ኤፌሶን 6 FHB Father's Heart Bible™

6 ¹ኣቱም ውሉድ፥ እዙይ ቅኑዕ እዩ እሞ፥ ብጐይታ ንወለድኹም ተኣዘዝዎም።

²“ኣቦኻን እኖኻን ኣኽብር” (እዛ ትእዛዝ እዚኣ፥ ምስ ተስፋ ዘላ ቐዳመይቲ ትእዛዝ እያ)፥ ³“ፅቡቕ ምእንቲ ኽኾነልካ፥ ኣብ ምድሪ ኸዓ ነዊሕ ዕድመ ምእንቲ ኽትነብር።”

⁴ኣቱም ኣቦታት፥ ንውሉድኩም ኣይተቘጥዕዎም፤ ብተግሳፅን ምኽርን ጐይታ ደኣ ኣዕብይዎም።

⁵ኣቱም ባሮት፥ ከምቲ ንክርስቶስ፥ ነቶም ምድራውያን ጐይቶትኩም ብፍርሓትን ብራዕድን፥ ብቕንዕና ልቢ ተኣዘዝዎም። ⁶እንትትርኣዩ ንሰብ ባህ ከተብሉ ጥራሕ ዘይኮነስ፥ ከም ባሮት ክርስቶስ ኴንኩም፥ ፍቓድ ኣቦና ብምሉእ ልቢ እናገበርኩም ደኣ፤ ⁷ከም ንጐይታ እምበር ከም ንሰብ ዘይኮነ፥ ብፅቡቕ ድልየት እናገልገልኩም። ⁸ባርያ ኹን ናፃ፥ ነፍሲ ወከፍ ዝገበሮ ፅቡቕ፥ ካብ ጐይታ ኸም ዝቕበል ፍለጡ።

⁹ኣቱም ጐይቶት፥ ጐይታኦምን ጐይታኹምን ኣብ ሰማይ ከም ዘሎ፥ ኣብኡ ኸዓ ኣድልዎ ኸም ዘይብሉ ፈሊጥኩም፥ ንስኻትኩምውን ከምኡ ግበርዎም፤ ምፍርራሕ ኣቋርፁ።

ኵሉ ኣፅዋር ኣቦና

¹⁰ኣብ መወዳእታ፥ ብጐይታን ብሓይሊ ብርታዐኡን ፅንዑ። ¹¹ኣብ ቅድሚ ተንኮል ድያብሎስ ደው ክትብሉ ምእንቲ ኽትክእሉ፥ ኵሉ ኣፅዋር ኣቦና ልበሱ። ^a a v11 እዝ ኣብዙይ ተገሊፁ ዘሎ ኣፅዋር፥ ናይቲ ተዋጋኣይ ባዕሉ ኣይኮነን፤ ነቶም ውሉዱ ንመዓልቲ ውግእ ዝተውሃቦም፥ ናይ ኣቦና ባዕሉ ኣፅዋር ደኣ እዩ። ¹²ቅልስና ምስ ስጋን ደምን ዘይኮነስ፥ ምስቶም ገዛእትን ስልጣናትን፥ ምስ ገዛእቲ ናይ እዝ ሕዚ ዘሎ ዓለም ፀልማት፥ ኣብ ሰማያዊ ስፍራታት ምስ ዘለዉ እኩያት መንፈሳውያን ሓይልታት ደኣ እዩ። ¹³ስለዙይ በታ እኽፍቲ መዓልቲ ደው ክትብሉ፥ ኵሉ ምስ ገበርኩም ድማ ፅኒዕኹም ደው ክትብሉ ምእንቲ ኽትክእሉ፥ ኵሉ ኣፅዋር ኣቦና ልበሱ። ¹⁴እምበኣር ቅናት ሓቂ ኣብ ሕቘኹም ተዓጢቕኩም፥ ድርዒ ፅድቂ ተኸዲንኩም ደው በሉ፤ ¹⁵ኣእጋርኩም ከዓ፥ በቲ ኻብ ወንጌል ሰላም ዝርከብ ድሉውነት ይወደዩ። ¹⁶ኣብ ኵሉ ኵነታት፥ ኵሉ ነዳዲ ፍላፃታት እቲ እኩይ ከተጥፍኡ እትኽእሉላ፥ ዋልታ እምነት ኣልዕሉ። ¹⁷ቝራዕ ርእሲ ምድሓን፥ ሰይፊ መንፈስ ድማ ተቐበሉ፤ እዙይ ከዓ ቓል ኣቦና እዩ። ¹⁸ኵሉ ጊዜ ብመንፈስ፥ ብዅሉ ፀሎት፥ ብልመና ድማ ፀልዩ። ምእንቲ ዅሎም ቅዱሳን እናማለድኩም ድማ፥ ብዅሉ ፅንዓት ነዙይ ትግሁ፤ ¹⁹ምእንታይ ድማ ፀልዩ፤ ምስጢር ወንጌል ብትብዓት ምእንቲ ኽገልፅ፥ ኣፈይ እንተ ኸፈትኩ ቃል ክወሃበኒ። ²⁰ከምቲ ኽዛረቦ ዝግብአኒ ብትብዓት ምእንቲ ኽዛረቦ፥ ብዛዕባ እዙይ ብሰንሰለት ተኣሲረ ልኡኽ ኮይነ ኣለኹ።

ናይ መወዳእታ ሰላምታ

²¹ንስኻትኩምውን ኵነታተይን ዝገብሮ ዘለኹ ነገርን ምእንቲ ኽትፈልጡ፥ ቲኪቆስ፥ እቲ ፍቑር ሓውን ብጐይታ እሙን ኣገልጋልን፥ ኵሉ ኽነግረኩም እዩ። ²²ብዛዕባና ምእንቲ ኽትፈልጡ፥ ንልብኹምውን ምእንቲ ኸፀናንዕ፥ ስለ እዙይ ናባኻትኩም ለኣኽክዎ።

²³ካብ ኣቦናን ካብ ጐይታ ኢየሱስ ክርስቶስን፥ ሰላምን እምነት ዝተሓወሶ ፍቕርን፥ ንኣሕዋት ይኹን። ²⁴ፀጋ ምስ ኵሎም እቶም ንጐይታና ኢየሱስ ክርስቶስ ብዘይጠፍእ ፍቕሪ ዘፍቅርዎ ይኹን።