ସ୍ଥିର ଥାଅ ଓ ଆନନ୍ଦ କର

ମଣ୍ଡଳୀର ଦୁଇ ଜଣ ସ୍ତ୍ରୀଲୋକଙ୍କୁ ନାମ ଧରି ଏକମତ ହେବାକୁ ଅନୁରୋଧ କରାଯାଏ। ତାପରେ ସେହି ସୁପରିଚିତ ବାକ୍ୟ: କୌଣସି ବିଷୟରେ ଚିନ୍ତା କର ନାହିଁ, ସବୁ ବିଷୟରେ ପ୍ରାର୍ଥନା କର, ଏବଂ ବୁଦ୍ଧିର ଅଗୋଚର ଆମ ପିତାଙ୍କ ଶାନ୍ତି ତୁମକୁ ରକ୍ଷା କରିବ। ପାଉଲ ପଠାଯାଇଥିବା ଅର୍ଥ ପାଇଁ ସେମାନଙ୍କୁ ଧନ୍ୟବାଦ ଦିଅନ୍ତି, ଏବଂ କହନ୍ତି ଯେ ତୃପ୍ତ ହେଉ ବା କ୍ଷୁଧିତ, ସେ ସନ୍ତୁଷ୍ଟ ରହିବାକୁ ଶିଖିଛନ୍ତି, ଓ ତାହାର ଆବଶ୍ୟକତା ତାହାଙ୍କର ନ ଥିଲା।

ଅଧ୍ୟାୟ 4।

ଅତଏବ, ହେ ମୋହର ପ୍ରିୟ ଓ ବାଞ୍ଛିତ ଭ୍ରାତୃଭଗିନୀମାନେ, ତୁମ୍ଭେମାନେ ମୋହର ଆନନ୍ଦ ଓ ମୁକୁଟ ସ୍ଵରୂପ, ଏହିପରି ପ୍ରଭୁଙ୍କଠାରେ ସ୍ଥିର ଥାଅ, ହେ ପ୍ରିୟମାନେ।

ମୁଁ ଇୟୋଦିଆଙ୍କୁ ଅନୁରୋଧ କରୁଅଛି ଓ ସୁନ୍ତୁଖୀଙ୍କୁ ଅନୁରୋଧ କରୁଅଛି ଯେ, ସେମାନେ ପ୍ରଭୁଙ୍କଠାରେ ପରସ୍ପର ଏକମନା ହୁଅନ୍ତୁ। ହଁ, ହେ ସତ୍ୟ ସହକର୍ମୀ, ମୁଁ ତୁମ୍ଭକୁ ମଧ୍ୟ ବିନତି କରୁଅଛି, ଏହି ସ୍ତ୍ରୀମାନଙ୍କୁ ସାହାଯ୍ୟ କର; କ୍ଲେମେନ୍ତ ଓ ମୋହର ଅନ୍ୟ ସହକର୍ମୀମାନଙ୍କ ସହିତ ସେମାନେ ସୁସମାଚାର ନିମନ୍ତେ ମୋʼ ସାଙ୍ଗରେ ପରିଶ୍ରମ କଲେ, ସେମାନଙ୍କ ନାମ ଜୀବନ ପୁସ୍ତକରେ ଲିଖିତ ଅଛି।

ପ୍ରଭୁଙ୍କଠାରେ ସର୍ବଦା ଆନନ୍ଦ କର; ପୁନର୍ବାର ମୁଁ କହିବି, ଆନନ୍ଦ କର। ତୁମ୍ଭମାନଙ୍କ କୋମଳତା ସମସ୍ତଙ୍କ ନିକଟରେ ପ୍ରକାଶ କର। ପ୍ରଭୁ ନିକଟବର୍ତ୍ତୀ। କୌଣସି ବିଷୟରେ ଚିନ୍ତିତ ହୁଅ ନାହିଁ; ବରଂ ପ୍ରତ୍ୟେକ ବିଷୟରେ ଧନ୍ୟବାଦ ସହିତ ପ୍ରାର୍ଥନା ଓ ନିବେଦନ ଦ୍ଵାରା ତୁମ୍ଭମାନଙ୍କ ଅନୁରୋଧ ଆମ୍ଭମାନଙ୍କ ପିତାଙ୍କ ନିକଟରେ ଜ୍ଞାତ କରାଅ। ତହିଁରେ ଆମ୍ଭମାନଙ୍କ ପିତାଙ୍କ ଯେଉଁ ଶାନ୍ତି ସମସ୍ତ ବୁଦ୍ଧିର ଅଗମ୍ୟ, ତାହା ଖ୍ରୀଷ୍ଟ ଯୀଶୁଙ୍କଠାରେ ତୁମ୍ଭମାନଙ୍କ ହୃଦୟ ଓ ମନକୁ ରକ୍ଷା କରିବ।

