Yoshuwa Ya Kira Isra'ila su Manne da Ubanmu

Yoshuwa, da ya tsufa, ya tara shugabanni ya yi gargaɗi a sauƙaƙe: ku riƙe da ƙarfi, kada ku yi auratayya da sauran al'ummai ko gumakansu. Ya kafa hujja daga abin da ya gani — ko ɗaya daga cikin alkawuran Ubanmu bai fāɗi ba — ya kuma ce maganganun bala'i ma za su tabbata haka nan.

Babi na 23.

Bayan an daɗe, sa'ad da Ubanmu ya ba Isra'ila hutu daga dukan abokan gābansu da suke kewaye da su, Yoshuwa ya tsufa, shekarunsa kuma sun yi yawa. Sai Yoshuwa ya kira dukan Isra'ila — dattawa, da shugabanni, da alƙalai, da hafsoshi — ya ce musu, “Na tsufa, shekaruna kuma sun yi yawa. Ku da kanku kun ga duk abin da Ubanku ya yi wa dukan waɗannan al'ummai saboda ku; Ubanku ya yi yaƙi dominku. Ku duba, na raba muku waɗannan al'ummai da suka ragu, su zama gādo ga kabilanku, haɗe da dukan al'umman da na riga na kawar, daga Kogin Urdun har zuwa Babban Teku a wajen yamma. Ubanku da kansa zai ture su baya, yă kore su daga gabanku, ku kuma mallaki ƙasarsu, yadda Ubanku ya yi muku alkawari.

Ku ƙarfafa ƙwarai, ku kiyaye ku kuma aikata duk abin da aka rubuta a cikin littafin dokar Musa, kada ku karkata daga gare shi dama ko hagu. Kada ku gauraya da waɗannan al'ummai da suka ragu a cikinku. Kada ku ambaci sunayen allolinsu, kada kuma ku ranta da su; kada ku bauta musu, ko ku durƙusa musu. Amma ku manne da Ubanku, yadda kuka yi har wa yau.

Ubanku ya kori manya-manyan al'ummai masu ƙarfi daga gabanku; har wa yau kuwa babu wanda ya iya tsayawa da ku. Mutum ɗaya daga cikinku yakan kori dubu, gama Ubanku da kansa yana yaƙi dominku, yadda ya yi muku alkawari. Saboda haka ku kula da kanku ƙwarai, domin ku ƙaunaci Ubanku. Amma idan kuka juya baya, kuka manne da waɗannan al'ummai da suka ragu a cikinku, kuka yi auratayya da su, kuna gauraya da su su kuma da ku, to, ku tabbata Ubanku ba zai ƙara korar waɗannan al'ummai daga gabanku ba. Za su zama muku tarko da murɗiya, bulala a gefanku, da ƙaya a idanunku, har sai kun hallaka daga wannan ƙasa mai kyau da Ubanku ya ba ku.

Yanzu kuwa ina kan hanyar da dukan mutane a duniya suke bi. Kun sani da dukan zuciyarku da dukan ranku cewa, babu ko ɗaya daga cikin dukan abubuwa masu kyau da Ubanku ya yi muku alkawari da bai cika ba — duk sun cika a gare ku; babu ko ɗaya da ya kāsa cika. Kamar yadda kowace kyakkyawar magana da Ubanku ya yi muku ta cika, haka ma zai kawo muku kowane irin mugun abu, har sai ya hallaka ku daga wannan ƙasa mai kyau da ya ba ku. Idan kuka karya alkawarin Ubanku, wanda ya umarce ku da shi, kuka je kuka bauta wa waɗansu alloli, kuka durƙusa musu, fushin Ubanku zai ƙuna a kanku, ba za a daɗe ba kuwa sai an hallaka ku daga ƙasa mai kyau da ya ba ku.”