Avāna Ngayin Khavai Keinungbing Ngarānmi
Ithumwui Avāna keinung tharuk tamkhui, matheithangmeila mi sathathaiakha chili yāmngayinda, athut khuida sathatranglakha mangāli ana bichar samphang khavaina. Ain chi kachangkhat eina lei: keinungwui ngaveili nawui tui hānglu, bichar sāranglakha eina tangda chili pamlu, kala pāngmon kharei mathiranglakha eina tangda chili pamlu.
20 1Chiwui thili ithumwui Avāna Joshuali hānga:
2"Israelnaobingli hānglu: 'Nathumna nathumwui vang Moses singda nathumli hāngkahai ngayin khavai keinungbing chi phaishokhailu, 3chieina matheimada matheila mi sakathata china chili yāmngayinra; chi asheewui athut hāngsangki kajipawui eina nathumwui vang yāmngayin khavaina. 4Keinung hibingwui akhali yāmvā china keinung ngavei zangkhavaili nganingra, kala keinung chiwui khararnaobingli awui tuingaphun khuirāra. Athumna ali khuirāda, apam mida, kala athumwui alungli pam ngasakra. 5Kalikha asheewui athut hāngsangki kajipana ali kharomvāhaiakha, athumna mi sakathata chi awui pāngli mahorsangmilakmara; kaja ana rida yangkashi maleila, awui khongnaili makatheiwui vang ngashumhaina. 6Ana bicharwui vang yarui ashangva̱ mangāli makānganingranglakha eina tangda, kala atam chitharan otram ngatha̱da khalei pāngmon kharei chi mathiranglakha eina tangda keinung chili pamra. Chiwui thili mi sakathata chi ana yāmkahai awui khalatta keinung kala shimli latungra.'"
7Athumna Naphtaliwui kaphungram Galileeli khalei Kedesh, Ephraimwui kaphungramli khalei Shechem, kala Judahwui kaphungramli khalei Kiriath-arba (chiya, Hebron) phaishokmi. 8Jordan kānkāda, Jerichowui zingshoshong, athumna Reuben shangwui eina lamhāngli kaphungli khalei Bezer, Gad shangwui eina Gileadli khalei Ramoth, kala Manasseh shangwui eina Bashanli khalei Golan mi. 9Israelnaobing saikora kala athumwui alungli pankharuma kha̱mibingwui vang phaishokkahai keinung hibingna. Chieina matheimada mi sakathata china chili yāmngayinra, kala yarui ashangva̱ mangāli bichar makānganingranglakha eina tangda asheewui athut hāngsangki kajipawui pāng eina mathimara.
