aru manuh khan hoshiyar nathaki jaise, aru taroar ahhi kene tarkhan majot pora ekjon ke loi loise, hei ekjon tai nijor golti karone mori jabo, kintu Moi tai laga khoon pohora manuh laga hath pora hudibo.

⁷“Tumi, Manuh laga Putro, Moi Israel laga ghor karone ekjon pohora manuh bonaise. Jitia tumi Moi laga mukh pora kotha hunibo, Moi laga taraf pora tarkhan ke hoshiyar koribi.” ⁸Jitia Moi dusto manuh ke kobo, “Dusto manuh, tumi niscoi mori jabo,” aru tumi tai ke tai laga rasta pora ghuri jabole hoshiyar koribole kotha kowa nai, tai tai laga golti karone mori jabo, kintu Moi tai laga khoon karone tumi ke jimmedar koribo. ⁹Kintu jodi tumi dusto manuh ke tai laga rasta pora ghuri jabole hoshiyar koribo aru tai etu pora naghurile, tai tai laga paap karone mori jabo; tumi nijor jivon bachaise.

Ghuri Ahibi aru Jinda Thakibi

¹⁰“Aru tumi, Manuh laga Putro, Israel laga ghor ke kobi: Tumikhan eneka koi ase: “Amikhan laga golti aru amikhan laga paap amikhan uporte ase, aru amikhan etu bhitor te pochi ja ase. Amikhan kineka jinda thakibo?” ¹¹Tarkhan ke kobi: Moi jinda thaka nisina hosa, Probhu Pitri koi ase, Moi dusto manuh laga mrityu te khushi napai, kintu dusto manuh tai laga rasta pora ghuri jai kene jinda thaka te he khushi pai. Ghuri ahibi, tumikhan laga biya rasta khan pora ghuri ahibi! Israel laga ghor, tumikhan kele moribo?

¹²“Aru tumi, Manuh laga Putro, tumi laga manuh khan ke kobi: Dharmik manuh laga dharmikota tai ke tai bidroh kora din te nabachabo, aru dusto manuh laga biya kaam tai ke tai etu pora ghuri jua din te nagiribo; dharmik manuh tai laga dharmikota pora tai paap kora din te jinda thakibo napare. ¹³Jodi Moi dharmik manuh ke kobo, ‘Tumi niscoi jinda thakibo,’ aru tai nijor dharmikota te biswas kore aru biya kaam kore, tai laga dharmik kaam khan eku bhi yaad nathakibo; tai nijor kora biya kaam karone mori jabo. ¹⁴Jodi Moi dusto manuh ke kobo, “Tumi niscoi mori jabo,” aru tai nijor paap pora ghuri jai aru niyai aru thik kaam kore, ¹⁵jodi biya manuh bondhok loi kene thaka jinis wapas di dise, tai churi kora jinis bhi wapas kori dise, jivon laga niyom khan mani kene, eku biya na korise—tai niscoi jinda thakibo; tai namoribo. ¹⁶Tai kora ekta bhi paap tai bhirodh te yaad nathakibo. Tai niyai aru thik kaam korise; tai niscoi jinda thakibo.

¹⁷“Tumi laga manuh khan koi ase, “Probhu Pitri laga rasta thik nohoi”—kintu tarkhan nijor rasta he thik nohoi. ¹⁸Jitia dharmik manuh tai laga dharmikota pora ghuri jai aru biya kaam kore, tai etu karone mori jabo. ¹⁹Jitia dusto manuh tai laga biya pora ghuri jai aru niyai aru thik kaam kore, tai etu pora jinda thakibo. ²⁰Hoilebi tumikhan koi ase, “Probhu Pitri laga rasta niyai nohoi.” Israel laga ghor, Moi tumikhan sob ke tai nijor rasta hisab te bisar koribo.”

Jerusalem Giri Jaise

²¹Amikhan laga bondi thaka laga baro bosor te, dosta mohina te, pansta din te, Jerusalem pora polai aha ekjon manuh moi logot te ahhi kene koise, “Sheher tu giri jaise.” ²²Polai aha manuh napuncha agete laga saam te amar Pitri laga hath moi uporte thakise, aru phojur te hei manuh moi logot te naha agete amar Pitri moi laga mukh khuli dise. Moi laga mukh khuli dise, aru moi aru chup-chap thaka nai.

²³Tetiya amar Pitri laga kotha moi ke ahhise:

²⁴Manuh laga Putro, Israel laga desh te eitu bhanga jaga khan te thaka manuh khan eneka koi thake, “Abraham to ekjon manuh he thakise, hoilebi tai desh tu adhikar korise; amikhan to bisi ase—niscoi desh tu amikhan ke amikhan laga adhikar hisab te dise.” ²⁵Etu karone tarkhan ke kobi: Probhu Pitri koi ase: Tumikhan khoon logote gau-mangso khai, tumikhan laga murti khan phale suku uthai, aru khoon bohai—tumikhan desh tu adhikar koribo lage naki? ²⁶Tumikhan nijor taroar uporte bharosa kore, tumikhan ghin laga kaam kore, aru tumikhan sob manuh pora nijor usor manuh laga maiki logote bebichar kore—tetiya tumikhan desh tu adhikar koribo lage naki?

²⁷Tarkhan ke kobi: Probhu Pitri eneka koi ase: “Moi jinda thaka nisina hosa, bhanga jaga khan te thaka khan taroar pora giri jabo, khula kheti te thaka khan ke Moi jongli janwar khan ke khabole di dibo, aru gor jaga aru gufa khan te thaka khan mahamari pora mori jabo. ²⁸Moi desh tu ke ekta sunsan aru khali jaga bonabo; tai laga ghamondi laga takot khotom hobo; Israel laga pahar khan sunsan hoi thakibo, kun bhi etu para para najabo. ²⁹Tetiya tarkhan jani jabo Moi tarkhan laga Pitri ase, jitia Moi tarkhan kora sob ghin laga kaam khan karone desh tu ke khali jaga aru bhanga jaga bonabo.”

³⁰Tumi, Manuh laga Putro: tumi laga manuh khan dewar khan usorte aru ghor laga dorja khan te tumi laga kotha koi ase, ekjon logote dusra, sob manuh tai laga bhai logote: “Ahibi etiya, amar Pitri pora ki kotha ahe etu hunibi. ³¹Tarkhan manuh khan kora nisina tumi logote ahe, Moi laga manuh khan nisina tumi age te bohe, aru tumi laga kotha khan hune—kintu tarkhan etu uporte kaam nakore. Kilemane tarkhan laga mukh pora morom laga kotha koi, kintu tarkhan laga mon nijor labh laga piche bhag. ³²Sabi, tarkhan karone tumi ekta morom laga git nisina ase, sundor awaj te, bhal pora bajai diya; tarkhan tumi laga kotha khan hune kintu etu nakore. ³³Jitia etu hosa hoi jabo—aru etu niscoi hobo—tetiya tarkhan jani jabo tarkhan majot te ekjon bhabobadi thakise.”