ፊልጵስዩስ 1

1 ¹የክርስቶስ ኢየሱስ አገልጋዮች የሆኑ ጳውሎስና ጢሞቴዎስ፤ በፊልጵስዩስ ለሚገኙ በክርስቶስ ኢየሱስ ላሉ ቅዱሳን ሁሉ፣ ከኤጲስ ቆጶሳትና ከዲያቆናት ጋር፦ ²ከአባታችንና ከጌታ ኢየሱስ ክርስቶስ ጸጋና ሰላም ለእናንተ ይሁን።

ስለ ወንጌል አጋሮች ምስጋና

³ባስታወስኋችሁ ጊዜ ሁሉ አባቴን አመሰግናለሁ፤ ⁴ሁልጊዜ በጸሎቴ ሁሉ ስለ እናንተ ሁሉ በደስታ እየጸለይሁ ነው፤ ⁵ይህም ከመጀመሪያው ቀን ጀምሮ እስከ አሁን ድረስ በወንጌል ባላችሁ ኅብረት ምክንያት ነው። ⁶ይህንኑ ነገር እርግጠኛ ነኝ፤ በእናንተ መልካሙን ሥራ የጀመረው እስከ ክርስቶስ ኢየሱስ ቀን ድረስ ይፈጽመዋል። ⁷ስለ እናንተ እንዲህ ማሰቤ ተገቢ ነው፤ በልቤ ይዤአችኋለሁና። ሁላችሁም በሰንሰለቴ፣ ወንጌልንም በመከላከልና በማጽናት፣ በጸጋ ከእኔ ጋር ተካፋዮች ናችሁ። ⁸ሁላችሁንም በክርስቶስ ኢየሱስ ጥልቅ ፍቅር እንዴት እንደምናፍቃችሁ አባታችን ምስክሬ ነውና።

⁹ጸሎቴም ይህ ነው፤ ፍቅራችሁ በዕውቀትና በማስተዋል ሁሉ ከጊዜ ወደ ጊዜ አብዝቶ እንዲበዛ፤ ¹⁰ይህም የሚበልጠውን ነገር ለይታችሁ ማወቅ እንድትችሉ፣ እስከ ክርስቶስ ቀን ድረስ ንጹሓንና ነውር የሌለባችሁ ሆናችሁ ትኖሩ ዘንድ ነው። ¹¹በኢየሱስ ክርስቶስ በኩል በሚገኘው የጽድቅ ፍሬ ተሞልታችሁ፣ ለአባታችን ክብርና ምስጋና ይሆን ዘንድ ነው።

ወንጌልን የሚያስፋፉ ሰንሰለቶች

¹²ወንድሞችና እኅቶች ሆይ፤ የደረሰብኝ ነገር ይልቁንም ወንጌልን ለማስፋፋት እንደ ሆነ ታውቁ ዘንድ እወዳለሁ፤ ¹³ስለዚህ ስለ ክርስቶስ የታሰርሁ መሆኔ በመላው የቤተ መንግሥት ዘበኛና በሌሎች ሁሉ ዘንድ ታወቀ። ¹⁴ከወንድሞችና ከእኅቶች አብዛኞቹ በሰንሰለቴ ምክንያት በጌታ ተረጋግተው፣ ቃሉን ያለ ፍርሃት ለመናገር አሁን ይበልጥ ይደፍራሉ። ¹⁵አንዳንዶች በእርግጥ ከቅናትና ከፉክክር የተነሣ ክርስቶስን ይሰብካሉ፤ ሌሎች ግን ከበጎ ፈቃድ የተነሣ ይሰብካሉ። ¹⁶እነዚህ ወንጌልን ለመከላከል እንደ ተሾምሁ አውቀው ከፍቅር የተነሣ ያደርጉታል። ¹⁷እነዚያ ግን በሰንሰለቴ ላይ መከራ ሊጨምሩብኝ እያሰቡ፣ ከራስ ወዳድነት የተነሣ፣ ያለ ቅንነት ክርስቶስን ይሰብካሉ።

¹⁸ታዲያ ምን ይሆናል? በማስመሰል ቢሆን ወይም በእውነት፣ ክርስቶስ በማናቸውም መንገድ ይሰበካል፤ በዚህም ደስ ይለኛል። አዎን፣ ደስ መሰኘቴን እቀጥላለሁ። ¹⁹ይህም በጸሎታችሁና በኢየሱስ ክርስቶስ መንፈስ እርዳታ ለመዳኔ እንዲሆን ዐውቃለሁና። ²⁰የጽኑ ናፍቆቴና ተስፋዬም ይህ ነው፤ በምንም ፈጽሞ አላፍርም፤ ነገር ግን ሁልጊዜ እንደ ሆነ አሁንም በፍጹም ድፍረት፣ በሕይወት ቢሆን ወይም በሞት፣ ክርስቶስ በሰውነቴ ይከብራል።

²¹ለእኔ መኖር ክርስቶስ፣ መሞትም ትርፍ ነውና። ²²በሥጋ መኖርን ብቀጥል፣ ይህ ፍሬያማ ሥራ ይሆንልኛል። ነገር ግን የትኛውን እንደምመርጥ አላውቅም። ²³በሁለቱ መካከል ተወጥሬአለሁ፤ ልሄድና ከክርስቶስ ጋር ልሆን እመኛለሁ፤ ይህ እጅግ የተሻለ ነውና፤ ²⁴ነገር ግን በሥጋ መቅረቴ ስለ እናንተ ይበልጥ አስፈላጊ ነው። ²⁵ይህንም ስለ ተረዳሁ፣ ለእናንተ እድገትና በእምነት ለሆነ ደስታችሁ፣ እንደምኖርና ከሁላችሁም ጋር እንደምቆይ ዐውቃለሁ፤ ²⁶ይህም እንደ ገና ወደ እናንተ በመጣሁ ጊዜ፣ በእኔ ምክንያት በክርስቶስ ኢየሱስ የምትመኩበት ትምክህታችሁ አብዝቶ እንዲበዛ ነው።

ለወንጌል በሚገባ መኖር

²⁷ብቻ ለክርስቶስ ወንጌል በሚገባ ኑሩ፤ ይህም መጥቼ ባያችሁ ወይም ርቄ ብኖር፣ በአንድ መንፈስ ጸንታችሁ እንደምትቆሙ፣ ለወንጌል እምነት በአንድ ልብ ሆናችሁ አብራችሁ እንደምትጋደሉ እንድሰማ ነው፤ ²⁸በተቃዋሚዎቻችሁም ምንም ሳትፈሩ፤ ይህም ለእነርሱ የጥፋታቸው፣ ለእናንተ ግን የመዳናችሁ ምልክት ነው፤ ይህም ከአባታችን ነው። ²⁹ስለ ክርስቶስ፣ በእርሱ ማመን ብቻ ሳይሆን ስለ እርሱ መከራ መቀበልም በጸጋ ተሰጥቷችኋልና፤ ³⁰በእኔ ያያችሁትን፣ አሁንም እንዳለብኝ የምትሰሙትን ያንኑ ተጋድሎ እያሳለፋችሁ ነው።