ኢያሱ 24 FHB Father's Heart Bible™

24 ¹ኢያሱ ድማ ንዅሎም ነገዳት እስራኤል ናብ ሴኬም ኣከቦም፤ ንዓበይቱን ንሓለቕቱን ንፈራዶኡን ንሹመኛታቱን ፀዊዑ ድማ ኣብ ቅድሚ ኣቦና ደው በሉ።

²ኢያሱ ድማ ንዅሉ እቲ ህዝቢ ከምዙይ በሎም፦ “ኣቦና፥ ኣምላኽ እስራኤል፥ ከምዙይ ይብል ኣሎ፦ ‘ኣቦታትኩም ካብ ጥንቲ ጀሚሮም ኣብ ማዕዶ ሩባ ኤፍራጥስ ይነብሩ ነበሩ፤ ታራ፥ ኣቦ ኣብርሃምን ናኮርን፥ ንኻልኦት ኣማልኽቲ ኸዓ የገልግሉ ነበሩ።’ ³ንኣቦኹም ኣብርሃም ካብ ማዕዶ እቲ ሩባ ወሲደ፥ ብዅሉ ምድሪ ከንኣን መሪሐዮ፥ ዘርኡ ኣብዚሐ፥ ንይስሓቅ ድማ ሃብክዎ። ⁴ንይስሓቅ ድማ ያእቆብን ኤሳውን ሃብክዎ፤ ንኤሳው ከዓ እምባ ሴይር ክወርሶ ሃብክዎ፤ ያእቆብን ደቁን ግና ናብ ግብፂ ወረዱ።

⁵‘ንሙሴን ንኣሮንን ለኣኽኩ፤ ንግብፂ ድማ በቲ ኣብ ማእኸሎም ዝገበርክዎ ወቓዕክዋ፤ ድሕሪኡ ኸዓ ኣውፃእኹኹም።’ ⁶ንኣቦታትኩም ካብ ግብፂ ኣውፃእክዎም፤ ናብ ባሕሪ ድማ በፃሕኹም። ግብፃውያን ከዓ ብሰረገላታትን ብፈረሰኛታትን ንኣቦታትኩም ክሳዕ ባሕሪ ኤርትራ ሰዓብዎም። ⁷ናባይ ምስ ኣእወዩ ድማ ኣብ መንጎኹምን ግብፃውያንን ፀልማት ገበርኩ፥ ነቲ ባሕሪ ኣብ ልዕሊኦም ኣምፂአ ኸዓ ኸደንክዎም። ኣዒንትኹም ድማ እቲ ኣብ ግብፂ ዝገበርክዎ ረአያ። ድሕሪኡ ኸዓ ነዊሕ ዘመን ኣብ ምድረ በዳ ተቐመጥኩም።

⁸‘ናብታ ኣብ ማዕዶ ዮርዳኖስ ዘላ ምድሪ ኣሞራውያን ኣእተኹኹም። ንሳቶም ድማ ተዋግኡኹም፤ ኣነ ኸዓ ናብ ኢድኩም ኣሕሊፈ ሃብክዎም፤ ንምድሮም ድማ ወረስኩም። ካብ ቅድሜኹም ከዓ ኣጥፋእክዎም። ⁹ሽዑ ባላቅ ወዲ ሴፎር፥ ንጉስ ሞኣብ፥ ተሲኡ ምስ እስራኤል ተዋግአ። ንኺረግመኩም ድማ ለኣኸ፥ ንበለዓም ወዲ ቢዖር ፀውዐ፤ ¹⁰ኣነ ግና ንበለዓም ክሰምዖ ኣይደለኹን፤ ስለዙይ ደጋጊሙ ባረኸኩም፤ ካብ ኢዱ ኸዓ ኣናገፍኩኹም።

