Joshua 24

24 ¹Joshuana Israelwui shang saikorali Shechemli kazipkhui, kala awui khararnao, akhavābing, bichar kasābing, kala otva̱bingli hokhui, kala athum ithumwui Avā mangāli nganinga.

²Joshuana mi saikorali hānga, "Ithumwui Avā, Israelwui Varena hithāda hānga: "Achālakha Abraham eina Nahorwui avāva̱ Terah kala nathumwui avāngarāna Euphrates kong makānda pamda vare kateibingli otram ngatha̱ya.' ³Ina nathumwui avāva̱ Abrahamli Kong makānda khaleiwui eina khuilaga Canaan ngalei saikorali zangda thānvai, awui naomayarabingli mayāsangmi, kala ali Isaac mi. ⁴Ina Isaacli Jacob eina Esau mi, Esauli Seir Kaphungli shimlui sākhavai mi, kha Jacob kala awui naomayarabingna Egyptli tāhaowa.

⁵'Ina Moses eina Aaronli chihovā, ina athumwui alungli sākahai eina Egyptli ngaphitta, chiwui thili nathumli khuikashoka.' ⁶Ina nathumwui ava̱ngarāli Egyptwui eina khuikashoka; nathum yireili vāshunga. Egyptnaobingna siguigari eina sigui katongabing eina nathumwui ava̱ngarāli Red Sea tāshungda kharoma. ⁷Athumna ili ngakao tharan, ina nathum eina Egyptnaobingwui ngachaili tangkhamang hai, yirei chi athumwuitungli khuirai, kala athumli khaluiphinhaowa. Nathumwui mik eina Egyptli ina sākahai chi theihaira. Chiwui thili nathum lamhāngli sāngnā ngayurpamhaira.

⁸'Ina nathumli Jordan makānda khalei Amorwui ngaleili thānvai. Athumna nathumli rai rātai; ina athumli nathumwui pāngli mi, kala nathumna athumwui ngalei khui. Ina athumli nathumwui miktāli shimān ngasaka. ⁹Chitharan Moab awunga Zipporwui naomayara Balakna ngakarthuida Israelli rai rātai. Ana Beorwui naomayara Balaamli nathumli khonshi khavai chihovāda hokhui, ¹⁰kha ina Balaamwui tui makhuisangthuwa, chiwui vang ana nathumli latluida latluida somi, kala ina nathumli awui pāng eina kankhui.

¹¹Nathumna Jordan kānda Jericholi vai. Jerichowui mibing, Amornaobing, Periznaobing, Canaannaobing, Hitnaobing, Girgashnaobing, Hivnaobing, Jebusnaobingna nathumli rai rātai; kha ina athumli nathumwui pāngli mi. ¹²Ina nathumwui miktāli shileng chihovā; chi nathumwui miktāli Amorwui awunga khanili kashamshoka; chi nathumwui raighai eina maningla, nathumwui malā eina maningmana. ¹³Nathumna ot masā kahai ngalei kala nathumna masā kahai keinungbing ina nathumli mi, kala nathum chili pamda lei; nathumna mavāsang kahai drakhā yāmgui eina olive yāmguiwui kashok chi shaira.'"

¹⁴Ara ithumwui Avāli ngacheelu; ningsākhangazip kala ning katong eina ali otram ngatha̱lu. Nathumwui avāngarāna Kong makānda khalei kala Egyptli otram ngatha̱ kahai varebing chi khuithuiulu, kala ithumwui Avāli otram ngatha̱lu. ¹⁵Kha ithumwui Avāli otram ngatha̱ chi nathumwui miktāli makaphā thāda leiakha, Kong makānda khalei nathumwui avāngarāna otram ngatha̱ kahai varebing lah nathumna pamda khalei ngalei Amornaobingwui varebing, aja nathumna khipāli otram ngatha̱khala da nathum khalattawui vang pangkhuilu. Kha iva eina iwui shimkhurva, ithumna ithumwui Avāli otram ngatha̱ra."

