腓立比書 1

1 ¹保羅同提摩太,基督耶穌嘅僕人,寫信俾喺腓立比、喺基督耶穌入面嘅眾聖徒,連埋眾監督同執事: ²願恩惠同平安,由我哋嘅父同主耶穌基督賜俾你哋。

為福音嘅同工感恩

³我每次諗起你哋,都感謝我嘅父, ⁴我每次禱告,都係歡歡喜喜噉為你哋眾人祈求, ⁵因為你哋由頭一日到而家,都同我一齊喺福音上有分。 ⁶我深信一件事:嗰位喺你哋裏面開始咗善工嘅,必定會做到完滿,直到基督耶穌嘅日子。 ⁷我對你哋有噉嘅感受係應該嘅,因為我心裏面掛住你哋。無論係我坐監,定係我為福音辯護、確立福音嘅時候,你哋眾人都同我一齊有分於恩典。 ⁸我哋嘅父可以為我作證,我係點樣以基督耶穌嘅深情去想念你哋眾人。

⁹我噉樣禱告:願你哋嘅愛越嚟越滿溢,而且有知識同各樣嘅洞察力, ¹⁰叫你哋可以分辨乜嘢係最好嘅,保持純潔無可指摘,直到基督嘅日子, ¹¹藉住耶穌基督結滿義嘅果子,使我哋嘅父得榮耀同讚美。

令福音興旺嘅鎖鏈

¹²弟兄姊妹,我想你哋知道,我所遭遇嘅事實在令福音更加興旺, ¹³以致我為基督所受嘅鎖鏈,喺成隊御林軍同其他所有人當中都出咗名。 ¹⁴而且大部分弟兄姊妹,因為我坐監,反而喺主裏面有信心,越發放膽,毫無懼怕噉傳講神嘅道。 ¹⁵固然有啲人傳基督係出於嫉妒同爭競,但亦都有人係出於好意。 ¹⁶呢啲人係出於愛心,知道我係奉命為福音辯護嘅。 ¹⁷嗰啲人傳基督卻係出於自私嘅野心,唔真誠,以為噉樣可以喺我坐監嘅時候令我更加難受。

¹⁸咁又點呢?無論係假意定係真心,基督到底俾人傳開咗,單憑呢一樣,我就歡喜。係,我仲要繼續歡喜, ¹⁹因為我知道,藉住你哋嘅禱告同耶穌基督嘅靈嘅幫助,呢件事必定令我得到拯救。 ²⁰我熱切噉期待同盼望:我永遠唔會蒙羞,反而放膽,無論而家定係一向噉樣,或生或死,基督都要喺我身上得着讚美。

²¹因為對我嚟講,活着就係基督,死咗就有得益。 ²²如果我要繼續喺肉身度生活,噉就係我可以結果子嘅工作。但係我唔知道應該揀邊樣。 ²³我喺兩者之間為難:我情願離世,同基督喺埋一齊,因為呢樣好得多; ²⁴不過為咗你哋,我留喺肉身度就更加需要。 ²⁵我既然有噉嘅把握,就知道自己會繼續留低,同你哋眾人喺埋一齊,叫你哋喺信心上有長進、有喜樂, ²⁶噉我再嚟到你哋當中嘅時候,你哋喺基督耶穌裏面因我而有嘅誇耀,就可以更加滿溢。

行事對得住福音

²⁷你哋只管要行事對得住基督嘅福音,咁樣,無論我嚟見你哋,定係唔喺度,都可以聽到你哋站立得穩,同心合意,一齊為福音嘅信仰奮鬥, ²⁸凡事都唔畏懼你哋嘅敵人。噉就俾佢哋睇到佢哋沉淪嘅憑據,亦係你哋得救嘅憑據,而呢一切都係出於我哋嘅父。 ²⁹因為你哋蒙恩,唔單止為基督信靠佢,仲要為佢受苦, ³⁰你哋所經歷嘅,同你哋見過我所受嘅、而家又聽見我仍然喺度經歷嘅,係同一場爭戰。