Fidiphu 2 FHB Father's Heart Bible™

2 ¹Buna, yuka ni henina kikesa kyahika mwena Kidisitu, yuka ni henina kuheka kikesa kutukini mu lungongu, yuka ni henina kithwadi mu Kitembu Kyatoma, yuka ni henina kyadi yi buweti, ²lungisenu kyesi kyama: lukala yi dibanza dimosi, lukala yi lungongu lumosi, lukala mutu mosi mu kitembu, mu kikwamina kimosi. ³Kalu salaku kima kimosi mu kiphala voti mu kudimonikisa kwa phamba, kaasi mu kudikulumuna, lubanzi ni bakwenu baluti benu mu lukumu. ⁴Kosu mutu mu benu katadilaku kaka mu mambu mandi-mandi, kaasi yi mu mambu ma bakwawu phi.

⁵Lukala yi dibanza diadi hana kati dya benu, dina dyenina dyenu mwena Kidisitu Yesu, ⁶yandi, mbata nana kakala mu kifwani kya Tata wetu, kabanzaku ni kufwanana yi Tata wetu kwenina kima kya kubonga, ⁷kaasi wádilewula yandi meni, mu kuvwata kifwani kya musadi, amana wábutuka mu kifwani kya batu. ⁸Amana bwosu kámonika hanga mutu, wadíkulumuna yandi meni, mu kulemvuka tee ku lufwa—mbata lufwa lwa ha kuluse. ⁹Yihana Tata wetu wámutombula kuna kisoka kyalúta boosu, amana wámuheka khumbu yina yiluti khumbu zoosu, ¹⁰hanga mu khumbu ya Yesu, makungulu moosu mafúkama, mu zilu yi ha tsi yi ku nsi ya ntoto, ¹¹amana ndinga yosu yazáya ni Yesu Kidisitu kenina Pfumu, mu khembu kya Tata wetu.

Bana ba Tata, Bathetimbwa Babati Kyenza

¹²Yihana, benu batondama bama, bwosu lwisi lemvuka kosu tangwa—ka mu kukala kwama kaka ku, kaasi buthwena luluti tswasu mu khonda kwama—lusalaka luhulusu lwenu yi bweya yi matekita, ¹³mukuma Tata wetu wisi sala mwena benu, wisi luheka luzolu yi ngolu za kusala, mu kulungisa luzolu lwandi lwa bukheti.

¹⁴Lusalenu mambu moosu konda kubokuta voti kutendana, ¹⁵hanga lukala konda kifu yi basemi, bana ba Tata wetu bana konda kifu hana kati dya kanda dya khonda yi dya mbi—lusi kyenza hana kati dya bawu hanga tutumbwa mu tsi, ¹⁶lusimbidila Ndinga ya luzingu ngolu, hanga mu kilumbu kya Kidisitu yakala yi kyesi kya kudibula ni yázawukaku mu phamba voti yásalaku mu phamba. ¹⁷Kaasi yuka ni mbata mbati dukulwa hanga kimenga kya kunwa ha thandu ya kimenga yi kisalu kya lukwikilu lwenu, kyesi kyenina kyama amana yisi sephila kumosi yi benu boosu. ^a a v17 Kimenga kya kunwa kyákala vinu yina yábadukulanga ha meza ma kimenga mu kufukamina; Pholu wisi fwanikisa luzingu lwandi hanga lwina lubati dukulwa ha thandu ya lukwikilu lwa bawu. ¹⁸Yihana benu phi lukala yi kyesi amana lusepha kumosi yi meni.

Thimoti yi Ephafoditi

¹⁹Yisi sila kivuvu mwena Pfumu Yesu kuluhitika Thimoti ntinu-ntinu, hanga meni phi yiheka kikesa, bu nzayi buna lwenina. ²⁰Ka mutu wahika ku yenina yi meni wafwana yi yandi, wuna kakala tadila mambu menu mu kyedika. ²¹Mukuma bawu boosu bisi tadila mambu mawu-mawu, ka mana ma Yesu Kidisitu ku. ²²Luzayi buna Thimoti kameka—hanga mwana kwena tata wandi, kásala kumosi yi meni mu kisalu kya Musamu wa Bukheti. ²³Yihana yisi sila kivuvu kumuhitikisa kwena benu, bu nzábona buna mambu mama makwenda kwena meni, ²⁴amana yisi sila mbundu mwena Pfumu ni meni meni yakwísa ntinu-ntinu.

²⁵Yábanza ni bwáfwana kuluvutudila Ephafoditi—phangi wama, mukwa wama wa kisalu, yi musindikidi wama wa mizingu, mbambala wenu yi musadi wenu mu mifunu myama. ²⁶Yandi wenina yi tsambu ya benu boosu, amana mbundu yandi yenina mu kiwayi mukuma luyuka ni kákala mbefu. ²⁷Kyedika, kákala mbefu, amana kuma kufwa bela-bela. Kaasi Tata wetu wámuyukila kyadi—ka yandi kaka ku, kaasi meni phi, mu kungebila kiwayi ha thandu ya kiwayi. ²⁸Yihana yibati sya ngolu kumuhitikisa, hanga bu lwakamúbona hika lusepha, amana meni yikala yi kiwayi kyahika. ²⁹Lumutambwasenu mwena Pfumu yi kyesi kyosu, amana luhekenu lukumu kwena batu bafwana yi yandi, ³⁰mukuma kátula bela-bela yi lufwa kikuma kya kisalu kya Kidisitu, mu kuyambula luzingu lwandi hanga kalungisa kina kyázimbala mu kisadisu kyenu kwena meni.