Yosuwe Wusi Tela Bisi Kiseledi Ndangu Bakhúndakana yi Tata
Yoswa, mbuta, wátela batwadisi amana wakeba ndongulu yandi yapheka: lukangala, ludisangaku yi makanda mana masadini kondilo yi banzambi ba bawu. Wazonza mu mana kamona — ni kilangi kimosi kya Tata wetu kazimbalaku — amana wuzimbudi ni ndinga za phasi phi zakála za kyedika mutindu wumosi.
23 1Kunima dya tangwa dilawu, buna Tata wetu káheka bisi Kiseledi kilembwadi mu bambeni ba bawu boosu bana bábazunga, Yosuwe kákala mbuta, mvula zandi zilutini. 2Yosuwe wátela bisi Kiseledi boosu: bambuta, bapfumu, bazusi yi batsinzidi, amana wuzimbudi: «Meni yenina mbuta, mvula zama zilutini kala. 3Benu lwámona moosu mana káhanga Tata wenu kwena makanda mana moosu kikuma kya benu, mukuma Tata wenu meni wánwana kikuma kya benu. 4Talenu, yíluheka hanga kimvwama kya bikanda byenu, makanda mana masadini, yi makanda moosu mana yitabula, tuka ku Yolutani tii yi kuna yanga dya mbuta ku ndamba. 5Tata wenu meni kabátinisa amana kabákukwasa ku thwala yenu, amana benu lwakála kuvwa tsi ya bawu, bwosu Tata wenu kálusila.
6Kalenu ngolu lawu mu kukeba yi mu kuhanga moosu mana másonama muna mukanda wa mitsiku mya Moyize, konda kubaluka ku koku dya lubakala kondilo ku koku dya lumonso. 7Ludisangaku yi makanda mana masadini ha kati dya benu. Lutelaku khumbu za banzambi ba bawu, ludyaku ndefi mu bawu; lubasadilaku, lufukamaku kwena bawu. 8Kaasi khúndakanenu yi Tata wenu, bwosu lubati hanga tii yi lelu.
9Tata wenu wákukwasa makanda ma lawu ma ngolu ku thwala yenu; ka mutu ku kátelama ku thwala yenu tii yi lelu. 10Mutu mosi mu kati dya benu wisi tinisa batu khama kumi, mukuma Tata wenu meni wisi nwana kikuma kya benu, bwosu kálusila. 11Buna, kebenu benu-benu bukheti-bukheti, hanga luzola Tata wenu. 12Kaasi yuka ni lwavutuka ku manima amana lwakhúndakana yi makanda mana masadini mu kati dya benu, lwakwela yi bawu, lwadisanga yi bawu amana bawu yi benu, 13luzayi bukheti ni Tata wenu kakukwasaku dyaka makanda mana ku thwala yenu. Bawu bakála mutambu yi wanda kikuma kya benu, fimbu mu mbandi zenu yi tsaku mu mesu menu, tii yikuna lwazíluka mu tsi yayi yimboti yina káluheka Tata wenu.
14Buthwena, meni yisi kwenda nzila yina yisi kwenda batu boosu ba ha tsi. Benu luzayi yi mbundu yenu yosu yi moya wenu wosu ni ka dyambu dimosi ku mu mambu mamboti mana kálusila Tata wenu kikuma kya benu dizimukaku; moosu málungana kwena benu, ka dyambu dimosi ku dyazimuka. 15Bwosu ndinga zoosu zimboti zina kázimbula Tata wenu kwena benu zalúngana, bwabuna kalúnatina mambu moosu ma mbi, tii yikuna kalúzanga mu tsi yayi yimboti yina káluheka. 16Yuka ni lwakulula bulunda bwa Tata wenu, buna káta yandi kwena benu, amana lwenda sadila banzambi bankaka yi lufukama kwena bawu, khabu ya Tata wenu yakála lema kwena benu, buna tswatsu lwazíluka mu tsi yimboti yina káluheka.»