¹⁶Mibingna ngahānkai, "Vare kateibingli otram ngatha̱ khavai ithumna ithumwui Avāli khikha mahorhaimara. ¹⁷Kaja ithumwui Avāna ithum eina ithumwui ava̱ngarāli Egypt ngalei, narkahai shimwui eina khuikashoka, kala ithumwui miktāli machutkakhui kahak hibing sai. Ithumna zatvākahai apong saikorali kala ithumna zangvākahai miyur saikorawui alungli ana ithumli mayonmi. ¹⁸Kala ithumwui Avāna ngaleili khalei Amornaobingla zangda ithumwui mangāli mibing saikora kashamshokhaowa. Ithumla ali otram ngatha̱ra, kaja a ithumwui Avāna."

¹⁹Joshuana mibingli hānga, "Nathumna ithumwui Avāli otram ngatha̱rarmana; kaja a kathara Vare, mikpaishikatha Varena. Ana nathumwui salāng kala morei mapheomimara. ²⁰Kalikhada nathumna ithumwui Avāli horhaida khangatei varebingli otram ngatha̱akha, ana ngalanlaga, nathumli kaphā sāmiwui thili, nathumli sākashi sāda shimān ngasakra."

²¹Kha mibingna Joshuali hānga, "Maningmana! Ithumna ithumwui Avāli otram ngatha̱ra."

²²Chieina Joshuana mibingli hānga, "Nathumna ali otram ngatha̱ khavai ithumwui Avāli kapangkhui kaji nathum khalattali shākhina." "Ithum shākhina," da athumna hānga.

²³"Ara nathumwui ngachaili khalei khangatei varebing chi horhaolu, kala nathumwui ning ithumwui Avā, Israelwui Vareli ngareiunglu."

²⁴Kala mibingna Joshuali hānga, "Ithumna ithumwui Avāli otram ngatha̱ra, kala awui akhon ithumna khuisangra."

²⁵Chithang Joshuana mibingli tuingashit akha sai, kala Shechemli athumli shiyan-chikan kala sharphahor sāmi. ²⁶Joshuana tui saikora hi ithumwui Avāwui ain lairikli kapisangmi, chieina ngalung kahakva akha khuilaga ithumwui Avāwui katharapamli khalei shirimthingpheili shuna.

²⁷Joshuana mibing saikorali hānga, "Yanglu, ngalung hi ithumli shākhi sāra, kaja ithumwui Avāna ithumli hāngkahai tui saikora hi ana shāhaira. Chi nathumli shākhi sāra; maningakha nathumna nathumwui Avāli makhuisangpaishina." ²⁸Chieina Joshuana mibingli kachichāshi awui shimluili shiunserhaowa.

Avāwui Rao Joshua Ngasāmhaowa

²⁹Hiwui thili ithumwui Avāwui rao Nunwui naomayara Joshua zingkum shākha tharā okthuilaga thihaowa. ³⁰Athumna ali Ephraimwui kaphungramli Gaash Kaphungwui zingtun khalei awui shimlui Timnath-serah chili chifahaowa. ³¹Israelna Joshuawui mirin peida kala ali okpeikhamei khararnaobingwui mirin peida, ithumwui Avāna Israelwui vang kahaka ot sāmi kahai saikora katheiya athum, ringlakha eina tangda ithumwui Avāli otram ngatha̱sai. ³²Israelwui mibingna Egyptwui eina khuikā kahai Josephwui ara̱kui chi Shechemli, Jacobna Shechemwui avāva̱ Hamorwui naongarāwui eina lupāsā shākha mida lokhui apam chili chifahaowa; chi Josephwui naongarāwui shimlui ngasāhaowa. ³³Aaronwui naomayara Eleazarna thihaowa, kala Ephraimwui kaphungramli awui naomayara Phinehasli mikahai Gibe-ahli athumna ali chifahaowa.