መዝሙር ፍቕሪ ብዛዕባ ወይኒ

እቲ መዝሙር ከም መዝሙር ፍቕሪ ይመስል፥ ክሳዕ ኣቦና እቲ ወናኒ ወይኒ ገና እንታይ ክገብር ይኽእል ከም ዝነበረ ዝሓትት። ፍርዲ ተፀበየ፥ ፈሳሲ ደም ግና ረኸበ። ሽዱሽተ ወይለ ይስዕብ፥ ደሓር ሰራዊት ተፀዊዑ ይመፅእ፥ ፀልማት ከዓ ነታ ምድሪ ይኽድና።

ምዕራፍ 5።

ሕዚ ነቲ ዘፍቅሮ፥ ብዛዕባ ወይኑ መዝሙር ፍቑረይ ክዝምረሉ። ፍቑረይ ኣብ ኣዝዩ ልሙዕ ጐቦ ወይኒ ነበሮ። ኰዓቶ፥ ኣእማን ከዓ ኣልዒሉ፥ ምሩፅ ተኽሊ ወይኒ ድማ ተኸለ። ኣብ ማእኸሉ ግምቢ ሰርሐ፥ መፅመቚ ወይኒ ድማ ኣብኡ ኰዓ። ፅቡቕ ወይኒ ኽፈሪ ኸዓ ተፀበየ፥ ንሱ ግና ሕማቕ ወይኒ ጥራሕ ፈረየ።

“ሕዚ ድማ ኣቱም ኣብ ኢየሩሳሌም እትነብሩ፥ ኣቱም ህዝቢ ይሁዳውን፥ ኣብ መንጎይን ኣብ መንጎ ወይነይን ፍረዱ። ንወይነይ ዝግበር ገና እንታይ ነበረ፥ ኣነ ኣብኡ ዘይገበርክዎ? ፅቡቕ ወይኒ ኽፈሪ እናተፀበኹ ስለምንታይ ሕማቕ ወይኒ ጥራሕ ፈረየ? ሕዚ ድማ ንወይነይ እንታይ ክገብሮ ኸም ዝኾንኩ ክነግረኩም፦ ሓፁሩ ከልዕል እየ፥ ክብላዕ ድማ እዩ፤ መናድቑ ኸፍርስ እየ፥ ክርገፅ ድማ እዩ። በረኻ ክገብሮ እየ፤ ኣይኽረትን ኣይምሕሰውን እዩ፤ ኣሜከላን እሾኽን ከዓ ኣብ ልዕሊኡ ክበቍል እዩ። ነቲ ደመና ድማ ኣብ ልዕሊኡ ዝናም ከይዘንም ክእዝዝ እየ።”

ወይኒ ኣቦ ሰራዊት ሰማይ ቤት እስራኤል እዩ እሞ፥ ህዝቢ ይሁዳ ድማ እቲ ዝፈትዎ ተኽሉ እዮም። ፍርዲ ተፀበየ፥ ፈሳሲ ደም ግና ረኸበ፤ ፅድቂ ተፀበየ፥ ኣውያት ግና ሰምዐ። ^a

ወይለኦም ነቶም ንምድሪ ዝህርፉ

ወይለኦም ነቶም ቤት ኣብ ቤት ዝውስኹ፥ ግራት ኣብ ግራት ዘተኣሳስሩ፥ ክሳዕ ዝተርፍ ስፍራ ዘይህሉ፥ ኣብ ማእኸል እታ ምድሪ ድማ በይንኹም ክሳዕ እትቕመጡ።

ኣቦ ሰራዊት ሰማይ ክምሕል ብእዝነይ ሰሚዐ፦ “ብርግፅ ብዙሓት ኣባይቲ ክባድማ እየን፥ እተን ዓበይትን ፅቡቓትን ድማ ዝነብረን ዘይብለን ክተርፋ እየን።

ዓሰርተ ቍራፅ ምድሪ ወይኒ ኣስታት ሽዱሽተ ሊትሮ ወይኒ ጥራሕ ክህብ እዩ፥ ዓሰርተ መሶብ ዘርኢ ድማ ሓደ መሶብ እኽሊ ጥራሕ ክህብ እዩ።”

