Joshua 21

21 ¹Chieina Levinaobingwui avāva̱ ngarāwui shimkhur akhavābingna pāngmon Eleazar, Nunwui naomayara Joshua kala Israel shangbingwui avāva̱ ngarāwui shimkhur akhavābingli rānganaiya. ²Canaan ngaleili khalei Shilohli athumna athumli hānga, "Ithumwui Avāna Moses singda ithumli somkhavai keinung, kala ithumwui sha̱keiwui vang seihomphungbing mikhavai kaso kahaina."

³Chieina Israelwui mibingna ithumwui Avāna kaso kahai athishurda, kachichāwui shimluiwui eina keinungbing hi kala chiwui seihomphungbing Levinaobingli mihaowa. ⁴Ka̱lā chi Kohath shimkhurbingwui vang shokhaowa. Levinaobingwui alungli khalei pāngmon Aaronwui naomayarabingna, Judah, Simeon kala Benjamin shangbingwui eina kalā yanglaga keinung tharāda kathum samphanga. ⁵Kohath shimkhurbing makhangarinbingli Ephraim shang, Dan shang, kala Manasseh shang tangkhaiwui shimkhurbingwui eina kalā yanglaga keinung tharā samphanga. ⁶Gershonwui naomayarabingna Issachar shang, Asher shang, Naphtali shang, kala Bashanli khalei Manasseh shang tangkhaiwui shimkhurbingwui eina kalā yanglaga keinung tharāda kathum samphanga. ⁷Merariwui naomayarabingna athumwui shimkhurwui athishurda Reuben shang, Gad shang, kala Zebulun shangwui eina keinung tharāda khani samphanga. ⁸Chieina Israelwui mibingna ithumwui Avāna Mosesli kaso kahai athishurda, keinungbing hi kala chiwui seihomphungbing kalā yanglaga Levinaobingli mihaowa. ⁹Judah eina Simeon shangbingwui eina aming eina hāngkahai keinungbing hi athumna mi: ¹⁰Keinung hibing Levinaobingwui Kohath shimkhurbingwui Aaronwui naomayarabingwui tāhaowa, kaja khare kalā chi athumli tāhaowa. ¹¹Athumna athumli Judahwui kaphungramli khalei Kiriath-arba (chiya Hebron) kala chi kuikhamareili seihomphungbing mihaowa (Arba hi Anakwui avāva̱na). ¹²Kha keinung chiwui luibing eina kha̱bing chiya athumna Jephunnehwui naomayara Calebli awui shimlui sākhavai mihaisai. ¹³Pāngmon Aaronwui naomayarabingli athumna mi shaokathata awui ngayin khavaiwui keinung Hebron kala chiwui seihomphungbing, kala Libnah kala chiwui seihomphungbing mihaowa. ¹⁴Jattir kala chiwui seihomphungbing, Eshtemoa kala chiwui seihomphungbing, ¹⁵Holon kala chiwui seihomphungbing, Debir kala chiwui seihomphungbing, ¹⁶Ain kala chiwui seihomphungbing, Juttah kala chiwui seihomphungbing, Beth-shemesh kala chiwui seihomphungbing: shang khani hiwui eina keinung chikona. ¹⁷Benjamin shangwui eina: Gibeon kala chiwui seihomphungbing, Geba kala chiwui seihomphungbing, ¹⁸Anathoth kala chiwui seihomphungbing, kala Almon kala chiwui seihomphungbing: keinung matina. ¹⁹Pāngmonbing Aaronwui naomayarabingwui keinung saikora chi seihomphungbing eina ngasoda keinung tharāda kathumna.

