Philippinao 4

4 ¹Chiwui vang eina, iwui leikashebing, theingailak iwui ivānaongarā, iwui ringphā kala kuihon, chithada Proholi nganingtitlu.

²Ani akha eina akha Proholi ning akha sākhavai, ina Euodiali kasatsang kala Syntychelila kasatsanga. ³Mha, ina nalila poi, iwui khamashung ot sakharuma: sha̱nao khani hili ngachonmilu. Clement kala iwui khangatei otram ngatha̱kharumabing ngasoda, anina paokaphāwui vang ili ngasoda nganurhaowa. Athumwui aming kharingwui lairikli lei.

⁴Proholi atam kachida ringphāchinglu; latluida ina hāngra, ringphālu. ⁵Nathumwui malungkhanim chi mi saikorali theingasakmilu. Proho nganaishunhaira. ⁶Khikhawui vang eina malungmaringalu; kha, ot saikorali, seihā kasā kala pokhangai eina ningkashi ngasoda, nathumwui pokhangaibing chi ithumwui Avāli theingasakmilu. ⁷Theishingkakhui saikorawui kānda khalei ithumwui Avāwui chingri kahaina, Khrista Jishuwui lungli nathumwui wuklung kala nathumwui ning chi ngākmira.

⁸Naomeikapta, ivānaobing, khamashung kahai saikora, khayākakā, khangarong, tharkahai, leishikhai, khayāshingai, phākhamatai kala tekmatei khavai, ot hibing saikorali nathumwui ning ngasharlu, kala atam kachida chili phaninglu. ⁹Nathumna iwuili tamkhui, samphang, shā kala thei kahai chi sālu, kala chingri kahaiwui ithumwui Avā nathumli leichingra.

Athumwui Mingairareo eina Avāli Khayāshi

¹⁰Ina Proholi ringphāmeihaowa, kaja naomeikapta iwui vang nathumwui phaning chi latluida dharngasakhaira. Nathumna kachangkhatta iwui vang phaninga, kha atam kachā chi masamphangmana. ¹¹Ina khavātwui vang eina kahāng maningmana, kaja atam kachiva̱li shapa da phaning khavai ina tamkhuihaira. ¹²Maishi ngasakhaiwui kathāda leikhala ina thei, kala pemtaida leikhavai ina thei. Atam kachiva̱li, otshot saikorali, pemhaida kala thaihaoda, khavāt maleila kala khavāta leida, ngathum kahai chi ina tamkhuihaira. ¹³Ili pangshap mi Khristawui eina ina ot saikora sāpaira. ¹⁴Chithālala, nathumna iwui kakhanangli ngarumhaoda kaphā sāhaira. ¹⁵Philippinaobing, paokaphā haokaphok tharan, Macedoniawui eina I kharā tharan, nathum maningla khami kala samphangki otli church khangatei akhana ili mangarummana kaji nathumnala thei. ¹⁶Thessalonicali einala, iwui khavātwui vang nathumna ngachonkhami chihovāluishita. ¹⁷Lemmet chi ina ningchāng kaji maningmana, kha nathumwui khamasāli mataisang kahai athei chi ina ningchānga. ¹⁸Ina aman peichaoda samphanga, kala mataimeida leihaira. Epaphrodituswui eina nathumwui lemmet samphangda pemhaira; hi nganamkaphā kachigat, ithumwui Avāli khuisangkapai kala ningyāng ungngasaka pha̱kaphayā akhana. ^a a v18 Paulna Philippinaobingwui pheisā lemmet chi kachangkhat khorum otsak akha thada chithei khavai, khorumshimwui pha̱kaphayā tui chi shurhaina. ¹⁹Kala iwui Avāna, Khrista Jishuli tekhamateili khalei awui kashāng athishurda, nathumwui khavavāt saikora ngarānmira. ²⁰Ara ithumwui Avāli mashimānda tekmateichingranu. Amen.

Khanaowa Shālam

²¹Khrista Jishuli khalei kathara mi kachiva̱li shālam hāngmilu. Ili ngasoda khalei avānaobingna nathumli shālam mili. ²²Katharabing saikorana, mataimeikapta Caesarwui shimkhurwui mibingna, nathumli shālam mili. ^b b v22 "Caesarwui shimkhur" chiya Rome wungawawui otsakli otram sāmi raobing, ningkhān samphanga mibing, kala otram khangatha̱mibingli hānga—awui khavaruk maningmana.

²³Proho Jishu Khristawui lukhamashan chi nathumwui manglāli ngasomiranu. Amen.