ፊልጵስዩስ 3 FHB Father's Heart Bible™

3 ¹ኣብ መወዳእታ፥ ኣቱም ኣሕዋተይ፥ ብጐይታ ተሓጐሱ። እቲ ሓደ ነገር ደጊመ ምፅሓፍ ንኣይ ኣይከብደንን እዩ፥ ንኣኻትኩም ከዓ ይሕልወኩም።

²ካብ ኣኽላባት ተጠንቀቑ፥ ካብ ክፉኣት ዓየይቲ ተጠንቀቑ፥ ካብቶም ንስጋ ዝቘራርፁ ተጠንቀቑ። ^a a v2 ጳውሎስ ነቶም ብግርዘት ዝፀቕጡ፥ ነታ ናይ ግርዘት ቃል ብምግልባጥ ‘እቲ ምቝራፅ’ ኢሉ እናፀውዐ የባጭወሎም። ³ንሕና እቲ ግርዘት ኢና፤ ብመንፈስ ኣቦና እነምልኽ፥ ብክርስቶስ ኢየሱስ እንምካሕ፥ ብስጋ ዘይንተኣማመን ኢና፥ ⁴ኣነ እኳ ብስጋ ዝተኣማመነሉ ኣለኒ። ካልእ ሰብ ብስጋ ዝተኣማመነሉ ኣለኒ ኢሉ እንተ ሓሰበ፥ ኣነ ኻብኡ ዝያዳ ኣለኒ፦ ⁵ብሻምነይቲ መዓልቲ ዝተገረዝኩ፥ ብትውልዲ እስራኤላዊ፥ ካብ ነገድ ብንያም፥ ዕብራዊ ኻብ ዕብራውያን፥ ብመሰረት ሕጊ ፈሪሳዊ እየ። ⁶ብቕንኣት ንቤተ ክርስቲያን ዘሳጕግ፥ ብመሰረት ሕጊ ብዝርከብ ፅድቂ ኸዓ ፍፁም ነበርኩ።

⁷ነቲ ንኣይ ረብሓ ዝነበረ ዅሉ ግና፥ ሕዚ ስለ ክርስቶስ ከም ክሳራ እቘፅሮ ኣለኹ። ⁸እወ፥ ንጐይታይ ኢየሱስ ክርስቶስ ብምፍላጥ ዘሎ ልዕሊ ዅሉ ዝበልፅ ዋጋ ስለ ዝኾነ፥ ንዅሉ ኸም ክሳራ እቘፅሮ ኣለኹ። ስለኡ ኢለ ዅሉ ነገር ኣጥፊአ፥ ንክርስቶስ ምእንቲ ኽረክብ ድማ ከም ጓሓፍ እቘፅሮ ኣለኹ፤ ⁹ኣብኡ ድማ ክርከብ፥ ካብ ሕጊ ዝርከብ ናይ ርእሰይ ፅድቂ ዘይኮነስ፥ ነቲ ብክርስቶስ ብዘሎ እምነት ዝርከብ ፅድቂ፥ ማለት ነቲ ኻብ ኣቦና ብእምነት ዝርከብ ፅድቂ ደኣ ሒዘ ምእንቲ ኽርከብ፥ ¹⁰ንእኡን ሓይሊ ትንሳኤኡን ምእንቲ ኽፈልጥ፥ ኣብ መከራኡ እናተኻፈልኩ፥ ብሞቱ ንእኡ እናመሰልኩ፥ ¹¹ብዝኾነ መንገዲ ናብ ትንሳኤ ምዉታን ምእንቲ ኽበፅሕ እዩ።

¹²ድሮ ረኺበዮ ዘለኹ፥ ወይ ድሮ ፍፁም ዝኾንኩ ማለተይ ኣይኮነን፤ ነቲ ክርስቶስ ኢየሱስ ዝሓዘኒ ምእንቲ ኽሕዞ ግና እፅዕር ኣለኹ። ¹³ኣቱም ኣሕዋተይ፥ ገና ኸም ዝሓዝክዎ ንርእሰይ ኣይቘፅርን እየ፤ ሓንቲ ነገር ግና እገብር ኣለኹ፦ ነቲ ዝሓለፈ ረሲዐ፥ ናብቲ ቕድሚተይ ዘሎ እናተመጣጠርኩ፥ ¹⁴ናብቲ ሽቶ እናተመጣጠርኩ፥ ምእንቲ እቲ ኣቦና ብክርስቶስ ኢየሱስ ናብ ላዕሊ ዝፀውዖ ፅውዓ ዝኾነ ዓስቢ እጓየ ኣለኹ። ¹⁵ንሕና ዅላትና እቶም ፍፁማት ከምዙይ ንሕሰብ፤ ብዛዕባ ዝኾነ ነገር ብኻልእ ኣገባብ እንተ ሓሰብኩም፥ ኣቦና ንእኡ ድማ ክገልፀልኩም እዩ። ¹⁶ኣብቲ ድሮ ዝበፃሕናዮ ጥራሕ ፀኒዕና ንንበር።

¹⁷ኣቱም ኣሕዋተይ፥ ብሓባር ሰዓብተይ ኩኑ፤ ነቶም ከምቲ ኣባና ዘሎ ኣብነት ዝነብሩ ኸዓ ተኸታተሉ። ¹⁸ብዙሓት ፀላእቲ መስቀል ክርስቶስ ኮይኖም ይነብሩ ኣለዉ፤ ብዛዕባ እዚኣቶም ብዙሕ ጊዜ ነጊረኩም እየ፥ ሕዚ ኸዓ ብንብዓት እነግረኩም ኣለኹ። ¹⁹መወዳእትኦም ጥፍኣት እዩ፥ ኣምላኾም ከብዶም እዩ፥ ክብሮም ድማ ሕፍረቶም እዩ፥ ኣእምሮኦም ናይ ምድሪ ነገር ጥራሕ ዝሓስብ እዩ። ²⁰ዜግነትና ግና ኣብ ሰማይ እዩ፤ ካብኡ ኸዓ ንመድሕን፥ ንጐይታ ኢየሱስ ክርስቶስ፥ ኣበርቲዕና ንፅበ ኣለና፤ ²¹ነቲ ንዅሉ ነገር ናብ ርእሱ ዘግዝእ ሓይሉ ተጠቒሙ፥ ነቲ ሕሱር ስጋና ኸም ክቡር ስጋኡ ክኸውን ክልውጦ እዩ።