Philippinao 2

2 ¹Chieina Khristali kasatsang khikha, leikashi eina ringphāmei khikha, Manglā Katharawui ngasokhami khikha, khalumashan kala lukhamashan pemting khikha leiakha, ²iwui khamathān chi kashungmeimilu: kaphaning akhamānga phaninglu, leikashi akhamānga ngaroklu, manglā eina ngarumlu, khangarān akhamānga sālu. ³Ichichāwui kaphaning lah arema ningngaikasā eina khikha masāalu, kha khangahui eina kateibingli nathum khalatta vāshungda reimeiya da shānlu. ⁴Nathum mi kachiva̱na na khalattawui otmāng maningla, kateibingwui otlila ningsanglu.

⁵Khrista Jishuli nathumwui kahaia hi kaphaning chi nathum kapupta leiranu: ⁶ithumwui Avāwui azak eina okthuilakha ana, ithumwui Avāli ngaraichai sāda leikahai chi tukkhui khavai kachikathā da mashānmana, ⁷kha raowui azak phungda, mikumowui khangamā eina pharāda, akhalatta arema sākhui. ⁸Chieina mikumo sāda samphangda, ana akhalatta hamsang khangasaka, kathi eina tangda, krushli kathi eina tangda kahāng nganai. ⁹Chiwui vang eina ithumwui Avāna juikhamatai apamli ali reingasakhaira kala ming kachiva̱wui vāshungli leikahai ming chi ali mihaira, ¹⁰Chieina kazinglila, okathuilila kala okathuiwui azinglila, Jishuwui mingli khuksao kachiva̱ khuktida, ¹¹kala ithumwui Avāwui tekhamatei khavai, male kachiva̱na Jishu Khrista hi Prohona da hāngphatra.

Avāwui Naongarā, Kahora Sirābing

¹²Chieina, iwui leikashebing, nathumna atam kachida kahāng nganāsai thada, ina nathumwui ngalemli leilakhamāng maningla kha aruihon ina maleilakla tharan mataimeida, nathumwui huikhami chiwui vang khangachee kala kathirriri eina ot sāchinglu, ¹³kaja awui kaphā sākhangarānwui vang ningkachāng kala otsak khanini nathumli sangmida, ithumwui Avāna nathumwuilungli ot sāda lei.

¹⁴Mamatuila lah ngayat khangarok maleila ot saikora sālu, ¹⁵chieina kha̱khamakhei kala makhayā thot alungli nathum shāt makā kala tharzā, khayon makhalei ithumwui Avāwui naongarā ngasāra, kala athum kapupta okathuili sirā thada horra, ¹⁶kharingawui tui chi ngaziplak eina singtitta, chieina Khristawui thangli ina arema mangakhuimana kala arema ot masāmana da langso ngasakra. ¹⁷Kha nathumwui shitkasangwui pha̱kaphayā kala otram ngatha̱ chiwuitungli ila mang kachigat thada heishokmi ngasaki jilala, ina ringphāhaoda nathum saikorali ngasoda mathāna. ^a a v17 Mang kachigat hi khorum tharan pha̱kaphayā ngalemli heishokmi kahai drakhāra̱ sai; Paulna awui kharing chi athumwui shitkasangwuitungli heishokmi kahai thada pāntamna. ¹⁸Chiwui vang eina nathumnala ili ngasoda ringphāda mathānlu.

Timothy eina Epaphroditus

¹⁹Timothyli nathumli thākta chihovāra da ina Proho Jishuli chihānda lei, chieina nathum kathada leili kaji theida inala kasatsanga. ²⁰Nathumwui reisang khavai kachangkhat phaningmi kaji, ali thada mi khangatei akhala iwuili maleimana. ²¹Kaja athum saikorana Jishu Khristawui vang maphaningla kachichāwui vangmāng phaninga. ²²Kha Timothyna akachang mina kaji nathumna thei. Naomayara akhana avāli ngasoda thāda, ana ili ngasoda paokaphā hākashoklungli otram ngatha̱mi. ²³Chiwui vang, iwui vang khi shokrakhala kaji theikashap eina ali chihovāra da ina chihānda lei, ²⁴kala I khalatta thākta rāra da Prohowui mingli iwui shitkasang lei.

²⁵Epaphroditusli nathumli chihovāluishita khavai phalungra da ina phaninga. Ana iwui ichinā, otsakruma kala ili ngasoda kaphā raimi, kala nathumwui paome, iwui khaleiwui vang otram khangatha̱na. ²⁶Ana nathum saikorali ningchānga, kala ana kazāhaowa da nathumna shāhaira chiwui vang ana wuk khananga. ²⁷Kachangkhat ana kazāhaowa, kala thihaonaikhaya. Kha ithumwui Avāna ali lumashanmi. Amāngli maningla, kha ilila lumashanmi, chieina iwuitungli kakhanang atungli kakhanang matāmara. ²⁸Chiwui vang ali chihovā khavai ina sāngaimeia, chieina nathumna ali theiluida ringphāhaora, kala ina malungkharing teolaka. ²⁹Prohowui mingli khamathān saikora eina ali ngarokkhuilu, kala ali thada mibingli khayāshilu, ³⁰kaja nathumna ili ngachon khavai kashimān chi peikhavai awui mirin hamlaga, ana Khristawui otwui vang kathili vānganaikhaya.