ଅବଶେଷରେ, ହେ ଭ୍ରାତୃଗଣ, ଯାହା ଯାହା ସତ୍ୟ, ଯାହା ଯାହା ସମ୍ମାନନୀୟ, ଯାହା ଯାହା ନ୍ୟାଯ୍ୟ, ଯାହା ଯାହା ପବିତ୍ର, ଯାହା ଯାହା ମନୋହର, ଯାହା ଯାହା ପ୍ରଶଂସନୀୟ, ଯାହା ଯାହା ଉତ୍ତମ ଓ ସ୍ତୁତିଯୋଗ୍ୟ, ସେହି ସମସ୍ତ ବିଷୟରେ ତୁମ୍ଭମାନଙ୍କ ମନ ନିବିଷ୍ଟ କର ଓ ଏହିସବୁ ଧ୍ୟାନ କରୁଥାଅ। ତୁମ୍ଭେମାନେ ମୋʼଠାରେ ଯାହା ଯାହା ଶିକ୍ଷା କରିଅଛ, ଗ୍ରହଣ କରିଅଛ, ଶୁଣିଅଛ ଓ ଦେଖିଅଛ, ସେହିସବୁ କର, ତାହାହେଲେ ଶାନ୍ତିଦାତା ଆମ୍ଭମାନଙ୍କ ପିତା ତୁମ୍ଭମାନଙ୍କ ସଙ୍ଗରେ ରହିବେ।

