Khristali Samphang Akachang Aman
Paulna awui kaphungbing — shang, tamchitheikahai, kala ainwui azingli makaphā maleikahai — hiluilaga, Khristali theikhui kala ithumwui Avā eina kharā khamashung khangarong chiwui ngachaili chibing saikora thothap da hānga. Ana ungshunghaira da mahāngmana da tangkahai ngāhāng: khanukli khalei chi malaida, shingā katingvāda lei. Awui ruichumnaopam chi akhangateli lei.
3 1Naomeikapta, ivānaobing, Proholi ringphāchinglu. Tui tākam chi latluida kakapi hi iwui vang kakhanang maningmana, kala chi nathumli phārimi.
2Fabing chi ningngasharlu, makaphā ot kasābing chi ningngasharlu, phasā tektākasābing chi ningngasharlu. a a v2 Paulna ahui rimshok kajina da kahāngbing chi mana̱shida, athumli 'phasā tektākasābing' da hokta; chiya ahui rimkashokwui tui chi ningkhaung eina rāmkhaikasāna. 3Ithum ahui rimkashokbingna: ithumwui Avāwui Manglā eina khokharuma, Khrista Jishuli langsoda, phasāli khikhakha mashitsangmana. 4Inala phasāli shitsangpai. Kachikathā mi khangatei akhana phasāli shitsangpai da phaningakha, ina hakmeida shitsangpai: 5Kachishatathang ahui rimshokhaira; kapharā eina Benjamin shangwui Israelnaona; Hebrewnaobingwui Hebrewnaona; ainwui azingli Phariseena. 6Lungtumlak eina, churchli rekharekhaira; ainwui azingli khamashung khangarongli, shāt makāna.
7Kha iwui vang tongmei kahai saikora chi, Khristawui vang eina ara ina kashimān da shānkhui. 8Mha, iwui Proho Khrista Jishu theikhui aman kasaka chiwui vang eina ina ot saikora chi kashimān da shānkhui. Awui vang eina ina ot saikora shimāntāhaira, kala chi thothap da shānkhuida, chieina ina Khristali samphang khavai, 9kala ainli kharā iwui khalatta khamashung khangarong maleila, kha Khristali shitkasang eina khalei, shitkasang athishurda ithumwui Avāwui eina kharā khamashung khangarong chi leida, awui alungli samphang khavai, 10chieina ali, awui ringkhaluiwui pangshap, kala awui kachotkachāngli khangarum chi ina thei khavai, kathili awui kathā sāhaida, 11kathāda jilala kathiwui eina ringkhalui chi ina samphangpai khavaina.
12Ina chi samphanghaira, lah kāshungchaohaira da maningla, kha Khrista Jishuna ili tukkhui kahai chi tukkhui khavai ina kashap eina tangda khangahomna. 13Ivānaobing, ina chi tukkhuihaira da ikhalatta mashānkhuiranga. Kha ot akhamāngli: khanukli khalei chi malaida, shingā khalei chishong katingvāda, 14Khrista Jishuli ithumwui Avāna kazingramshong hokhuiwui sāman chiwui vang, ina atāzanshong khangahomna. 15Ithum khararnaobing saikorana chithāda phaningsa; kachishut akhali nathumna ngateida phaningakha, ithumwui Avāna chila nathumli chitheimira. 16Kha ithumna samphangkahai chili ithum khalatta singtitmalu.
17Ivānaobing, nathum kapupta iwui kasākhavā tamkhuilu, kala nathumna ithumwuili samiki sha̱khui athishurda karingbing chi yangkhuilu. 18Mi kachungkhana Khristawui krushwui yangkashe sāhaoda ringda lei. Hi ina nathumli ra̱ra̱ hāngkahaina, kala ara chāra̱ eina hāngna. 19Athumwui athei chiya kashimānna, athumwui wuk chi athumwui varena, athumwui tekhamatei chiya athumwui kakhayakna, athumwui ning okathuiwui otbingli ningshaida lei. 20Kha ithumwui ruichumnaopam chiya kazingramli lei; chishong eina ithumna Huikhame, Proho Jishu Khristali ningchāngda honda lei, 21ana ot saikora akhalattali sathuiser ngasakki pangshap eina, ithumwui khangazan phasā chi awui tekmateilak phasā thāda kadhar onngasakhaora.
