யோசுவா 23

23 ¹எங்கள் பிதா இஸ்ரவேலரைச் சுற்றிலுமிருந்த அவர்களுடைய எல்லாப் பகைஞர்களையும் விலக்கி அவர்களுக்கு இளைப்பாறுதலைக் கொடுத்து நெடுங்காலமான பின்பு, யோசுவா வயது சென்று முதிர்ந்தவனாயிருந்தான். ²யோசுவா இஸ்ரவேலர் அனைவரையும்—மூப்பரையும், தலைவரையும், நியாயாதிபதிகளையும், அதிகாரிகளையும்—அழைத்து, அவர்களை நோக்கி: "நான் வயது சென்று முதிர்ந்தவனாயிருக்கிறேன். ³உங்கள் பிதா உங்கள் நிமித்தம் இந்த எல்லா ஜாதிகளுக்கும் செய்தது எல்லாவற்றையும் நீங்கள் கண்டீர்கள்; உங்கள் பிதாவே உங்களுக்காக யுத்தம்பண்ணினார். ⁴இதோ, யோர்தான் தொடங்கி மேற்கே இருக்கும் பெரிய சமுத்திரம்வரையிலுள்ள, நான் அழித்துப்போட்ட எல்லா ஜாதிகளையும், மீதியாயிருக்கிற இந்த ஜாதிகளையும் உங்கள் கோத்திரங்களுக்குச் சுதந்தரமாக நான் பங்கிட்டுக் கொடுத்தேன். ⁵உங்கள் பிதா அவர்களை உங்களுக்கு முன்பாகத் துரத்தி உங்கள் கண்முன்னின்று விலக்கிப்போடுவார்; உங்கள் பிதா உங்களுக்கு வாக்குத்தத்தம்பண்ணியபடி, நீங்கள் அவர்கள் தேசத்தைச் சுதந்தரித்துக்கொள்வீர்கள்.

⁶ஆகையால் மோசேயின் நியாயப்பிரமாண புஸ்தகத்தில் எழுதியிருக்கிற எல்லாவற்றையும் வலதுபுறமோ இடதுபுறமோ விலகாமல் கைக்கொண்டு நடக்கும்படி மிகவும் திடமனதாயிருங்கள். ⁷உங்கள் நடுவே மீதியாயிருக்கிற இந்த ஜாதிகளோடே கலவாதிருங்கள்; அவர்களுடைய தேவர்களின் நாமங்களை உச்சரியாமலும் அவைகளைக்கொண்டு ஆணையிடாமலும், அவைகளைச் சேவியாமலும், அவைகளைப் பணிந்துகொள்ளாமலும் இருங்கள். ⁸இந்நாள்வரைக்கும் நீங்கள் செய்ததுபோல, உங்கள் பிதாவைப் பற்றிக்கொண்டிருங்கள்.

⁹உங்கள் பிதா பெரிதும் பலத்ததுமான ஜாதிகளை உங்களுக்கு முன்பாகத் துரத்திவிட்டார்; இந்நாள்வரைக்கும் ஒருவனும் உங்களுக்கு முன்பாக நிற்கமுடியவில்லை. ¹⁰உங்கள் பிதா உங்களுக்கு வாக்குத்தத்தம்பண்ணியபடி, அவரே உங்களுக்காக யுத்தம்பண்ணுகிறபடியால், உங்களில் ஒருவன் ஆயிரம்பேரைத் துரத்துவான். ¹¹ஆகையால் உங்கள் பிதாவை நேசிக்கும்படி, உங்களைக்குறித்து மிகவும் எச்சரிக்கையாயிருங்கள். ¹²ஆனாலும் நீங்கள் பின்வாங்கி, உங்கள் நடுவே மீதியாயிருக்கிற இந்த ஜாதிகளைப் பற்றிக்கொண்டு, அவர்களோடே சம்பந்தங்கலந்து, நீங்கள் அவர்களோடும் அவர்கள் உங்களோடும் கலந்துகொண்டீர்களானால், ¹³உங்கள் பிதா இந்த ஜாதிகளை இனி உங்களுக்கு முன்பாகத் துரத்திவிடமாட்டார் என்று நிச்சயமாய் அறிந்துகொள்ளுங்கள்; உங்கள் பிதா உங்களுக்குக் கொடுத்த இந்த நல்ல தேசத்திலிருந்து நீங்கள் அழிந்துபோகுமட்டும், அவர்கள் உங்களுக்குக் கண்ணியும் வலையும், உங்கள் விலாக்களில் சவுக்கும், உங்கள் கண்களில் முள்ளுமாயிருப்பார்கள்.

¹⁴இதோ, இன்று நான் பூமியனைத்தும் போகிற வழியே போகிறேன்; உங்கள் பிதா உங்களைக்குறித்துச் சொன்ன எல்லா நன்மையான காரியங்களிலும் ஒன்றாகிலும் தவறிப்போகவில்லை என்பதை உங்கள் முழு இருதயத்தோடும் உங்கள் முழு ஆத்துமாவோடும் அறிந்திருக்கிறீர்கள்; எல்லாம் உங்களுக்கு நிறைவேறியது, ஒன்றாகிலும் தவறிப்போகவில்லை. ¹⁵உங்கள் பிதா உங்களுக்குச் சொன்ன எல்லா நல்ல வார்த்தையும் உங்களுக்கு நிறைவேறினதுபோல, அவர் உங்களுக்குக் கொடுத்த இந்த நல்ல தேசத்திலிருந்து உங்களை அழிக்கும்வரைக்கும், அவர் எல்லாத் தீமையான காரியத்தையும் உங்கள்மேல் வரப்பண்ணுவார். ¹⁶உங்கள் பிதா உங்களுக்குக் கட்டளையிட்ட அவருடைய உடன்படிக்கையை நீங்கள் மீறி, அந்நிய தேவர்களைச் சேவித்து அவைகளைப் பணிந்துகொண்டால், உங்கள் பிதாவின் கோபம் உங்கள்மேல் மூளும்; அவர் உங்களுக்குக் கொடுத்த நல்ல தேசத்திலிருந்து நீங்கள் சீக்கிரமாய் அழிந்துபோவீர்கள்."