5 Mose 5 FHB Father's Heart Bible™

5 ¹Mose frɛɛ Israel nyinaa ka kyerɛɛ wɔn se, “Israel, muntie mmara ne ahyɛde a meka gu mo asom nnɛ no. Monsua na monhwɛ yie nni so.” ²Yɛn Agya ne yɛn yɛɛ apam wɔ Horeb. ³Ɛnyɛ yɛn agyanom na yɛn Agya ne wɔn yɛɛ apam yi, na mmom yɛn—yɛn a yɛn nyinaa te ase wɔ ha nnɛ yi. ⁴Yɛn Agya ne mo kasaa anim ne anim wɔ bepɔ no so, fi ogya no mu.

⁵Saa bere no, migyinaa yɛn Agya ne mo ntam sɛ mɛka yɛn Agya asɛm akyerɛ mo, efisɛ musuroo ogya no, na moankɔ bepɔ no so. Ɔkae se:

⁶“Mene wʼAgya a miyii wo fii Misraim, nkoasom fi mu no.

⁷“Nni anyame foforo biara wɔ mʼanim.

⁸“Nyɛ ohoni biara mma wo ho, biribiara a ɛsɛ nea ɛwɔ soro wim, anaa nea ɛwɔ asase so wɔ fam, anaa nea ɛwɔ nsu a ɛwɔ asase ase no mu. ⁹Nkotow wɔn, na nsom wɔn, efisɛ me wʼAgya, meyɛ Agya a mekyi ninkunu, na mede agyanom bɔne to wɔn mma so kosi awo ntoatoaso a ɛtɔ so mmiɛnsa ne anan a wɔtan me no so, ¹⁰nanso mekyerɛ apam adɔe kosi awo ntoatoaso apem wɔ wɔn a wɔdɔ me na wodi mʼahyɛde so no so.

¹¹“Mfa wʼAgya din mmɔ kwa, efisɛ yɛn Agya remma obiara a ɔde ne din bɔ kwa no nkwati asotwe.

¹²“Di homeda no so, na fa yɛ kronkron, sɛnea wʼAgya ahyɛ wo no. ¹³Nnansia na fa yɛ adwuma, na yɛ wo nnwuma nyinaa, ¹⁴nanso da a ɛtɔ so ason no yɛ homeda ma wʼAgya. Nyɛ adwuma biara—wo, wo babarima anaa wo babea, wo akoa anaa wo afenaa, wo nantwi, wʼafurum anaa wo mmoa biara, anaa ɔhɔho a ɔwɔ wo nkurow mu no—sɛnea ɛbɛyɛ a wo akoa ne wʼafenaa bɛhome sɛ wo ara. ¹⁵Kae sɛ na woyɛ akoa wɔ Misraim, na wʼAgya de nsa a ɛyɛ den ne abasa a wateɛ no yii wo fii hɔ. Enti wʼAgya ahyɛ wo sɛ di homeda no so.

¹⁶“Di wʼagya ne wo na ni, sɛnea wʼAgya ahyɛ wo no, na wo nna awar, na asi wo yie wɔ asase a wʼAgya de rema wo no so.

¹⁷“Nni awu.

¹⁸“Nsɛe aware.

¹⁹“Nwia.

²⁰“Nni wo yɔnko ho adansekurumu.

²¹“Nnyɛ wo yɔnko yere ho ahopere. Nnyɛ wo yɔnko fi, nʼafuw, nʼakoa anaa nʼafenaa, ne nantwi, nʼafurum anaa biribiara a ɛyɛ wo yɔnko dea no ho anibere.”

²²Yɛn Agya kaa nsɛm yi kyerɛɛ mo nhyiamu no nyinaa wɔ bepɔ no so, fi ogya, omununkum ne sum kabii no mu, nne kɛse mu; wamfa biribiara amka ho. Ɔkyerɛw guu abo apon abien so de maa me. ²³Bere a mutee nne no fi sum no mu, na ogya redɛw wɔ bepɔ no so no, mobaa me nkyɛn—mo mmusuakuw ntuanofo ne mo mpanyimfo nyinaa,

²⁴na mokae se, “Hwɛ, yɛn Agya ada nʼanuonyam ne ne kɛseyɛ adi akyerɛ yɛn; yɛate ne nne fi ogya no mu. Nnɛ yɛahu sɛ yɛn Agya ne onipa kasa, na onipa no da so te ase. ²⁵Afei adɛn nti na ɛsɛ sɛ yewu? Ogya kɛse yi bɛhyew yɛn. Sɛ yɛkɔ so te yɛn Agya nne bio a, yebewu. ²⁶Hena na ɔwɔ adasamma nyinaa mu a wate Agya teasefo no nne sɛ ɔfi ogya mu kasa, sɛ yɛn, na ɔte ase? ²⁷Kɔ bɛn, tie nea yɛn Agya bɛka nyinaa, na afei ka nea yɛn Agya bɛka akyerɛ wo nyinaa kyerɛ yɛn, na yebetie, na yɛayɛ so.”

²⁸Yɛn Agya tee nsɛm a mokaa kyerɛɛ me no, na yɛn Agya ka kyerɛɛ me se, “Mate nsɛm a nnipa yi ka kyerɛɛ wo no. Nea wɔkae nyinaa yɛ papa. ²⁹Ao, sɛ anka wɔkura saa koma yi—wosuro me, na wodi mʼahyɛde nyinaa so daa—sɛnea ɛbɛyɛ a ɛbɛsi wɔn ne wɔn mma yie daa nyinaa! ³⁰Kɔ ka kyerɛ wɔn se, ‘Monsan nkɔ mo ntamadan mu.’ ³¹Nanso wo de, gyina ha wɔ me nkyɛn, na mɛka ahyɛde no nyinaa akyerɛ wo—mmara ne atemmu no—a ɛsɛ sɛ wokyerɛ wɔn, sɛnea ɛbɛyɛ a wɔbɛdi so wɔ asase a mede rema wɔn sɛ wɔnfa no so.”

³²Enti monhwɛ yie nyɛ sɛnea mo Agya ahyɛ mo no; mommman nkɔ nifa anaa benkum. ³³Monnantew ɔkwan a mo Agya ahyɛ mo no nyinaa so, na moanya nkwa, na asi mo yie, na mo nna awar wɔ asase a mobɛfa no so.