Mi eng' bukuit

Joshua 24 FHB Father's Heart Bible™

Kiistoi 15% eng' kiy ne iale korook →
Bukuit

Kokwaak Kwandanyo imandanyi

Eng' Shekem, kong'alaal Kwandanyo ng'aleechooto tugul eng' kutinnyi ineegei, kobun Abraham ne mi pitoniin aineet agoi koriik che ma ki teech. Kokergong' Joshua piik koleweni; kochongu piik nyumnyum, ak koteiywech icheek. Kiteech koitet koek kaboorunet. Yeityo kome.

Ng'alaali Kwandanyo eng' mustarisyek 2–13

Sura 24.

Ki yum Joshua ortinwegap Israel tugul Shekem, ak koguur poisyekwak, metowekwak, kirwoogik, ak kiboitiinikyik, ak ki tonon eng' taitap Kwandanyo.

Ki leenji Joshua piik tugul, koleenji, “Ni ne le Kwandanyo, Kamuktaindetap Israel: ‘Keny komeny kwanisyekwok eng' pitoniin aineetap Yufrets—Tera, kwandap Abraham ak Nahor—ak kiboisyechi kamuktaik alak.’ Ki anam kwandang'wong' Abraham eng' pitoniin aineet, ak aindochi ineendet kolandae emetap Kanaan komugul, ak asigisyi lagokyik, ak agoochi Isak. Ki agoochi Isak Jakobo ak Esau, ak agoochi Esau tulweetap Seir koname, ago ki ba Jakobo ak weeriikyik Misiri.

“‘Ki ayookto Musa ak Aron, ak aiboocha Misiri eng' ko uu che ki ayai kwenunnywa, yeityo amang'une okweek.’” Ki amang'une kwanisyekwok eng' Misiri; ak ki oit nyanjet. Ki oon Misiriik kwanisyekwok eng' kariisyek ak piik che ketei paraisisyek agoi nyanjet ne Biriiren. Ye ki riireenjo, ki ande mesundeito kwenung'wong' ak Misiriik, ak aibu nyanjet kobunji icheek, ak atuch icheek. Ki keer konyekwok ko uu che ki ayai Misiri. Yeityo komeny okweek eng' surkwen kasarta ne koi.

“‘Ki aimut okweek emetap Amorik ne mi pitoniin Jordan. Ki obargei; ak ande icheek eung'wong', ak ki onam emennywa. Ki awong' icheek eng' taing'wong'. Yeityo king'eet Balak weeriitap Sipor, laitoryatap Moab, ak kobargei ak Israel. Ki yookto koguur Balaam weeriitap Beor kochubu okweek, Ago ma amache agas Balaam, nooto anyun ki koberurok agaigai agaigai, ak ki asarwok eng' eunnyi.

Ki olande Jordan koba Jeriko. Ki obargei ak piik che menyei Jeriko—Amorik, Perisik, Kanaanik, Hitik, Girgasik, Hibik, Jebusik—ago ki ande icheek eung'wong'. Ki ayookyini kaaraamyet eng' taing'wong'; ak ki koon laitorinik aeng' che po Amorik eng' taing'wong'—ma eng' rotwetap chok anan kwong'uguk. Ki agoonok emet ne ma oyai poisyet agobo, nganasook che ma ki oteeche—ak omenye eng' icheek; oame eng' mbareenigap sabibuk ak mseituni che ma ki omin.’

Nguno, oiywei Kwandanyo, oboisyechi eng' imanda ak lititindo. Oiste kamuktaik che ki boisyechi kwanisyekwok eng' pitoniin aineet ak eng' Misiri, ak oboisyechi Kwandanyo. Ago ngot ko ya eng' okweek oboisyechi Kwandanyo, olewenjigei rani ne oboisyechi—kamuktaik che ki boisyechi kwanisyekwok eng' pitoniin aineet, anan kamuktaigap Amorik che omenye emennywa. Ago anee ak koonnyu ko keboisyechi Kwandanyo.”

Ki wol piik koleenji, “Matabagaakta Kwandanyo si keboisyechi kamuktaik alak. Amu ki imutyech Kwandanyo kobooto kwanisyekyok eng' emetap Misiri, eng' kootap otwoknateet, ak ki yai kaborunetiguni che eecheen eng' taitap konyekyok. Ki riibech eng' ooreet tugul ne ki kiwendi, ak kwenutap piik tugul che ki kibwanunde. Ak ki koon Kwandanyo eng' tainnyo piik tugul, kobooto Amorik che menyei emet. Keboisyechi agine acheek, amu ineendet Kwandanyo.”

Ki leenji Joshua piik, koleenji, “Momuuchi oboisyechi Kwandanyo—ineendet Kamuktaindet ne Tiliil, Kamuktaindet ne amei ng'etkong'. Ma nyochin kaat pistoeng'wong' ak tengekwogikwok. Ngot obagaakta Kwandanyo ak oboisyechi kamuktaik che po pororyosyek alak, koweeksei, ak koyaiywok ne ya, ak koamok, ye kiga koyaiywok ne myee.”

Ago ki leenji piik Joshua, koleenji, “Acha! Keboisyechi Kwandanyo.”

Yeityo ki leenji Joshua piik, koleenji, “Okweek paorinik agaigai okweek ki olewen Kwandanyo, si oboisyechi.” Ak koleen, “Acheek paorinik.”

“Nguno oiste kamuktaik che po pororyosyek alak che mi kwenung'wong', ak owechi mugulelwekwok Kwandanyo, Kamuktaindetap Israel.”

Ak ki leenji piik Joshua, koleenji, “Keboisyechi Kwandanyo, ak kegas kutinnyi.”

Ki yai Joshua arorutyet ak piik eng' peetuunooto, ak ki king'atyi ng'atuutyet ak kirwooget eng' Shekem. Ki sir Joshua ng'aleechu eng' Bukuitap Ng'atuutigap Kwandanyo, yeityo konam koita ne oo ak ki tononchi yooto eng' keetitap alayet ne neegitee ole-tiliil ne po Kwandanyo.

Ki leenji Joshua piik tugul, koleenji, “Keero, koita ni koek paornateet agaigai acheek, amu ki kogas ng'olyoot tugul ne ki mwaiwech Kwandanyo. Koek paornateet agaigai okweek, si matoeesyoe Kwandang'wong'.” Yeityo ki yookto Joshua piik koba, chiito age tugul koba kiwotennyi.

Karu Joshua, otwogindetap Kwanda

Kingo pata chuuto, kome Joshua weeriitap Nun, otwogindetap Kwandanyo, eng' kenyiisyek pogol ak taman. Ki tupchi ineendet eng' kiwotennyi eng' Timnat-sera, eng' tuloonoogap Ephraim, eng' murot kaataam ne tokyingei tulweetap Gaas. Ki boisyechi Israel Kwandanyo eng' peetuusyek tugul che po Joshua, ak eng' peetuusyek tugul che po poisyek che kita komi ko kagome Joshua, che kingen poisyet tugul ne ki yai Kwandanyo koyachi Israel. Kawegap Joseph, che ki koibu piigap Israel eng' Misiri, ki tupchi eng' Shekem, eng' kooret ne ki al Jakobo eng' silingisyek pogol agenge kobun lagogap Hamor, kwandap Shekem—ak ki ek kiwotetap iyotap Joseph. Kome Eleazar weeriitap Aron, ak ki tupchi eng' Gibea, ne ki kigoochi weeriinnyi Phineas eng' emetap tuloonook ne po Ephraim.