ସେମାନଙ୍କ ଦାନଶୀଳତା ଦ୍ଵାରା ପିତା ସମ୍ମାନିତ

ତୁମ୍ଭେମାନେ ଶେଷରେ ମୋʼ ନିମନ୍ତେ ତୁମ୍ଭମାନଙ୍କ ଚିନ୍ତା ପୁନର୍ବାର ଜାଗ୍ରତ କରିବାରୁ ମୁଁ ପ୍ରଭୁଙ୍କଠାରେ ଅତ୍ୟନ୍ତ ଆନନ୍ଦିତ ହେଲି; ତୁମ୍ଭେମାନେ ବାସ୍ତବରେ ଚିନ୍ତିତ ଥିଲ, ମାତ୍ର ସୁଯୋଗ ପାଇ ନ ଥିଲ। ମୁଁ ଯେ ଅଭାବ ହେତୁ ଏହା କହୁଅଛି, ତାହା ନୁହେଁ; କାରଣ ଯେକୌଣସି ଅବସ୍ଥାରେ ସନ୍ତୁଷ୍ଟ ରହିବାକୁ ମୁଁ ଶିକ୍ଷା କରିଅଛି। ନତ କରାଯିବାକୁ ମୁଁ ଜାଣେ, ପୁଣି ଉପଚିତ ହେବାକୁ ମଧ୍ୟ ଜାଣେ। ଯେକୌଣସି ଓ ପ୍ରତ୍ୟେକ ଅବସ୍ଥାରେ, ପରିତୃପ୍ତ ଓ କ୍ଷୁଧିତ, ଉପଚିତ ଓ ଅଭାବଗ୍ରସ୍ତ ହେବାର ମର୍ମ ମୁଁ ଶିକ୍ଷା କରିଅଛି। ଯେ ମୋତେ ଶକ୍ତି ଦିଅନ୍ତି, ସେହି ଖ୍ରୀଷ୍ଟଙ୍କ ଦ୍ଵାରା ମୁଁ ସମସ୍ତ କାର୍ଯ୍ୟ କରିପାରେ। ତଥାପି ତୁମ୍ଭେମାନେ ମୋʼ କ୍ଲେଶର ସହଭାଗୀ ହୋଇ ଉତ୍ତମ କର୍ମ କଲ। ହେ ଫିଲିପ୍ପୀୟମାନେ, ତୁମ୍ଭେମାନେ ମଧ୍ୟ ଜାଣ ଯେ, ସୁସମାଚାରର ଆରମ୍ଭ ସମୟରେ, ଯେତେବେଳେ ମୁଁ ମାକିଦନିଆ ତ୍ୟାଗ କଲି, ସେତେବେଳେ ତୁମ୍ଭେମାନେ ଏକାକୀ ବିନା ଆଉ କୌଣସି ମଣ୍ଡଳୀ ଦାନ ଓ ଗ୍ରହଣ ବିଷୟରେ ମୋʼ ସହିତ ସହଭାଗୀ ହୋଇ ନ ଥିଲା। ଥେସଲନୀକୀରେ ସୁଦ୍ଧା ତୁମ୍ଭେମାନେ ମୋହର ଅଭାବ ପୂରଣ ନିମନ୍ତେ ଥରେ ଦୁଇଥର ସାହାଯ୍ୟ ପଠାଇଥିଲ। ମୁଁ ଯେ ଦାନ ଅନ୍ଵେଷଣ କରୁଅଛି, ତାହା ନୁହେଁ, ମାତ୍ର ତୁମ୍ଭମାନଙ୍କ ହିସାବରେ ବୃଦ୍ଧି ପାଉଥିବା ଫଳ ଅନ୍ଵେଷଣ କରୁଅଛି। ମୁଁ ସମସ୍ତ ପାଇଅଛି, ଆହୁରି ଅଧିକ ପାଇଅଛି; ଏପାଫ୍ରାଦିତଙ୍କଠାରୁ ତୁମ୍ଭମାନଙ୍କ ଦାନ ପାଇ ମୁଁ ପରିପୂର୍ଣ୍ଣ ହୋଇଅଛି; ତାହା ସୁଗନ୍ଧ ଉପହାର, ଆମ୍ଭମାନଙ୍କ ପିତାଙ୍କ ଗ୍ରାହ୍ୟ ଓ ସନ୍ତୋଷଜନକ ବଳିଦାନ ସ୍ଵରୂପ। ^a ଆଉ ମୋହର ପିତା ଖ୍ରୀଷ୍ଟ ଯୀଶୁଙ୍କଠାରେ ମହିମାରେ ଆପଣା ଐଶ୍ଵର୍ଯ୍ୟ ଅନୁସାରେ ତୁମ୍ଭମାନଙ୍କ ସମସ୍ତ ଅଭାବ ପୂରଣ କରିବେ। ବର୍ତ୍ତମାନ ଆମ୍ଭମାନଙ୍କ ପିତାଙ୍କ ମହିମା ଯୁଗେ ଯୁଗେ ହେଉ। ଆମେନ୍‍।

ଶେଷ ଅଭିବାଦନ

ଖ୍ରୀଷ୍ଟ ଯୀଶୁଙ୍କଠାରେ ପ୍ରତ୍ୟେକ ସାଧୁଙ୍କୁ ଅଭିବାଦନ କର। ମୋʼ ସଙ୍ଗରେ ଥିବା ଭ୍ରାତୃଗଣ ତୁମ୍ଭମାନଙ୍କୁ ଅଭିବାଦନ କରୁଅଛନ୍ତି। ସମସ୍ତ ସାଧୁ, ବିଶେଷତଃ କାଇସରଙ୍କ ଗୃହର ଲୋକମାନେ ତୁମ୍ଭମାନଙ୍କୁ ଅଭିବାଦନ କରୁଅଛନ୍ତି। ^b

ପ୍ରଭୁ ଯୀଶୁ ଖ୍ରୀଷ୍ଟଙ୍କ ଅନୁଗ୍ରହ ତୁମ୍ଭମାନଙ୍କ ଆତ୍ମା ସହିତ ଥାଉ। ଆମେନ୍‍।