Mfunu ya Tsyelika Kele na Klisto
Polo ke tanga bima ya yandi lenda kudikumisa na yawu, kifumba, nlongoko mpe luzingu ya kukonda mbeba na nsi ya Nsiku, na manima yandi ke binga yawu nyonso bosoto na ntadisi ya kuzaba Klisto mpe kudedama yina ke katukaka na Tata ya beto. Yandi ke keba na kutuba ti yandi me kuma ntete ve: na kuvila mambu ya nima, yandi ke kwenda na ntwala. Kinsi ya yandi kele na kisika ya nkaka.
3 1Na nsuka, bampangi, beno yangalala na Mfumu. Kusonika dyaka mambu kaka yina kele dyambu ya mpasi ve na munu, mpe yawu ke kebaka beno.
2Beno keba na bayimbwa, beno keba na bisadi ya mbi, beno keba na bayina ke zengaka nsuni. a a v2 Polo ke seka bantu yina ke kanaka ti nzengolo ya bubakala kele mfunu, na kubingaka bawu «bayina ke zengaka nsuni»—yandi balulaka na luzolo mpova yina ke tubilaka nzengolo ya bubakala. 3Beto kele bantu ya nzengolo ya bubakala ya kyeleka—beto ke sambilaka na Mpeve ya Tata ya beto, beto ke kudikumisaka na Yesu-Klisto, mpe beto ke tulaka kivuvu ve na kimuntu, 4ata munu mpe lenda kuvwanda na kivuvu na kimuntu. Kana muntu ya nkaka ke banza ti yandi kele na kikuma ya kutula kivuvu na kimuntu, munu, mu kele na yawu mingi kuluta: 5Ba zengaka munu bubakala na kilumbu ya nana; mu butukaka mu-Isayeli, ya kifumba ya Bezame; mu-Ebeleyo ya ba-Ebeleyo; Falisye yina ke zitisaka Nsiku. 6Na kimbanda, mu vwandaka kukwamisa dibuundu; na mambu ya kudedama ya Nsiku, mu vwandaka ya kusungama.
7Kasi mambu nyonso yina vwandaka ndandu na munu, ntangu yayi mu ke tala yawu bonso bima ya kuvidisa samu na Klisto. 8Ee, mu ke tala mambu nyonso bonso bima ya kuvidisa samu na mfunu ya nene kuluta ya kuzaba Yesu-Klisto, Mfumu ya munu. Samu na yandi, mu me vidisa bima nyonso, mpe mu ke tala yawu bonso bosoto, samu ti mu zwa Klisto, 9mpe ba kumona munu na kati ya yandi, mu kele ve na mambu ya kudedama ya munu mosi yina ke katuka na Nsiku, kasi yina ke katuka na kiminu na Klisto—mambu ya kudedama yina ke katuka na Tata ya beto, yina me simbama na kiminu, 10samu ti mu zaba yandi, ngolo ya mvumbukulu ya yandi, na kukabula bampasi ya yandi, na kukuma bonso yandi na lufwa, 11kana na mutindu mosi mu lenda kukuma na mvumbukulu na lufwa.
12Mu me zwa yawu dezia ve, to mu me lunga dezia ve, kasi mu ke landa na ngolo samu na kusimba yawu yina samu na yawu Yesu-Klisto simbaka munu. 13Bampangi, mu ke banza ve ti mu me simba yawu dezia. Kasi dyambu mosi: mu ke vila mambu yina kele na manima, mpe mu ke sala ngolo na kubaka mambu yina kele na ntwala, 14mu ke kwenda na ngolo tii na suka, samu na difuta ya mbokilu yina Tata ya beto ke bokila beto na zulu na Yesu-Klisto. 15Beto nyonso yina kele bantu ya kuyela, bika beto banza mutindu yayi; kana beno ke banza na mutindu ya nkaka na dyambu mosi, Tata ya beto ke monisa beno yawu mpe. 16Kaka, beto landa na kyeleka mambu yina beto me zwa dezia.
17Bampangi, beno landa mbandu ya munu beno nyonso, mpe beno tala bayina ke zinga na kulanda kifwani yina beto me pesa beno. 18Bantu mingi ke zinga bonso bambeni ya kulunsi ya Klisto—mu zabisaka beno yawu bambala mingi, mpe ntangu yayi mu ke tuba yawu na mansanga. 19Nsuka ya bawu kele mbebisa, nzambi ya bawu kele kivumu, nkembo ya bawu kele nsoni ya bawu, mabanza ya bawu me tula kaka na mambu ya yinza. 20Kasi beto kele bantu ya kinsi ya zulu; mpe beto ke vingila na nsatu ya ngolo Muvuukisi yina ke katuka kuna, Mfumu Yesu-Klisto, 21yina ke soba nzutu ya beto ya kinsukami samu ti yawu kufwanana na nzutu ya yandi ya nkembo, na ngolo yina ke tulaka bima nyonso na nsi ya kiyeka ya yandi.