ኣቦ ከተማታት መዕቘቢ የዳሉ
ኣቦና ሽዱሽተ ከተማታት መዕቘቢ ይፈሊ፤ ብዘይ ምፍላጥ ሰብ ዝቐተለ ሰብ ናብአን ሃዲሙ፥ ብፈዳዪ ደም ቅድሚ ምቕታሉ ነገሩ ምእንቲ ኽስማዕ። እቶም ሕግጋት ድማ ፍሉያት እዮም፦ ኣብ ኣፍ ደገ ነገርካ ንገር፥ ክሳዕ ፍርዲ ፅናሕ፥ ክሳዕ እቲ ሊቀ ካህናት ዝመውት ከዓ ፅናሕ።
20 1ኣቦና ድማ ንኢያሱ ኸምዙይ በሎ፦
2“ንደቂ እስራኤል ከምዙይ በሎም፦ ‘ኣነ ብሙሴ ኣቢለ ዝነገርኩኹም ከተማታት መዕቘቢ ንባዕልኻትኩም ፍለዩ፥ 3ብዘይ ምፍላጥ ብድንገት ሰብ ዝቐተለ ዝኾነ ሰብ ናብአን ምእንቲ ኽሃድም፤ ካብቲ ፈዳዪ ደም ድማ መዕቘቢ ይኹናኹም። 4ናብ ሓንቲ ኻብዘን ከተማታት እዚኣተን ዝሃደመ ድማ ኣብ ኣፍ ደገ እታ ኸተማ ደው ኢሉ ነገሩ ነቶም ዓበይቲ እታ ኸተማ ይንገሮም። ንሳቶም ከዓ ናብ ከተማኦም ኣእትዮም ቦታ ይሃብዎ፤ ምሳታቶምውን የንብርዎ። 5እቲ ፈዳዪ ደም እንተ ሰጐጎ ኸዓ፥ ቅድም ኢሉ ፅልኢ ስለ ዘይነበሮ፥ ንብፃዩ ድማ ብዘይ ምፍላጥ ስለ ዝወቕዖ፥ ነቲ ቐታሊ ናብ ኢዱ ኣይሕብዎ። 6ክሳዕ ኣብ ቅድሚ እቲ ባይቶ ንፍርዲ ዝቐውም፥ ክሳዕ እቲ በቲ እዋን እቲ ዘገልግል ሊቀ ካህናት ዝመውትውን፥ ኣብታ ኸተማ እቲኣ ይፅንሕ። ሽዑ እቲ ቐታሊ ናብ ከተማኡን ቤቱን፥ ናብታ ዝሃደመላ ዓዲ ይምለስ።’”
7ነታ ኣብ ገሊላ፥ ኣብ እምባታት ንፍታሌም ዘላ ቃዴስ፥ ነታ ኣብ እምባታት ኤፍሬም ዘላ ሴኬም፥ ነታ ኣብ እምባታት ይሁዳ ዘላ ቂርያትኣርባቅ ወይ ኬብሮን ድማ ፈለዩ። 8ኣብ ማዕዶ ዮርዳኖስ፥ ብወገን ምብራቕ ኢያሪኮ ኸዓ፥ ካብ ነገድ ሮቤል ነታ ኣብ ምድረ በዳ፥ ኣብ ደጕዓ ዘላ ቦሶር፥ ካብ ነገድ ጋድ ነታ ኣብ ገለዓድ ዘላ ራሞት፥ ካብ ነገድ ምናሴ ድማ ነታ ኣብ ባሳን ዘላ ጎላን ሃቡ። 9እዘን ከተማታት እዚኣተን፥ ብዘይ ምፍላጥ ሰብ ዝቐተለ ዝኾነ ሰብ ናብአን ሃዲሙ፥ ኣብ ቅድሚ እቲ ባይቶ ንፍርዲ ