Baba Asapereka Mizinda Yakuthawira
Baba wathu asankhula mizinda mitanthatu toera munthu adapha mwanzace mwakusaya kufuna athawire kweneko mbabveserwa pakuti nkhanati kuphiwa ninga kubwezera. Mitemo ndi yakulongwa pakweca: longa nyaya yako pa nsuwo wa nzinda, khala mpaka kutongwa, mbupitiriza kukhala mpaka kufa kwa nyantsembe wankulu.
20 1Na tenepo Baba wathu alonga kuna Djoswa:
2“Panga Aizarayeli kuti: ‘Sankhulani mizinda yakuthawira yakuti ndalonga na imwe kubulukira mwa Mose, 3toera munthu onsene anapha ndzace mwakukhonda kufuna, mwakukhonda kudziwa, akwanise kuthawira kweneko, mbuto yakuthawira kwa imwe kubuluka kuna nyakubwezera ciropa. 4Munthu onsene anathawira ku m'bodzi wa mizinda ineyi anafunika kuima pa nsuwo wa mzinda, mbalonga mphangwa zace kuna akulu a mzinda unowu. Iwo anampitisa n'kati, mbampasa mbuto, mbantawirisa kukhala pakati pawo. 5Nyakubwezera ciropa angantowera, iwo nkhabe kupereka nyakupha kuna iye, thangwi iye amenya ndzace mwakukhonda kudziwa, mbakhonda kumuida kale. 6Iye anafunika kukhala mu mzinda unowu mpaka akhale pa kutongwa pamaso pa mpingo, na mpaka afe nyantsembe nkulu anatumikira mu n'dzidzi unowu. Penepo nyakupha anakwanisa kubwerera ku mzinda wace na panyumba pace, mzinda udathawa iye.’”
7Iwo apatula Kedexi ku Galileya, ku mapiri a Nafitali; Xekemi, ku mapiri a Efraimi; na Kiriyati-araba (Hebroni), ku mapiri a Yuda. 8Ku bzina kwa Djordani, kumabulukiro a dzuwa kwa Yeriko, iwo apereka Bezeri m'thando pa phiri kubulukira mu dzindza ya Rubeni, Ramoti ku Gileyadi kubulukira mu dzindza ya Gadi, na Golani ku Baxani kubulukira mu dzindza ya Manase. 9Ineyi ndi mizinda idapatulwa toera Aizarayeli onsene na alendo akhakhala pakati pawo, toera munthu onsene anapha ndzace mwakukhonda kufuna akwanise kuthawira kweneko, mbakhonda kufa m'manja mwa nyakubwezera ciropa, mbadzati kuima pa kutongwa pamaso pa mpingo.
