Joshua 22

22 ¹Chieina Joshuana Reubennaobing, Gadnaobing kala Manasseh shang tangkhaili hokhui, ²kala athumli hānga, "Nathumna ithumwui Avāwui rao Mosesna nathumli kakaso saikora mayonhaira, kala ina nathumli kakaso saikorali iwui kahāng nganāhaira. ³Nathumna atam kachungkha hi aja rāshungda nathumwui achinābingli mahorhaimana, kha nathumwui Avāwui ningkhamiwui ot mayonhaira. ⁴Ara nathumwui Avāna awui ngashit kahai kathāda nathumwui achinābingli ngasāmkakhui mihaira. Chiwui vang eina ithumwui Avāwui rao Mosesna Jordan lākhavāk nathumli mikahai, nathumna shimlui khuikahai ngalei chili nathumwui kachonshimli hanungserulu. ⁵Kha ithumwui Avāwui rao Mosesna nathumli kakaso ningkhami eina ain chi sākhavai nathum khalatta nganātitkhuilu: nathumwui Avāli leishilu, awui shongfa saikorali zatlu, awui ningkhami mayonlu, ali shurchinglu, kala nathumwui wuklung katonga kala manglā katonga eina ali otram ngatha̱lu."

⁶Chieina Joshuana athumli somida chihovāhaowa, kala athum athumwui kachonshimli unghaowa. ⁷Mosesna Manasseh shang tangkhaili Bashanli shimlui mikahaina; kha khangatei tangkhaili Joshuana Jordanwui zingtunshong athumwui achinābingli ngasoda shimlui mi. Joshuana athumli kachonshimli chihovā tharan, ana athumli somi. ⁸Ana athumli hānga, "Lan kachungkha eina, sha̱kei kachungkha, lupā, sinā, pithrai, mari, kala kachon kachungkha eina nathumwui shimli ungulu. Nathumwui yangkashebingwui eina ngaponkakhui chi nathumwui achinābingli ngayarmilu."

Athumwui Avāwui Shākhi Sākhavai Hanphut Akha

⁹Chieina Reuben, Gad, kala Manasseh shang tangkhaina Canaan ngaleili khalei Shilohli Israelnaobingwui eina ngalanlaga athumwui shimlui khalattawui ngalei Gileadli hanunghaowa; ithumwui Avāna Mosesli hokakaso thishurda chili sompama. ¹⁰Canaan ngaleili khalei Jordanwui apamli rā tharan, Reubennaobing, Gadnaobing, kala Manasseh shang tangkhaina chili Jordan kongli asān-aret yarkhoka hanphut akha sākhui. ¹¹Israelnaobingna hithāda shāhaowa, "Yanglu, Reubennaobing, Gadnaobing, kala Manasseh shang tangkhaina Canaanli yangkhangasung Jordanwui apamli Israelnaobingwui lākhavāk hanphut akha sakāhaira." ¹²Israelnaobingna chi shā tharan, Israelnaobingwui ashangva̱ katonga athumli rai ngarar khavai Shilohli rākazipa. ¹³Israelnaobingna pāngmon Eleazarwui naomayara Phinehasli Gileadli khalei Reubennaobing, Gadnaobing, kala Manasseh shang tangkhaili chihovāhaira, ¹⁴ali ngasoda akhavā tharā, Israelwui shang kachiva̱wui eina avāva̱ ngarāwui shim kachiva̱wui vang akha; athum kachiva̱ Israelwui shimkhurbingli ngarumda avāva̱ ngarāwui shimwui akhavāna. ¹⁵Athumna Gilead ngaleili khalei Reubennaobing, Gadnaobing, kala Manasseh shang tangkhaili rāhānga, ¹⁶"Ithumwui Avāwui ashangva̱ katongana ngahāna: 'Aja awui thi shurthuwa eina ngalanlaga, ali ngakaishi khavai nathum khalattawui vang aja hanphut akha sākhuida, Israelwui Vare, ithumwui Avāli hi khayon khisāhaokhala? ¹⁷Peorwui morei chi ithumwui vang shapa maningmala? Aja rāshungda chiwui eina ithum khalatta makatharana, ithumwui Avāwui ashangva̱li kazātkashina sāthata thoukainao, ¹⁸chi aja nathum ithumwui Avā thi shurwui eina pākthuihaorala? Aja ali ngakaishiakha, akhama ana Israel ashangva̱ saikorali malungvātra. ¹⁹Kha nathumwui shimlui lam makathar leiakha, chithākha awui tabernacle kapam ithumwui Avā shimlui lam chili kānkālaga ithumwui ngachaili shimlui khuilu. Kha ithumwui Avāli mangakaishialu, kala ithumwui Avā hanphut khangatei hanphut akha nathum khalattawui vang sākhuida ithumli nathum ngasoda ngakaikashi masāmilu. ²⁰Zerahwui naomayara Achanna tharchigat kahai chili ningtongda mashitkasangwui vang masā, Israel ashangva̱ saikorali malungkhavāt khuirai maningmala? Kala chikathā khayonkhamāngwui vang thikahai a apong maningmana.'"

²¹Reubennaobing, Gadnaobing kala Manasseh shang tangkhaina Israel shimkhurwui kathānabingli ngahānkai. ²²"Pangshapa ithumwui Avā! Pangshapa ithumwui Avā! Ana thei, kala Israel khalattanala theiranu! Ithumwui Avāli ngakaikashi lah mashitkasangwui vang leiakha, aja ithumli mashivāmalu, ²³ithum khalattawui hanphut ithumwui Avā thi shurwui eina pākhaida sākhui, lah chiwuitungli rikkatā kachigat, tharāzāt kachigat, lah ningyatchigat chigatkhami leiakha, ithumwui Avā khalattana ithumli bichar sāmiranu!

²⁴Chi maningmana, naoda rāki kaji atamli nanao ngarāna ithumwui naongarāli, 'Nathum eina ithumwui Avā, Israelwui Vareli khiotkha ngasozata leikhala?' da ngararakha da ngacheelu eina ithumna hi sai. ²⁵Kaja ithumwui Avāna Jordan chi ithum eina nathumwui ngachaili thari sāhaira, O Reubennaobing kala Gadnaobing, nathumwui vang awuili ngatei maleimana.' Chithāda nanao ngarāna ithumwui naongarāli ithumwui Avāli khangachee sāwui eina phāhainaora. ^a a v25 Zingshoshong shangbingwui khangachee kachangkhathui china lam pongli maningmana, kha ithumwui Avāwui sāda leikhala kaji pongli sai—atam akhali athumwui naongarāli, 'Avāli nathumwui ngatei maleimana' da hāngmiranu da khangacheera. Kasung saikora chi kachangkhat eina khipā arui eina tangda awuina sākhala kaji pongna.

²⁶Chiwui vang eina ithumna hānga, 'Ithum khalattawui vang hanphut akha sākhuisa, rikkatā kachigatwui vang maningla, pha̱kaphayāwui vang maningla, ²⁷kha ithum eina nathumwui ngachaili, kala ithumwui thili rākhanao thotli shākhi akha, ithumna awui mangāli rikkatā kachigat, pha̱kaphayā, kala ningyatchigat eina ithumwui Avāli otram ngatha̱ra da chitheikhavaina; chithāda naoda rāki kaji atamli nanao ngarāna ithumwui naongarāli, "Nathumwui vang ithumwui Avāli ngatei maleimana" da mahāngmara.'

²⁸Ithumna phaninga, athumna hi ithumli lah ithumwui rākhanao thotli hāngakha, ithumna ngahānkāra, 'Ishāvā ngarāna sākahai ithumwui Avā hanphutwui ngayo chi yanglu; hi rikkatā kachigat lah pha̱kaphayāwui vang maningla, kha ithum eina nathumwui ngachaili shākhi akhana.'

²⁹Awui pamkhavai mangāli khalei ithumwui Avā hanphut khangatei rikkatā kachigat, tharāzāt kachigat, lah pha̱kaphayāwui vang hanphut akha sākhuida, ithumna ithumwui Avāli khipānakha mangakaikashimara, lah aja awui thi shurwui eina mapākthuimara!"

³⁰Pāngmon Phinehas, ashangva̱wui akhokabing, kala awui ngasokazata Israel shimkhurwui kathānabingna Reubennaobing, Gadnaobing kala Manassehnaobingna kahāng chi shālaga, chi athumli ningyāng unglakhaowa. ³¹Pāngmon Eleazarwui nao Phinehasna Reubennaobing, Gadnaobing kala Manassehnaobingli hānga, "Ithumwui Avā ithumli ngasomi kaji aja ithumna thei, khikhalajila nathumna ali chithāda mayankasaimana. Ara nathumna Israelnaobingli ithumwui Avā pāngwui eina huikhuihaira." ³²Pāngmon Eleazarwui nao Phinehas kala akhokabingna Gileadli Reubennaobing kala Gadnaobingli horhailaga, Canaanli khalei Israelnaobingli latunglaga athumli unghāngsera. ³³Chi khamatui china Israelnaobingli ningyāng unglakhaowa, kala Israelnaobingna ithumwui Avāli sochikatta Reubennaobing kala Gadnaobing kapama lam sāshimān khavai athumwui ngalemli rai sākhavai mamatuiluimana. ³⁴Reubennaobing kala Gadnaobingna hanphut chili 'Shākhi' da phokmi, "Khikhalajila," athumna hānga, "hi ithumwui Avā chi Varena da ithumwui ngachaili shākhi akhana."