Bouei Satenshang Sangnyu Kubü
Seneibü Bouei sangnyu lak janletkei, aishanga mashikan müt haitibouei khüto satetlangan, siiei phoklambüei hao haitila lamle, ngekbü hapla shanga. Ngühkhüm khei chongchingko ki: sangnyu koukhüna jembü mat lenashi, matjemla sühko kiashi, hoba thükkabou ungshedbou ühai sühko satetlangashi.
20 1Kheijinei Bouei Joshua to laukei,
2“Israel shousi shuong to lenashi, ‘Mosa danko ngei kan to laubü satenshang sangnyu kanei kan shanga pienashi, 3khei aoei mashikan, shanshedte müt at haitilaje khünei satetlanglabü—kho kan shanga siiei phoklambü ka satenshang kilabü. 4Aoei khübü sangnyu che to satetlanglaje, hao sangnyu bakhün koukhüna atshanga lolabü, hoba ho sangnyu leiyeibü jaishou shuong to jembü mat lenlabü. Hobaje haoenei hao leijung loulabü, hoba hao la kaoen kulabü, hoba hao haoen yoa kiteilabü. 5Ladang siiei phoklambüei hao shieilaje, haoenei müt haitibou hao ik ka khümbo akulabü, aishanga haoei jembü shangied to shanshedte ngümbei, shangied hao to mangsenyoko aki. 6Hao ho sangnyua kijan, hao shuong thedanga matjemla alo shongko, hoba kho chaloua kibü thükkabou ungshedbou ühaishongko. Kheijinei müt haitibou kho jembü sangnyu hoba chem to, khei hao satbü sangnyu to ngailabü.’”
7Haoenei Naftali shongh kaodaka kibü Galila Kadesh, Efraim shongha Shekhem, hoba Jihuda shongha Kiriath Arba (kho Hebron) phokei. 8Jordan danan Jerikhoeibü chaangbou ae, haoenei Reuben phang ka yomanga yamlamanga Bezer, Gad phang ka Gileada Ramoth, hoba Manasse phang ka Bashana Golan kukei. 9Habü ho Israel shousi shuong pendou shanga hoba haoen yoa kibü yenbou shuong shanga phokubü sangnyu kikei, khei aoei mashikan müt at haitilaje khünei satetlangan, shuong thedanga matjemla alo shongko siiei phoklambü ik ka aühaila shanga.
