آتا پناهگاه شهرلری تمین ادئر
آتامیز آلتی شهری آییریر کی، سهون بئرئنی اؤلدورَن آدام بئر یره قاچا بئلسئن و قئصاص اولاراق اؤلدورولمَکدن قاباق اشئدئلسئن. قایدالار دقئقدئر: دروازادا اؤز داعوانی بئلدئر، محاکئمه اولونانا قدر قال و باش کاهئن اؤلَنه قدر اورادا دایان.
20 1سونرا آتامیز یوشَعه ددی:
2«ائسرایئل اؤولادلارینا دِه: ”موسانین واسئطه‌سئله سئزه ددئیئم پناهگاه شهرلری اؤزونوز اوچون تعیئن ادئن، 3بله کی، سهون و بئلمه‌دن بئرئنی اؤلدورَن هر کس اورایا قاچا بئلسئن؛ بو شهرلر تؤکولَن قانین قئصاصینی آلاندان سئزه پناهگاه اولسون. 4بو شهرلردن بئرئنه قاچان هر کس شهرئن دروازاسینین گئرئشئنده دایانیب اؤز داعواسی باره‌ده او شهرئن آغساقّاللارینا بئلدئرسئن. اونلار دا اونو اؤز یانلارینا آلیب، اونا بئر یر ورئب، قویسونلار آرالاریندا یاشاسین. 5اگر تؤکولَن قانین قئصاصینی آلان اونو تعقئب اتسه، آدام اؤلدوره‌نی اونون الئنه تسلئم اتمه‌سئنلر، چونکی او، قونشوسونو اوّلجه‌دن عداوتی اولمادان و بئلمه‌دن ووروب. 6او، جاماعاتین حوضوروندا محاکئمه اولونمایینجا و او زامان خئدمت ادن باش کاهئن اؤلمه‌یئنجه، او شهرده قالسین. اوندان سونرا آدام اؤلدورَن اؤز شهرئنه، اؤز اِوئنه، قاچدیغی او شهره قاییتسین.“»
7بله‌جه اونلار جلئل دئیاریندا، نَفتالی‌نین داغلیق تورپاغیندا اولان قِدِشی، اِفرایئمئن داغلیق تورپاغیندا اولان شِکِمی و یهودانین داغلیق تورپاغیندا اولان قئریَت‌اَربَعی، یعنی خِبرونو آییردیلار. 8اوردون چایینین او تاییندا، اَرئحانین شرقئنده، رِعوبئن قبئله‌سئندن هامار بؤلگه‌ده، صحرادا اولان بِصِری، جاد قبئله‌سئندن گئلعادداکی راموتو و مِنَسّه قبئله‌سئندن باشانداکی گولانی وردئلر. 9بوتون ائسرایئل اؤولادلاری و آرالاریندا یاشایان قرئبلر اوچون تعیئن ادئلَن شهرلر بونلار ائدی؛ بله کی، بئر آدامی بئلمه‌دن اؤلدورَن هرکس اورایا قاچا بئلسئن و جاماعاتین حوضوروندا محاکئمه اولونمامیش، تؤکولَن قانین قئصاصینی آلانین الی ائله اؤلمه‌سئن.