¹¹ንዮርዳኖስ ተሳጊርኩም ናብ ኢያሪኮ መፃእኹም። ሰብ ኢያሪኮ ኸዓ ተዋግኡኹም፤ ኣሞራውያንን ፈሪዛውያንን ከነዓናውያንን ኬጢያውያንን ጌርጌሳውያንን ሔዋውያንን ኢያቡሳውያንን፤ ኣነ ግና ናብ ኢድኩም ኣሕሊፈ ሃብክዎም። ¹²ቀቅድሜኹም ድማ ዕኮት ለኣኽኩ፤ ነቶም ክልተ ነገስታት ኣሞራውያን ከዓ ካብ ቅድሜኹም ሰጐጎም፤ እዙይ ከዓ ብሰይፍኹም ወይ ብቐስትኹም ኣይኮነን። ¹³ዘይፃዓርኩምላ ምድሪ፥ ዘይሰራሕኩመን ከተማታት ድማ ሃብኩኹም፥ ኣብአን ከዓ ትነብሩ ኣለኹም፤ ካብቲ ዘይተኸልኩምዎ ኣታኽልቲ ወይንን ኣታኽልቲ ዘይትን ድማ ትበልዑ ኣለኹም።’”

¹⁴“ሕዚ ድማ ንኣቦና ፍርሑ፥ ብቕንዕናን ብሓቅን ድማ ኣገልግልዎ። ነቶም ኣቦታትኩም ኣብ ማዕዶ እቲ ሩባን ኣብ ግብፅን ዘገልገልዎም ኣማልኽቲ ኣርሕቑ፥ ንኣቦና ኸዓ ኣገልግልዎ። ¹⁵ንኣቦና ምግልጋል ክፉእ ኮይኑ እንተ ተራእየኩም ግና፥ ንመን ከም እተገልግሉ ሎሚ ንነፍስኹም ምረፁ፤ ነቶም ኣቦታትኩም ኣብ ማዕዶ እቲ ሩባ ዘገልገልዎም ኣማልኽቲ ኾነ፥ ወይ ነቶም ኣብ ምድሮም እትነብሩ ዘለኹም ኣማልኽቲ ኣሞራውያን፤ ኣነን ቤተሰበይን ግና ንኣቦና ኢና እነገልግል።”

¹⁶እቲ ህዝቢ ድማ ከምዙይ ኢሉ መለሰ፦ “ንኻልኦት ኣማልኽቲ ኸነገልግል፥ ንኣቦና ፈፂምና ኣይንሓድጎን ኢና። ¹⁷ኣቦና ንኣናን ንኣቦታትናን ካብ ምድሪ ግብፂ፥ ካብ ቤት ባርነት ኣውፂኡና፥ እዞም ዓበይቲ ትእምርቲ ድማ ኣብ ቅድሚ ኣዒንትና ገይሩ እዩ እሞ። በቲ ዝተጓዓዝናሉ ዅሉ መንገድን ብማእኸል ኵሎም እቶም ዝሓለፍናዮም ህዝብታትን ድማ ሓለወና። ¹⁸ኣቦና ድማ ንዅሎም ህዝብታት፥ ነቶም ኣብታ ምድሪ ዝነብሩ ዝነበሩ ኣሞራውያን ከይተረፈ፥ ካብ ቅድሜና ሰጐጎም። ስለዙይ ንሕናውን ነገልግሎ ኢና፤ ንሱ ኣቦና እዩ እሞ።”

¹⁹ኢያሱ ድማ ነቲ ህዝቢ “ንኣቦና ኸተገልግሉ ኣይትኽእሉን ኢኹም፤ ንሱ ቅዱስ ኣምላኽ፥ ቀናእ ኣምላኽ እዩ። ንበደልኩምን ንሓጢኣትኩምን ኣይሓድገልኩምን እዩ። ²⁰ንኣቦና ሓዲግኩም ንባዕዳን ኣማልኽቲ እንተ ኣገልጊልኩም፥ ድሕሪ እቲ ዝገበረልኩም ሰናይ፥ ተመሊሱ ኽፉእ ከውርደልኩምን ከጥፍአኩምን እዩ” በሎም።

