Mga Taga-Filipos 2

2 ¹Busa kon anaay bisan unsang pagdasig diha kang Cristo, bisan unsang kahupayan gikan sa gugma, bisan unsang lawom nga pakig-ambit diha sa Espiritu Santo, bisan unsang kalomo ug kaluoy, ²hingpita ang akong kalipay: pagbaton kamog samang panghunahuna, samang gugma, nagkahiusa sa espiritu, usa ug tumong. ³Ayaw kamo pagbuhat ug bisan unsa gikan sa hakog nga tinguha o kawang nga garbo, kondili sa pagkamapainubsanon isipa ninyo ang uban nga labaw kay kaninyo. ⁴Ang matag usa kaninyo kinahanglan nga dili lamang magtagad sa iyang kaugalingong kaayohan, kondili usab sa kaayohan sa uban.

⁵Batoni ninyo kining panghunahuna taliwala sa inyong kaugalingon—ang anaa kaninyo diha kang Cristo Jesus, ⁶nga, sanglit anaa sa dagway sa atong Amahan, wala mag-isip nga ang pagkasama sa atong Amahan usa ka butang nga angayng kuptan, ⁷apan gihaw-asan niya ang iyang kaugalingon pinaagi sa pagsul-ob sa dagway sa usa ka ulipon ug sa pagkahimugso sa dagway sa tawo. ⁸Ug sa nagpakita ingon nga tawo, gipaubos niya ang iyang kaugalingon pinaagi sa pagkamasinugtanon hangtod sa kamatayon—bisan pa ang kamatayon diha sa krus. ⁹Busa gibayaw siya sa atong Amahan ngadto sa kinatas-ang dapit ug gihatagan siya sa ngalan nga labaw sa tanang ngalan, ¹⁰aron nga sa ngalan ni Jesus ang tanang tuhod moluhod, sa langit ug sa yuta ug sa ilalom sa yuta, ¹¹ug ang tanang dila moila nga si Jesu-Cristo mao ang Ginoo, ngadto sa himaya sa atong Amahan.

Mga Anak sa Amahan, mga Bituon nga Nagasidlak

¹²Busa, akong mga hinigugma, sama sa inyong kanunayng pagkamasinugtanon—dili lamang sa akong atubangan kondili karon labaw pa gayod sa akong pagkawala—padayon kamo sa pagpanlimbasog sa inyong kaluwasan uban ang kahadlok ug pagkurog, ¹³kay ang atong Amahan nagbuhat diha kaninyo, nga nagahatag sa kabubut-on ug sa buhat alang sa iyang maayong katuyoan.

¹⁴Buhata ninyo ang tanan nga walay pagbagulbol o paglalis, ¹⁵aron kamo mahimong walay ikasaway ug putli, walay sala nga mga anak sa atong Amahan taliwala sa baliko ug dunot nga kaliwatan—nga nagasidlak taliwala kanila sama sa mga bituon sa kalibotan, ¹⁶nga nagakupot pag-ayo sa pulong sa kinabuhi, aron makapanghambog ako sa adlaw ni Cristo nga wala ako magdagan o maghago nga walay kapuslanan. ¹⁷Apan bisan pa kon ako ibubo ingon nga halad-ilimnon diha sa halad ug pag-alagad sa inyong pagtuo, malipayon ako ug nagakalipay uban kaninyong tanan. ^a a v17 Ang halad-ilimnon maoy bino nga ginabubo diha sa halaran sa pagsimba; gihulagway ni Pablo ang iyang kinabuhi nga ginabubo diha sa ilang pagtuo. ¹⁸Busa kamo usab kinahanglan nga malipayon ug magkalipay uban kanako.

Si Timoteo ug si Epafrodito

¹⁹Naglaom ako, diha sa Ginoong Jesus, nga ipadala kaninyo si Timoteo sa dili madugay, aron ako usab madasig, sa masayran ko kon unsa na kamo. ²⁰Wala akoy lain nga sama kaniya, nga matinud-anong magtagad sa inyong kaayohan. ²¹Kay silang tanan nagatagad sa ilang kaugalingong kaayohan, dili sa iya ni Jesu-Cristo. ²²Nahibalo kamo sa napamatud-ang pagkatakos ni Timoteo—sama sa usa ka anak uban sa iyang amahan, nag-alagad siya uban kanako sa buhat sa ebanghelyo. ²³Busa naglaom ako nga ipadala siya sa labing madali nga makita ko kon unsay mahitabo kanako, ²⁴ug masaligon ako diha sa Ginoo nga ako gayod moanha sa dili madugay.

²⁵Giisip ko nga kinahanglan nga ipadala balik kaninyo si Epafrodito—ang akong igsoon, isigkamagbubuhat, ug isigkasundalo, ang inyong sinugo ug alagad alang sa akong mga panginahanglan. ²⁶Gimingaw siya kaninyong tanan, ug nabalaka tungod kay nadungog ninyo nga nagmasakiton siya. ²⁷Tinuod gayod nga nagmasakiton siya, ug hapit na mamatay. Apan ang atong Amahan naluoy kaniya—dili lamang kaniya kondili kanako usab, nga nagluwas kanako gikan sa kasubo nga nagpatong-patong. ²⁸Busa labaw akong naninguha sa pagpadala kaniya, aron sa makita ninyo siya pag-usab managkalipay kamo ug mokunhod ang akong kabalaka. ²⁹Dawata ninyo siya diha sa Ginoo uban ang bug-os nga kalipay, ug pasidunggi ang mga tawong sama kaniya, ³⁰tungod kay giduol niya ang kamatayon alang sa buhat ni Cristo, nga gitahan ang iyang kinabuhi aron pun-an ang nakulang ninyong pagtabang kanako.