Joṣua 23

23 ¹Lẹ́yìn ìgbà pípẹ́ tí Baba wa ti fún Israẹli ní ìsinmi kúrò lọ́wọ́ gbogbo àwọn ọ̀tá wọn tí ó yí wọn ká, Joṣua ti dàgbà, ó sì ti lé lọ́jọ́ orí. ²Joṣua pe gbogbo Israẹli—àwọn àgbà, àwọn olórí, àwọn onídàájọ́, àti àwọn olóyè—ó sì wí fún wọn pé, “Èmi ti dàgbà, ọjọ́ orí mi sì ti pọ̀ gidigidi. ³Ẹ̀yin ti rí gbogbo ohun tí Baba yín ṣe sí gbogbo àwọn orílẹ̀-èdè wọ̀nyí nítorí yín; Baba yín ni ó jà fún yín. ⁴Ẹ wò ó, mo ti pín àwọn orílẹ̀-èdè tí ó ṣẹ́kù wọ̀nyí fún yín gẹ́gẹ́ bí ogún fún àwọn ẹ̀yà yín, àti gbogbo àwọn orílẹ̀-èdè tí mo ti gé kúrò, láti odò Jordani títí dé Òkun Ńlá ní ìhà ìwọ̀ oòrùn. ⁵Baba yín fúnra rẹ̀ yóò ti wọn padà, yóò sì lé wọn jáde kúrò níwájú yín, ẹ̀yin yóò sì gba ilẹ̀ wọn, gẹ́gẹ́ bí Baba yín ti ṣe ìlérí fún yín.

⁶Ẹ jẹ́ alágbára gidigidi láti pa gbogbo ohun tí a kọ sínú ìwé òfin Mose mọ́ àti láti ṣe wọ́n, ẹ má ṣe yà kúrò nínú rẹ̀ sí ọ̀tún tàbí sí òsì. ⁷Ẹ má ṣe darapọ̀ mọ́ àwọn orílẹ̀-èdè tí ó ṣẹ́kù wọ̀nyí tí ó wà láàrin yín. Ẹ má ṣe dárúkọ àwọn òrìṣà wọn tàbí búra nípa wọn; ẹ má ṣe sìn wọ́n tàbí foríbalẹ̀ fún wọn. ⁸Ṣùgbọ́n ẹ rọ̀ mọ́ Baba yín, gẹ́gẹ́ bí ẹ ti ṣe títí di òní.

⁹Baba yín ti lé àwọn orílẹ̀-èdè ńlá àti alágbára jáde níwájú yín; kò sí ẹnìkan tí ó ti dúró lòdì sí yín títí di òní. ¹⁰Ẹnì kan nínú yín ń lé ẹgbẹ̀rún kan, nítorí Baba yín fúnra rẹ̀ ni ó ń jà fún yín, gẹ́gẹ́ bí ó ti ṣe ìlérí fún yín. ¹¹Nítorí náà, ẹ ṣọ́ra yín dáadáa, láti fẹ́ Baba yín. ¹²Ṣùgbọ́n bí ẹ bá padà sẹ́yìn, tí ẹ sì rọ̀ mọ́ àwọn orílẹ̀-èdè tí ó ṣẹ́kù wọ̀nyí tí ó kù láàrin yín, tí ẹ ń bá wọn ṣe ìgbéyàwó, tí ẹ ń darapọ̀ mọ́ wọn, àwọn náà sì ń darapọ̀ mọ́ yín, ¹³ẹ mọ̀ dájú pé Baba yín kì yóò lé àwọn orílẹ̀-èdè wọ̀nyí jáde níwájú yín mọ́. Wọn yóò sì jẹ́ ìdẹkùn àti pàkúté fún yín, pàṣán ní ìhà yín àti ẹ̀gún ní ojú yín, títí ẹ̀yin yóò fi ṣègbé kúrò ní ilẹ̀ rere yìí tí Baba yín fún yín.

¹⁴Wò ó, èmi ń lọ ní ọ̀nà gbogbo ayé nísinsìnyí. Ẹ̀yin mọ̀ pẹ̀lú gbogbo ọkàn yín àti gbogbo ẹ̀mí yín pé kò sí ọ̀kan nínú àwọn ohun rere tí Baba yín ṣe ìlérí nípa yín tí ó kùnà—gbogbo wọn ló ṣẹ fún yín; kò sí ọ̀kan tí ó kùnà. ¹⁵Gẹ́gẹ́ bí gbogbo ọ̀rọ̀ rere tí Baba yín sọ fún yín ti ṣẹ, bẹ́ẹ̀ ni yóò mú gbogbo ohun búburú wá sórí yín, títí yóò fi pa yín run kúrò ní ilẹ̀ rere yìí tí ó fún yín. ¹⁶Bí ẹ bá rú májẹ̀mú Baba yín, tí ó pa láṣẹ fún yín, tí ẹ sì lọ sin àwọn òrìṣà mìíràn, tí ẹ sì foríbalẹ̀ fún wọn, ìbínú Baba yín yóò ru sí yín, ẹ̀yin yóò sì ṣègbé kíákíá kúrò ní ilẹ̀ rere tí ó fún yín.”