²⁰Kohath Levinaobing shimkhur makhangarinbingli, athumwui kalā yangkahai keinungbing Ephraim shangwui eina mi. ²¹Athumna Ephraim kaphungramli khalei mi shaokathatwui vang yāmngayin khavai keinung Shechem kala chiwui seihomphungbing, kala Gezer kala chiwui seihomphungbing miya. ²²Kibzaim kala chiwui seihomphungbing, kala Beth-horon kala chiwui seihomphungbing: keinung matina. ²³Dan shangwui eina: Elteke kala chiwui seihomphungbing, Gibbethon kala chiwui seihomphungbing, ²⁴Aijalon kala chiwui seihomphungbing, kala Gath-rimmon kala chiwui seihomphungbing: keinung matina. ²⁵Manasseh shang ngakaipakwui eina: Taanach kala chiwui seihomphungbing, kala Gath-rimmon kala chiwui seihomphungbing: keinung khanina. ²⁶Hibing saikora Kohath shimkhur makhangarinbingwui vang seihomphungbing eina ngasoda keinung tharāna.

²⁷Manasseh shang ngakaipakwui eina, Gershon Levi shimkhurbingli: Bashanli khalei mi shaokathatwui vang yāmngayin khavai keinung Golan kala chiwui seihomphungbing; kala Be-eshterah kala chiwui seihomphungbing: keinung khanina. ²⁸Issachar shangwui eina: Kishion kala chiwui seihomphungbing, Daberath kala chiwui seihomphungbing, ²⁹Jarmuth kala chiwui seihomphungbing, kala En-gannim kala chiwui seihomphungbing: keinung matina. ³⁰Asher shangwui eina: Mishal kala chiwui seihomphungbing, Abdon kala chiwui seihomphungbing, ³¹Helkath kala chiwui seihomphungbing, kala Rehob kala chiwui seihomphungbing: keinung matina. ³²Naphtali shangwui eina: Galileeli khalei mi shaokathatwui vang yāmngayin khavai keinung Kedesh kala chiwui seihomphungbing; Hammoth-dor kala chiwui seihomphungbing; Kartan kala chiwui seihomphungbing: keinung kathumna. ³³Athumwui shimkhurwui athishurda Gershonnaobingwui keinung saikora seihomphungbing eina ngasoda keinung tharāda kathumna.

³⁴Levinaobing makhangarinbingli, Merari shimkhurbingli, Zebulun shangwui eina mi: Jokne-am kala chiwui seihomphungbing, Kartah kala chiwui seihomphungbing, ³⁵Dimnah kala chiwui seihomphungbing, kala Nahalal kala chiwui seihomphungbing: keinung matina. ³⁶Reuben shangwui eina: Bezer kala chiwui seihomphungbing, Jahzah kala chiwui seihomphungbing, ^a a v36 Tuikhur 36-37 hi Hebrew ngagap karithang kachungkhawui eina maleimana, kha khangateibingli kala karithang Greek ngagapli leisai. ³⁷Kedemoth kala chiwui seihomphungbing, kala Mepha-ath kala chiwui seihomphungbing: keinung matina. ³⁸Gad shangwui eina: Gileadli khalei mi shaokathatwui ngayin khavai keinung Ramoth kala chiwui seihomphungbing, kala Mahanaim kala chiwui seihomphungbing. ³⁹Heshbon kala chiwui seihomphungbing, kala Jazer eina chiwui seihomphungbing: saikora keinung matina. ⁴⁰Katai Levi shimkhurbing Merariwui shimkhurbingwui kalā yangkahai keinung saikora tharāda khanina.

⁴¹Israel mibingwui shimlui alungli khalei Levinaobingwui keinung saikora chiwui seihomphungbing zangserda hangmatida chishatna. ⁴²Hi keinungbing kachiva̱na kachichāwui kuimareida seihomphungbing kai; keinung saikorala chithāda leiya.

⁴³Chieina ithumwui Avāna Israelli athumwui avāva̱ ngarāli ngashit kahai ngalei katonga mi; kala athumna chi yuikhuilaga chili pamhaowa. ⁴⁴Ithumwui Avāna athumwui avāva̱ ngarāli ngashit kahai thāda, athumli kuimareida chingrihai ngasaka. Athumwui yangkashebing khipānakha athumli mangasungrarmana; ithumwui Avāna athumwui yangkashe saikorali athumwui pāngli horsangmi. ⁴⁵Ithumwui Avāna Israelwui shimkhurli ngashit kahai kaphā ot saikorawui eina akhala maungkashung maleimana; katonga ungshungserhaira.