ኢያሱ 23

23 ¹አባታችን እስራኤልን በዙሪያቸው ካሉት ጠላቶቻቸው ሁሉ ካሳረፋቸው ከብዙ ዘመን በኋላ፣ ኢያሱ ሸመገለ፤ በዕድሜውም እጅግ ገፋ። ²ኢያሱም እስራኤልን ሁሉ፣ ሽማግሌዎቻቸውን፣ አለቆቻቸውን፣ ዳኞቻቸውንና ሹማምታቸውን ጠርቶ እንዲህ አላቸው፤ “እኔ ሸምግዬአለሁ፤ በዕድሜዬም እጅግ ገፍቻለሁ። ³አባታችሁ ስለ እናንተ በእነዚህ አሕዛብ ሁሉ ላይ ያደረገውን ሁሉ እናንተ አይታችኋል፤ ስለ እናንተ የተዋጋ አባታችሁ ነውና። ⁴እነሆ፣ እነዚህን የቀሩትን አሕዛብ፣ ያጠፋኋቸውንም አሕዛብ ሁሉ፣ ከዮርዳኖስ ጀምሮ በምዕራብ እስካለው እስከ ታላቁ ባሕር ድረስ፣ ለነገዶቻችሁ ርስት እንዲሆን አካፍዬላችኋለሁ። ⁵አባታችሁ ራሱ ከፊታችሁ ገፍቶ ያስወጣቸዋል፤ አባታችሁም ቃል በገባላችሁ መሠረት ምድራቸውን ትወርሳላችሁ።

⁶በሙሴ ሕግ መጽሐፍ የተጻፈውን ሁሉ ለመጠበቅና ለማድረግ እጅግ ጠንክሩ፤ ከእርሱም ወደ ቀኝ ወይም ወደ ግራ አትዘንብሉ። ⁷በመካከላችሁ ከቀሩት ከእነዚህ አሕዛብ ጋር አትደባለቁ። የአማልክቶቻቸውን ስም አትጥሩ፤ በእነርሱም አትማሉ፤ አታምልኳቸው፤ አትስገዱላቸውም። ⁸ነገር ግን እስከ ዛሬ ድረስ እንዳደረጋችሁት አባታችሁን አጥብቃችሁ ያዙ።

⁹አባታችሁ ታላላቅና ኀያላን አሕዛብን ከፊታችሁ አስወጥቷል፤ እስከ ዛሬም ድረስ በፊታችሁ የቆመ ማንም የለም። ¹⁰አባታችሁ ራሱ ቃል በገባላችሁ መሠረት ስለ እናንተ ይዋጋልና፣ ከእናንተ አንዱ ሺሕ ያባርራል። ¹¹ስለዚህ አባታችሁን ትወዱ ዘንድ ራሳችሁን በጥንቃቄ ጠብቁ። ¹²ነገር ግን ወደ ኋላ ተመልሳችሁ በመካከላችሁ ከቀሩት ከእነዚህ አሕዛብ ጋር ብትጣበቁ፣ ከእነርሱም ጋር ጋብቻ ብትፈጽሙ፣ እናንተ ከእነርሱ እነርሱም ከእናንተ ጋር ብትደባለቁ፣ ¹³አባታችሁ ከእንግዲህ እነዚህን አሕዛብ ከፊታችሁ እንደማያስወጣ በእርግጥ ዕወቁ። አባታችሁ ከሰጣችሁ ከዚህ መልካም ምድር እስክትጠፉ ድረስ፣ ለእናንተ ወጥመድና ፈንጂ፣ በጎናችሁም ጅራፍ፣ በዓይናችሁም እሾህ ይሆኑባችኋል።

¹⁴እነሆ፣ ዛሬ የምድር ሁሉ ሰው በሚሄድበት መንገድ ልሄድ ነው። አባታችሁ ስለ እናንተ ከተናገረው ከመልካሙ ነገር ሁሉ አንዱም እንዳልቀረ በፍጹም ልባችሁና በፍጹም ነፍሳችሁ ታውቃላችሁ፤ ሁሉ ተፈጽሞላችኋል፤ አንዱም አልቀረም። ¹⁵አባታችሁ የተናገራችሁ መልካም ቃል ሁሉ እንደ ተፈጸመላችሁ፣ እንዲሁ ከሰጣችሁ ከዚህ መልካም ምድር እስኪያጠፋችሁ ድረስ ክፉ ነገርን ሁሉ ያመጣባችኋል። ¹⁶ያዘዛችሁን የአባታችሁን ኪዳን ብትጥሱ፣ ሄዳችሁም ሌሎች አማልክትን ብታመልኩ ብትሰግዱላቸውም፣ የአባታችሁ ቁጣ በእናንተ ላይ ይነድድባችኋል፤ ከሰጣችሁም ከመልካሙ ምድር ፈጥናችሁ ትጠፋላችሁ።”