Josue 23

23 ¹Human sa taas nga panahon nga ang atong Amahan mihatag sa Israel ug pahulay gikan sa tanan nilang mga kaaway sa palibot, tigulang na si Josue, hilabihan na ang iyang pangedaron. ²Gitawag ni Josue ang tibuok Israel—ang mga katigulangan, ang mga pangulo, ang mga maghuhukom, ug ang mga opisyal—ug miingon, “Tigulang na ako, hilabihan na ang akong pangedaron. ³Nakita ninyo ang tanang gibuhat sa inyong Amahan niining tanang mga nasod tungod kaninyo; ang inyong Amahan nakig-away alang kaninyo. ⁴Tan-awa, gibahin ko na kaninyo, ingon nga panulondon sa inyong mga tribo, kining nahibiling mga nasod, ug ang tanang mga nasod nga akong gipuo, gikan sa Jordan hangtod sa Dakong Dagat sa kasadpan. ⁵Ang inyong Amahan mismo maoy moabog kanila ug mopapahawa kanila gikan sa inyong atubangan, ug mapanag-iya ninyo ang ilang yuta, sumala sa gisaad kaninyo sa inyong Amahan.

⁶Magmalig-on kamo pag-ayo sa pagtuman ug pagbuhat sa tanang nahisulat sa basahon sa balaod ni Moises, nga dili motipas gikan niini ngadto sa tuo o sa wala. ⁷Ayaw kamo pagsagol niining nahibiling mga nasod nga anaa taliwala kaninyo. Ayaw hisguti ang mga ngalan sa ilang mga dios ni manumpa pinaagi kanila; ayaw sila alagari o yukbo-i. ⁸Apan kupti ninyo pag-ayo ang inyong Amahan, sama sa inyong gibuhat hangtod karong adlawa.

⁹Ang inyong Amahan nagpapahawa sa dagko ug kusgang mga nasod gikan sa inyong atubangan; walay bisan usa nga nakabarog batok kaninyo hangtod karong adlawa. ¹⁰Usa kaninyo makagukod ug 1,000, kay ang inyong Amahan mismo maoy nakig-away alang kaninyo, sumala sa iyang gisaad kaninyo. ¹¹Busa bantayi ninyo pag-ayo ang inyong kaugalingon, aron higugmaon ninyo ang inyong Amahan. ¹²Apan kon motalikod kamo ug mokupot niining nahibiling mga nasod nga nahibilin taliwala kaninyo, makigminyoay kanila, nga magsagol kamo kanila ug sila kaninyo, ¹³segurado nga ang inyong Amahan dili na mopapahawa niining mga nasod gikan sa inyong atubangan. Mahimo silang lit-ag ug bitik alang kaninyo, usa ka latos sa inyong mga kilid ug mga tunok sa inyong mga mata, hangtod nga mahanaw kamo gikan niining maayong yuta nga gihatag kaninyo sa inyong Amahan.

¹⁴Moadto na ako sa dalan nga pagaagian sa tibuok kalibotan. Nasayod kamo sa bug-os ninyong kasingkasing ug sa bug-os ninyong kalag nga walay bisan usa sa maayong mga butang nga gisaad sa inyong Amahan mahitungod kaninyo nga napakyas—natuman ang tanan alang kaninyo; walay bisan usa nga napakyas. ¹⁵Maingon nga natuman ang matag maayong pulong nga gisulti kaninyo sa inyong Amahan, mao usab nga ipahiagom niya kaninyo ang matag makadaot nga butang, hangtod nga malaglag niya kamo gikan niining maayong yuta nga iyang gihatag kaninyo. ¹⁶Kon lapason ninyo ang kasabotan sa inyong Amahan, nga iyang gisugo kaninyo, ug moadto ug moalagad sa laing mga dios ug moyukbo kanila, ang kasuko sa inyong Amahan mosilaob batok kaninyo, ug sa madali malaglag kamo gikan sa maayong yuta nga iyang gihatag kaninyo.”