Ephesianao 6

6 ¹Naoshinaobing, Prohowui lungli nava̱ navāwui kahāng nganālu, kaja hi khamashungana.

²"Navā kala nava̱li khayāshilu" (hi tuingashit ngasoda khare ningkhamina), ³"chieina nathumli kaphā ngasāra kala nathumna ngaleili atam longa ringra."

⁴Vāngarā, naoshinaobingli malungmavāt ngasakalu; athumli Prohowui kharāk kala hangkachithei eina kharā ngasaklu.

⁵Raobing, nathumwui okathuiwui akhavābingli khayākashi kala kathirriri eina, ningtharlak eina, Khristali kathāda kahāng nganālu. ⁶Mikna yangpam tharan maningla mibingli ningyāng maung ngasak khavai maningla, kha Khristawui raonao thāda, ning eina ithumwui Avāwui ningkachāng ot sāda, ⁷kaphā ningngai eina otram ngatha̱da, Proholi kathāda, mibingli maningla, ⁸mi kachiva̱na, rao khikha ningkhān mi khikha, kaphā ot sāki athishurda Prohowui eina samphangluishita kaji theilu.

⁹Akhavābing, athumlila chikathā sālu, ngachee sāmi chi mathāhailu. Nathumwui kala athumwui Akhavā kazingramli lei kaji theilu; A mimai mayangmana.

Avāwui Raisāri Saikora

¹⁰Naomeikapta, Proholi kala awui pangshapwui yāngla pangda sālu. ¹¹Ithumwui Avāwui raisāri saikora ngavailu, chieina chipeewui khangarān chili nathumna nganingshaprahaora. ^a a v11 Hili chihoshok raisāri chi raimiwui khalatta maningmana—hi ithumwui Avā khalattawui raisāri na, rai zimikshowui vang awui naongarāli kaphā sākahaina. ¹²Ithumwui ngarar chi phasā kala ashee eina maningmana; kha khamungabing kala pangshap kasingabing eina, arui hi tangkhamangwui okathuiwui pangshapbing eina, kala kazingram thotli khalei makaphā manglā pangshapbing eina ngararra. ¹³Chiwui vang eina, ithumwui Avāwui raisāri saikora ngavailu, chieina makaphā zimiksholi nathumna nganingshaprahaora, kala ot saikora sākuphaida nganingtitta leiphalungra. ¹⁴Chieina, khamashungwui shānneira̱ nathumwui kashānli neizatta, kala khamashung khangarongwui thikhom ngavaida, nganinglu. ¹⁵Kala chingri kahaiwui paokaphāwui eina kharā sāngairareo chi nathumwui pheili tonglu. ¹⁶Situi saikorali, shitkasangwui chāngvei phunglu; chieina makaphā chiwui meiri malāthing saikora chi nathumna mit ngasakshaprahaora. ¹⁷Huikhamiwui kuihon kala ithumwui Avāwui tui, Manglāwui raighai chi khuilu. ¹⁸Seihā kasā kala pokhangai kachiva̱ eina, Manglā eina atam kachida seihā sāchinglu. Hili khangatar saikora eina ningngasharda, Varewui mi saikorawui vang seihā sāmilu, ¹⁹kala iwui vangla, ikhamor makā tharan tui ili mihai khavai, paokaphāwui kathuka ngathum kahai chi pinglak eina theingasak khavai, ²⁰hiwui vang eina ina matuiphalungki kaji thada chi pinglak eina matuishap khavai, I chaiyāng zangda khalei paokazata akhana.

Naomeikapta Shālam

²¹Nathumnala iwui situi kala ina kathada sālikhala kaji theihai khavai, Prohowui lungli leikashe ichinā kala shitsangkapai otram khangatha̱ Tychicusna nathumli saikora hāngmira. ²²Ithumna kathada leilikhala da nathumna theihai khavai, kala ana nathumwui wuklung kasatsang ngasak khavai, hiwui vangmāng eina ina ali nathumli chihokharāna.

²³Ivānaobingli chingri kahai kala shitkasang eina leikashi, ithumwui Avā kala Proho Jishu Khristana miranu. ²⁴Ithumwui Proho Jishu Khristali makashimān leikashi eina leikashe saikorali lukhamashan ngasomichingranu.