ኤፌሶን 6

6 ¹ልጆች ሆይ፤ በጌታ ለወላጆቻችሁ ታዘዙ፤ ይህ ተገቢ ነውና።

²“አባትህንና እናትህን አክብር” (ይህ የተስፋ ቃል ያለው የመጀመሪያው ትእዛዝ ነው)፣ ³“ይህም መልካም እንዲሆንልህ፣ በምድር ላይም ረጅም ዕድሜ እንድትኖር ነው።”

⁴አባቶች ሆይ፤ ልጆቻችሁን አታስቈጧቸው፤ ነገር ግን በጌታ ተግሣጽና ምክር አሳድጓቸው።

⁵ባሪያዎች ሆይ፤ ክርስቶስን እንደምትታዘዙት፣ በቅን ልብ ከፍርሃትና ከመንቀጥቀጥ ጋር ምድራዊ ጌቶቻችሁን ታዘዙ። ⁶ሰዎችን ለማስደሰት ዐይን ባያችሁ ጊዜ ብቻ ሳይሆን፣ የአባታችንን ፈቃድ ከልብ የምታደርጉ የክርስቶስ ባሪያዎች እንደ መሆናችሁ፣ ⁷ለሰዎች ሳይሆን ለጌታ እንደምታገለግሉ፣ በበጎ ፈቃድ አገልግሉ፤ ⁸ባሪያም ሆነ ጨዋ፣ እያንዳንዱ ያደረገውን መልካም ነገር ከጌታ እንደሚመለስለት ታውቃላችሁና።

⁹ጌቶች ሆይ፤ እናንተም እንዲሁ አድርጉላቸው፤ ማስፈራራትን ተዉ፤ የእነርሱና የእናንተ ጌታ በሰማይ እንዳለ፣ እርሱም አድልዎ እንደሌለበት ታውቃላችሁና።

የአባታችን ሙሉ የጦር ዕቃ

¹⁰በመጨረሻም፣ በጌታና በኀይሉ ብርታት የበረታችሁ ሁኑ። ¹¹የዲያብሎስን ተንኰል ትቃወሙ ዘንድ የአባታችንን ሙሉ የጦር ዕቃ ልበሱ። ^a a v11 እዚህ የተገለጸው የጦር ዕቃ የወታደሩ የራሱ አይደለም፤ ለጦርነቱ ቀን ለልጆቹ የተሰጠ የአባታችን ገዛ ራሱ የጦር ዕቃ ነው እንጂ። ¹²ትግላችን ከሥጋና ከደም ጋር ሳይሆን፣ ከአለቆችና ከሥልጣናት ጋር፣ ከዚህ የአሁኑ ጨለማ ዓለም ኀይላት ጋር፣ በሰማያዊ ስፍራ ካሉ ክፉ መናፍስት ኀይላት ጋር ነው። ¹³ስለዚህ በክፉው ቀን ልትቋቋሙ ትችሉ ዘንድ፣ ሁሉንም ከፈጸማችሁ በኋላም ጸንታችሁ ትቆሙ ዘንድ የአባታችንን ሙሉ የጦር ዕቃ ልበሱ። ¹⁴እንግዲህ የእውነትን መታጠቂያ በወገባችሁ ታጥቃችሁ፣ የጽድቅንም ጥሩር ለብሳችሁ ቁሙ፤ ¹⁵ለእግራችሁም ከሰላም ወንጌል የሚገኘውን ዝግጁነት ተጫምታችሁ ቁሙ። ¹⁶በሁሉም ሁኔታ፣ የክፉውን የእሳት ፍላጻዎች ሁሉ ልታጠፉ የምትችሉበትን የእምነትን ጋሻ አንሡ። ¹⁷የመዳንን የራስ ቍር፣ የመንፈስንም ሰይፍ ይኸውም የአባታችንን ቃል ያዙ። ¹⁸በሁሉም ጊዜ በጸሎትና በልመና ሁሉ በመንፈስ ጸልዩ። ስለ ቅዱሳን ሁሉ እየተማለዳችሁ፣ በትዕግሥት ሁሉ ለዚህ ነቅታችሁ ጠብቁ፤ ¹⁹ስለ እኔም ጸልዩ፤ አፌን በምከፍትበት ጊዜ የወንጌልን ምስጢር በድፍረት እንዳስታውቅ ቃል ይሰጠኝ ዘንድ፤ ²⁰ስለዚህ ወንጌል በሰንሰለት የታሰርሁ መልእክተኛ ነኝ፤ ልናገር እንደሚገባኝ በድፍረት እናገረው ዘንድ ጸልዩ።

የመጨረሻ ሰላምታ

²¹እናንተም ደግሞ ሁኔታዬንና የማደርገውን ታውቁ ዘንድ፣ የተወደደው ወንድምና በጌታ ታማኝ አገልጋይ የሆነው ቲኪቆስ ሁሉን ይነግራችኋል። ²²እንዴት እንዳለን እንድታውቁ፣ እርሱም ልባችሁን እንዲያጽናና ስለዚህ ምክንያት ወደ እናንተ ላክሁት።

²³ከአባታችንና ከጌታ ኢየሱስ ክርስቶስ ሰላም እንዲሁም ከእምነት ጋር የሆነ ፍቅር ለወንድሞችና ለእኅቶች ይሁን። ²⁴ጌታችንን ኢየሱስ ክርስቶስን በማይጠፋ ፍቅር ለሚወዱ ሁሉ ጸጋ ይሁን።