Yoshua 20

20 ¹Kisha Baba yetu akamwambia Yoshua:

²"Waambie Waisraeli: 'Jichagulieni miji ya makimbilio niliyowaambia kwa mkono wa Musa, ³ili kila auaye mtu kwa bahati mbaya, pasipo kujua, aweze kukimbilia huko—makimbilio kwenu dhidi ya mlipiza kisasi cha damu. ⁴Kila akimbiliaye mmojawapo wa miji hii atasimama penye ingilio la lango la mji na kutoa habari zake mbele ya wazee wa mji ule. Nao watamkaribisha ndani ya mji, watampa mahali, na kumwacha akae kati yao. ⁵Kama mlipiza kisasi cha damu akimfuatia, kamwe wasimtoe muuaji mikononi mwake, kwa sababu alimpiga jirani yake pasipo kujua, wala hakuwa na chuki naye tangu awali. ⁶Ni lazima akae katika mji ule mpaka atakaposimama kuhukumiwa mbele ya mkutano, na mpaka atakapokufa kuhani mkuu atumikaye wakati ule. Kisha muuaji aweza kurudi katika mji wake mwenyewe na nyumbani kwake, mji ule aliokimbia.'"

⁷Kwa hiyo wakatenga Kedeshi katika Galilaya, vilimani mwa Naftali; Shekemu, vilimani mwa Efraimu; na Kiriath-arba (yaani Hebroni), vilimani mwa Yuda. ⁸Ng'ambo ya Yordani, upande wa mashariki wa Yeriko, wakatoa Bezeri katika nyika iliyoko juu ya uwanda wa juu kutoka kabila la Reubeni, Ramothi katika Gileadi kutoka kabila la Gadi, na Golani katika Bashani kutoka kabila la Manase. ⁹Hii ndiyo miji iliyochaguliwa kwa ajili ya Waisraeli wote na wageni wakaao kati yao, ili kila auaye mtu bila kusudi aweze kukimbilia huko na asife kwa mkono wa mlipiza kisasi cha damu kabla ya kusimama kuhukumiwa mbele ya mkutano.