Josue 20

20 ¹Pagkatapos ay nagsalita ang ating Ama kay Josue:

²"Sabihin mo sa mga Israelita: ‘Magtalaga kayo para sa inyong sarili ng mga lungsod na kanlungan na sinabi ko sa inyo sa pamamagitan ni Moises, ³upang ang sinumang nmakapatay ng tao nang hindi sinasadya, nang hindi nalalaman, ay makatakas doon—isang kanlungan para sa inyo laban sa tagapaghiganti ng dugo. ⁴Ang sinumang tumakas sa isa sa mga lungsod na ito ay tatayo sa pasukan ng pintuang-bayan at ihahayag ang kanyang usapin sa mga matanda ng lungsod na iyon. Papapasukin nila siya, bibigyan ng lugar, at patitirahin sa piling nila. ⁵Kung hahabulin siya ng tagapaghiganti ng dugo, hindi nila dapat ibigay ang nakapatay sa kanya, sapagkat sinaktan niya ang kanyang kapwa nang hindi nalalaman, na walang naunang pagkapoot. ⁶Dapat siyang manatili sa lungsod na iyon hanggang sa humarap siya sa paglilitis sa harap ng kapulungan, at hanggang sa mamatay ang punong saserdote na naglilingkod sa panahong iyon. Pagkatapos ay maaari nang bumalik ang nakapatay sa sarili niyang lungsod at bahay, sa bayang kanyang tinakasan.’"

⁷Ibinukod nila ang Kedes sa Galilea, sa kaburulan ng Neftali; ang Sikem, sa kaburulan ng Efraim; at ang Kiriat-arba (Hebron), sa kaburulan ng Juda. ⁸Sa kabila ng Jordan, sa silangan ng Jerico, ibinigay nila ang Bezer sa ilang sa kapatagan mula sa lipi ni Ruben, ang Ramot sa Gilead mula sa lipi ni Gad, at ang Golan sa Basan mula sa lipi ni Manases. ⁹Ito ang mga lungsod na itinalaga para sa lahat ng mga Israelita at sa mga dayuhang naninirahan sa piling nila, upang ang sinumang makapatay ng tao nang hindi sinasadya ay makatakas doon at hindi mamatay sa kamay ng tagapaghiganti ng dugo bago humarap sa paglilitis sa harap ng kapulungan.