²¹እቲ ህዝቢ ግና ንኢያሱ “ኣይፋሉን! ንኣቦና ኢና እነገልግል” በልዎ።

²²ሽዑ ኢያሱ ነቲ ህዝቢ “ንኣቦና ኸተገልግልዎ ኸም ዝመረፅኩምዎ፥ ንነፍስኹም ባዕልኹም መሰኻኽር ኢኹም” በሎም። ንሳቶም ከዓ “መሰኻኽር ኢና” በሉ።

²³“ሕዚ ድማ ነቶም ኣብ ማእኸልኩም ዘለዉ ባዕዳን ኣማልኽቲ ኣርሕቑ፥ ልብኹም ድማ ናብ ኣቦና፥ ኣምላኽ እስራኤል፥ ኣቕንዑ።”

²⁴እቲ ህዝቢ ድማ ንኢያሱ “ንኣቦና ኢና እነገልግል፥ ድምፁ ኸዓ ክንሰምዕ ኢና” በልዎ።

²⁵ኢያሱ በታ መዓልቲ እቲኣ ምስ እቲ ህዝቢ ኪዳን ኣተወ፥ ኣብ ሴኬም ድማ ሕግን ስርዓትን ገበረሎም። ²⁶ኢያሱ ድማ ነዘን ቃላት እዚኣተን ኣብ መፅሓፍ ሕጊ ኣቦና ፀሓፈን፥ ዓብዪ እምኒ ኸዓ ወሲዱ ኣብኡ፥ ኣብ ትሕቲ እቲ ኣብ ጥቓ መቕደስ ኣቦና ዝነበረ ዓብዪ ኦም ኣቘሞ።

²⁷ኢያሱ ድማ ንዅሉ እቲ ህዝቢ “እንሆ፥ እዝ እምኒ እዙይ ነቲ ኣቦና ዝበለና ዅሉ ቃል ሰሚዕዎ እዩ እሞ፥ ኣባና ምስክር ክኸውን እዩ። ንኣቦኹም ከይትኽሕዱ ድማ ኣባኻትኩም ምስክር ክኸውን እዩ” በሎም። ²⁸ሽዑ ኢያሱ ነቲ ህዝቢ፥ ነፍሲ ወከፍ ናብ ርስቱ፥ ሰደዶም።

ኢያሱ፥ ኣገልጋሊ ኣቦና፥ ዓረፈ

²⁹ድሕሪ እዙይ ድማ ኢያሱ ወዲ ነዌ፥ ኣገልጋሊ ኣቦና፥ ወዲ ሚእትን ዓሰርተን ዓመት ኮይኑ ሞተ። ³⁰ኣብታ ወሰን ርስቱ፥ ኣብ ቲምናት ሴራ፥ ኣብ ኰረብታታት ኤፍሬም፥ ኣብ ሰሜን ጎቦ ጋዓሽ ድማ ቐበርዎ። ³¹እስራኤል ድማ ብዅሉ ዘመን ኢያሱ፥ ከምኡውን ብዅሉ ዘመን እቶም ብድሕሪ ኢያሱ ነዊሕ ዝፀንሑ እሞ እቲ ኣቦና ንእስራኤል ዝገበሮ ዅሉ ግብሪ ዝፈልጡ ዓበይቲ፥ ንኣቦና ኣገልገልዎ። ³²ነቲ ደቂ እስራኤል ካብ ግብፂ ዘምፅእዎ ኣዕፅምቲ ዮሴፍ ድማ ኣብ ሴኬም፥ ኣብታ ያእቆብ ካብ ደቂ ኤሞር፥ ኣቦ ሴኬም፥ ብሚእቲ ቕርሺ ብሩር ዝዓደጋ ኽፍሊ ግራት ቐበርዎ፤ ንደቂ ዮሴፍ ድማ ርስቲ ኾነቶም። ³³ኣልኣዛር ወዲ ኣሮን ድማ ሞተ፤ ኣብ ኰረብታታት ኤፍሬም፥ ኣብ ጊብዓ፥ እታ ንወዱ ፊንሃስ እተውሃበት ድማ ቐበርዎ።