Philippinao 1

1 ¹Khrista Jishuwui raobing Paul kala Timothy inina, Philippili khalei Khrista Jishuwui lungli khalei katharabing saikorali, yangkhamebing kala deaconbing zangda kagapina: ²Ithumwui Avā kala Proho Jishu Khristana nathumli lukhamashan kala chingri kahai miranu.

Paokaphāli Ngasotnaobingwui vang Ningkashi

³Nathumli phaningung kachiva̱li iwui Avāli ningkashi michinga, ⁴seihā kasā kachiva̱li nathum saikorawui vang khamathān eina atam kachida seihā sāda, ⁵khare zimiksho eina ara eina tangda paokaphāli nathumwui ngasokhami chiwui vang ina ningkashi mi. ⁶Hikathā tui hi ina chihana: nathumwui alungli kaphā ot haokaphok a china Khrista Jishuwui zimiksho eina tangda chi kashungmei khavai sāra. ⁷Nathumwui vang hikathā ningkakhui hi iwui vang mashunga, kaja nathumli iwuklungli haichinga, iwui chaiyāng eina kala paokaphāwui vang nganing kala chi phongshok khavaili nathum saikora ili lukhamashanli ngasokapama. ⁸Kaja Khrista Jishuwui khamashit sikafa eina nathum saikorali ina kayākha ningchāngkhala kaji hili ithumwui Avā iwui shākhina.

⁹Hi iwui seihā kasāna: nathumwui leikashi chi thangkhamei kala theishingkakhui saikora eina mataisangmamānda leiranu, ¹⁰chieina nathumna mathāmeikap kaji chi phākhui shapra, kala Khristawui zimiksho eina tangda tharzā kala shāt makāda leira. ¹¹Ithumwui Avāwui tekhamatei kala masotwui vang, Jishu Khristawui mangā eina khamashung khangarongwui athei eina pemtinghaira.

Paokaphāli Muivā Ngasak Chaiyāngbing

¹²Ivānaobing, ina nathumli theingasakkhangaina, kaja iwui leikahai hina kachangkhatta paokaphā muivai ngasakhaira, ¹³chieina Khristawui vang iwui chaiyāng hi awungawui shipai katonga kala mi kateibing saikorali theisera. ¹⁴Ivānaobing kachungkhana iwui chaiyāng eina Proholi chihanahaoda, ara mathānthathup maleila malung pingmeida tui chi hānga. ¹⁵Kachangkhatta kaikhana mikpaikashi kala kharar eina Khrista hāshoka, kha kaikhana kaphā ningngai eina hāshoka. ¹⁶Hibing china leikashi eina sā, kaja paokaphāwui vang nganing khavai ili phākahaina da athumna thei. ¹⁷Khangateibing china ichichāwui kaphaning eina, ningkathar maleila, iwui chaiyāng eina ili kakhanang khuishokmi khavai phaningda Khristali vaosanga.

¹⁸Chithākha khikhala? Apong kachiva̱li, sākhaninga einala khamashung einala, Khrista hāshoka kaji himāngna, kala chili ina ringphai. Mha, ina ringphāchingra. ¹⁹Kaja nathumwui seihā kasā kala Jishu Khristawui Manglāwui khangachon eina hi iwui huikhami ngasāra da ina thei. ²⁰Iwui malungchang ningkashai kala kachihāna: ina kakhayak masamphangmara, kha malung pingmeida eina, aruihon atam kachida thada, mirin einala kathi einala, iwui phasāli Khrista sochikat samphangra.

²¹Kaja iwui vanga, kharing chi Khristana, kala kathi chi tongkazāna. ²²Iphasāli ina ringchingakha, hi iwui vang athei mathei kaji ot samphangra. Thalala khi chi kapangkhui khavākhala ina matheimana. ²³Khanini hi angachaili ina leichingda, ina ngakarthuida Khristali ngaso khavai sāngai, kaja chi chāng phāmeiya, ²⁴kha nathumwui vang eina phasāli ina leiching chi chāng khamataiyana. ²⁵Hi ina shitsangchao eina, nathumwui shitkasangli huikhui kala khamathānwui vang ina leichingda nathum saikorali ngasopamra da ina thei, ²⁶chithākha ina nathumwuili rāluiakha, iwui vang eina nathumwui langso Khrista Jishuli mataisangra.

Paokaphāwui Kanā Nganinga

²⁷Khristawui paokaphāwui khangaruma mirin chimāng ringlu, chithākha ina nathumwuili rālala, ina makapamlala, nathum manglā akhali nganingtitta, paokaphāwui shitkasangwui vang ning akha eina ngasoda hotnārumda lei kaji ina shāra, ²⁸kala nathumwui yangkashebingli khikhikhawui vang mangacheela; chi athumli athumwui sākashimānwui shākhina, kha nathumwui huikhamiwui, kala chi ithumwui Avāwui eina kharāna. ²⁹Kaja Khristawui vang eina, ali shitsang khavaimāng maningla, kha awui vang kachotkachāng phung khavaila, nathumli lumashanmida mihaira, ³⁰khangarar ava̱va̱ chi phungda, chi nathumna ili phungda theipai, kala ara ina aruihon phungchingda lei kaji nathumna shā.