ወይለኦም ነቶም ኣንጊሆም ዝትስኡ፥ ብርቱዕ መስተ ኽስዕቡ፥ ወይኒ ክሳዕ ዘንድዶም ድማ ክሳዕ ምሸት ዝፀንሑ። ኣብ ድግሳቶም መሰንቆን በገናን፥ ከበሮን እምብልታን ወይንን ኣሎ፤ ንግብሪ ኣቦና ግና ኣየስተውዕሉን፥ ንስራሕ ኢዱ ድማ ኣይርእዩን። ስለዙይ ህዝበይ ብሰኣን ፍልጠት ናብ ምርኮ ይኸዱ ኣለዉ፤ ክቡራቶም ጠምዮም፥ ተራ ህዝቢ ድማ ብፅምኢ ነቒፆም። ስለዙይ ሲኦል ሃረርታኣ ኣግፊሓ ኣፋ ርሕው ኣቢላ፥ ግርማኣን ህዝባን፥ ወኻዕታኣን ኵሎም እቶም ብኣኣ ዝሕጐሱን ድማ ይወርዱ። ስለዙይ ሰብ ትሕት ይብል፥ ነፍሲ ወከፍ ሰብ ድማ ይድቀቕ፥ ዕቡይ ኣዒንቲ እቶም ዕቡያት ከዓ ለጥ ይብላ። ኣቦ ሰራዊት ሰማይ ግና ብፍርዲ ልዕል ይብል፥ ቅዱስ ኣቦና ድማ ብፅድቂ ይቕደስ። ሽዑ ኣባጊዕ ከም ኣብ መጓሰዪኤን ክውፈራ እየን፤ ጓኖት ድማ ኣብ ማእኸል ዑና ሃብታማት ክምገቡ እዮም።

ወይለኦም ነቶም ንኣበሳኦም ብገመድ ሓሶት፥ ንሓጢኣቶም ድማ ከም ብገመድ ዓረብያ ዝስሕቡ፥ ነቶም ከምዙይ ዝብሉ፦ “ይቀላጠፍ፤ ነቲ ግብሩ የቀላጥፎ፥ ምእንቲ ኽንርእዮ። ምኽሪ ቅዱስ እስራኤል ይቕረብ፥ ይምፃእ ድማ፥ ምእንቲ ኽንፈልጦ።” ^b

ወይለኦም ነቶም ንክፉእ ፅቡቕ፥ ንፅቡቕ ድማ ክፉእ ዝብሉ፥ ንፅልመት ብርሃን፥ ንብርሃን ድማ ፅልመት ዝብሉ፥ ንመሪር ጥዑም፥ ንጥዑም ድማ መሪር ዝብሉ። ወይለኦም ነቶም ኣብ ገዛእ ዓይኖም ጥበበኛታት፥ ኣብ ቅድሚ ርእሶም ድማ ለባማት ዝኾኑ። ወይለኦም ነቶም ወይኒ ኣብ ምስታይ ጀጋኑ፥ ብርቱዕ መስተ ኣብ ምሕዋስ ድማ ሓያላት ዝኾኑ፥ ነቶም ንበዳሊ ብጉቦ ዝምሕሩ፥ መሰል ንፁህ ድማ ዝምንዝዑ፥

ስለዙይ ከምቲ መልሓስ ሓዊ ንሓሰር ዝበልዕ፥ ንቑፅ ሳዕሪ ድማ ኣብ ሃልሃልታ ዝሓርር፥ ከምኡ ሱሮም ክነቅዝ፥ ዕምበባኦም ድማ ከም ተጎዝ ክብተን እዩ፤ ንሕጊ ኣቦ ሰራዊት ሰማይ ነፂጎም፥ ንቓል ቅዱስ እስራኤል ድማ ንዒቖም እዮም እሞ። ስለዙይ ቝጥዓ ኣቦና ኣብ ልዕሊ ህዝቡ ነደደ፤ ኢዱ ኣብ ልዕሊኦም ዘርጊሑ ድማ ወቕዖም። እምባታት ተናውፁ፤ ሬሳታቶም ከዓ ኣብ ኣደባባያት ከም ጎሓፍ ኮነ። ምስ እዙይ ኵሉ ግና ቝጥዓኡ ኣይተመለሰን፤ ኢዱ ኸዓ ገና ዝርግሕቲ እያ።

ነቶም ኣህዛብ ምልክት ከልዕለሎም፥ ካብ ወሰን ምድሪ ድማ ፊሽ ከብለሎም እዩ፤ ቀልጢፎም ብኡብኡ ድማ ይመፁ። ካብኣቶም ሓደ እኳ ኣይደክምን ኣይዕንቀፍን፤ ሓደ እኳ ኣይድንግፅን ኣይድቅስን፤ ዕጣቕ ሕቘኦም ኣይፍታሕን፥ ስራኽ ኣሳእኖም ድማ ኣይበተኽን። ፍላጻታቶም ስሉት እዩ፥ ኵሉ ኣቕስቶም ድማ ተገቲሩ ኣሎ፤ ሸኰና ኣፍራሶም ከም ኰዅሒ ይመስል፥ መንኰራዅሮም ድማ ከም ንፋስ ኣውሎ እዩ። ግዝማኦም ከም ኣንበሳ እዩ፤ ከም ሽደን ኣንበሳ ይጓዝሙ። ይጉምጉሙ፥ ንግዳይ ይሕዙ፥ ይወስድዎ ድማ፤ ነቲ ዝተማረኸ ዘናግፍ ከዓ የለን። በታ መዓልቲ እቲኣ ኣብ ልዕሊኡ ከም ሃምሃምታ ባሕሪ ክጉምጉሙ እዮም። ናብ ምድሪ እንተ ጠመትካ ድማ፥ ፅልመትን ጭንቅን ጥራሕ ኣሎ፤ እቲ ብርሃን እኳ ብደመናኡ ይፀልምት።