Joshuana Israelli Ngavaptit Khavai Hokhui
Joshuana, ararhaida, ararbing kala akuibingli hokhuilaga awui ngashemtui kachangkhat eina hānga: ngachāpamlu; ngaleili kahaiwui yur khangatei kala athumwui varebing eina ngarumhaida ngalā ngakhot maleilu. Ana kathei kahai eina ngashema — ithumwui Avāwui ngashit kahai akhala maungkashung maleimana — kala makaphā tuibingla chithāda ungshungra da hānga.
23 1Ithumwui Avāna Israelli athumwui kuimareida khalei yangkashe saikorawui eina ngasāmkhui ngasakpai kasāngkha atam thili, Joshuana sarhaida zingkum kachungkha okpeida rarlak eina lei. 2Joshuana Israel saikora, ararbing, akuibing, bicharsamebing kala otva̱bingli hokhuilaga hānga, "I sarhaira, zingkum kachungkha okpeida kāhaira. 3Nathumwui Avāna nathumwui vang hi miyur saikorali sākahai chi saikora nathumna theihaira; nathumwui Avāna nathumwui vang ngararhaira. 4Yanglu, ina nathumwui shangbingwui shimlui sākhavai hi taikahai miyurbing kala ina katatkhui miyur saikora Jordanwui eina zingtunshong khalei Khareiya Yirei eina tangda nathumli mihaira. 5Nathumwui Avā khalattana athumli namtaida nathumwui mangāli athumli kashamshokra, kala nathumwui Avāna nathumli ngashit kahai athishurda, nathumna athumwui ngalei shimlui khuira.
6Moseswui ain lairikli kapi kahai saikora mikyan angatar eina makhareilakla mayonda sākhavai, nathum kachungkha yāngla leilu. 7Nathumwui ngachaili taikahai hi miyurbing eina mamanātpaimana. Athumwui varebingwui ming masinglakalu, athumwui mingli mamingzaipaimana; athumli otram mathāpaimana, athumli makhorumpaimana. 8Kha aja rāshungda nathumna sākahai athishurda nathumwui Avāli ngavaptitlu.
9Nathumwui Avāna nathumwui mangāli reikhamatai kala kapangpanga miyurbingli kashamshokhaowa; aja rāshungda khipānakha nathumwui mangāli nganinga mi akhala maleimana. 10Nathumwui ngachaili mi akhana mi thing khāmshapra, kaja ana nathumli ngashit kahai athishurda nathumwui Avā khalattana nathumwui vang ngararra. 11Chiwui vang eina nathumwui Avāli leishi khavai nathum khalattali ning ngasharlu. 12Kha kalikha nathum ngalanhaida nathumwui ngachaili taikahai hi miyurbingli ngavapta, athumli ngalā ngakhotta, nathum eina athum, athum eina nathum manātromakha, 13Nathumwui Avāna nathumwui mangāli hi miyurbingli makashamshokluimara kaji nathumna mashung eina theilu. Nathumwui Avāna nathumli mikahai hi kaphā ngalei eina nathum mashimānranglakha eina tangda, athum nathumwui vang khalen kala khailan, nathumwui kashanli lijei kala nathumwui mikli ka̱shāt ngasāra.
14Ara ina okathui saikorawui shongfali vāki kajina. Nathumwui Avāna nathumwui pongli ngashit kahai kaphā tuibing chi tuikhur akhala makaimana kaji nathumna nathumwui ning saikora kala manglā saikora tongda thei; saikora nathumwui vang shokhaira; tuikhur akhala makaimana. 15Nathumwui Avāna nathumli hāngkahai kaphā tuikhur saikora shokkahai athishurda, chithāda ana nathumli mikahai hi kaphā ngalei eina nathum mashimānranglakha eina tangda, ana nathumwuitungli makaphā ot saikora rāngasakra. 16Nathumna ana nathumli kaso kahai nathumwui Avāwui tuingashit chi sātekhaida, vāda vare khangateibingli otram ngatha̱da athumli khorumakha, nathumwui Avāwui malungvāt nathumwuitungli hakmahāra, kala ana nathumli mikahai kaphā ngalei eina ngalāngda nathum shimān ngasakra."
