Detewonòm 5 FHB Father's Heart Bible™

5 ¹Moyiz rele tout pèp Izrayèl la, li di yo: “Koute, Izrayèl, lòd ak règleman m'ap di nan zòrèy nou jòdi a. Aprann yo, epi fè atansyon pou nou swiv yo.” ²Papa nou te pase yon kontra avèk nou bò Mòn Orèb. ³Se pa avèk zansèt nou yo Papa nou te pase kontra sa a, men avèk nou, nou tout ki vivan isit la jòdi a. ⁴Papa nou te pale avèk nou fas pou fas sou mòn lan, nan mitan dife a.

⁵Lè sa a, mwen menm, mwen te kanpe nan mitan Papa nou ak nou pou m te fè nou konnen pawòl Papa nou, paske nou te pè dife a, nou pa t moute sou mòn lan. Li di:

⁶“Se mwen menm ki Papa nou, mwen menm ki te fè nou soti nan peyi Lejip, kote nou te esklav la.

⁷“Piga nou gen lòt bondye pase mwen.

⁸“Piga nou fè ankenn estati, ni ankenn pòtre bagay ki nan syèl anwo a, ni sou latè anba a, ni nan dlo ki anba tè a. ⁹Piga nou bese tèt devan yo, piga nou sèvi yo, paske mwen menm, Papa nou, mwen se yon Papa ki fè jalouzi. Lè yon papa fè sa ki mal, m'ap pini pitit li yo, jouk sou twazyèm ak katriyèm jenerasyon moun ki rayi m yo, ¹⁰men m'ap moutre renmen ki p'ap janm sispann pou mil jenerasyon moun ki renmen m, ki kenbe kòmandman mwen yo.

¹¹“Piga nou sèvi mal ak non Papa nou, paske Papa nou p'ap kite moun ki sèvi mal ak non li a san pini.

¹²“Respekte jou repo a pou nou ka mete l apa, jan Papa nou te kòmande nou an. ¹³Pandan sis jou, n'a travay, n'a fè tout travay nou, ¹⁴men setyèm jou a se jou repo pou Papa nou. Piga nou fè ankenn travay — ni nou menm, ni pitit gason nou, ni pitit fi nou, ni domestik gason ou fi nou yo, ni bèf nou, ni bourik nou, ni ankenn nan bèt nou yo, ni etranje k'ap viv nan lavil nou yo — konsa domestik gason ak domestik fi nou yo va ka pran repo menm jan avèk nou. ¹⁵Chonje nou te esklav nan peyi Lejip, epi Papa nou te fè nou soti la ak yon men fò ak yon bra lonje. Se poutèt sa Papa nou te kòmande nou pou nou respekte jou repo a.

¹⁶“Respekte papa nou ak manman nou, jan Papa nou te kòmande nou an, pou nou ka viv lontan, pou tout bagay ka mache byen pou nou nan peyi Papa nou ap ban nou an.

¹⁷“Piga nou touye moun.

¹⁸“Piga nou fè adiltè.

¹⁹“Piga nou vòlò.

²⁰“Piga nou fè fo temwayaj sou frè parèy nou.

²¹“Piga nou pote lanvi sou madanm frè parèy nou. Piga nou anvi kay frè parèy nou, ni jaden li, ni domestik gason ou fi li, ni bèf li, ni bourik li, ni ankenn nan sa ki pou frè parèy nou.”

²²Men pawòl Papa nou te di tout asanble nou an sou mòn lan, nan mitan dife a, nan nway la, nan gwo fènwa a, ak yon vwa byen fò; li pa t ajoute anyen ankò. Li te ekri yo sou de wòch plat, li ban mwen yo. ²³Lè nou te tande vwa a soti nan fènwa a, pandan mòn lan t'ap boule nan dife, nou te vin jwenn mwen — nou tout, chèf branch fanmi nou yo ak chèf fanmi nou yo,

²⁴nou di: “Gade, Papa nou fè nou wè glwa li ak grandè li; nou tande vwa li soti nan dife a. Jòdi a, nou wè Papa nou pale avèk yon moun, epi moun sa a rete vivan toujou. ²⁵Koulye a, poukisa pou nou mouri? Gwo dife sa a pral boule nou nèt. Si nou kontinye tande vwa Papa nou ankò, n'ap mouri. ²⁶Ki moun pami tout lèzòm ki janm tande vwa Papa vivan an k'ap pale nan mitan dife a, menm jan ak nou, epi ki rete vivan? ²⁷Pwoche, koute tou sa Papa nou di, apre sa w'a vin di nou tou sa Papa nou di ou, epi n'a koute, n'a obeyi.”

²⁸Papa nou te tande pawòl nou te di m yo, epi Papa nou di m: “Mwen tande pawòl pèp sa a di ou. Tout sa yo di a bon. ²⁹Si sèlman yo te ka kenbe kè sa a — pou yo gen krentif pou mwen, pou yo kenbe tout kòmandman mwen yo tout tan — konsa tout bagay t'a mache byen pou yo ak pitit yo pou tout tan! ³⁰Ale di yo: ‘Tounen al nan tant nou yo.’ ³¹Men ou menm, rete kanpe la avèk mwen, m'a di ou tout kòmandman an — lòd yo ak règleman yo — pou ou moutre yo, pou yo ka swiv yo nan peyi m'ap ba yo pou yo pran pou yo a.”

³²Se poutèt sa, veye pou nou fè jan Papa nou te kòmande nou an; pa vire ni adwat ni agoch. ³³Mache nèt nan chemen Papa nou te kòmande nou an, pou nou ka viv, pou tout bagay mache byen pou nou, pou nou ka viv lontan nan peyi nou pral pran pou nou an.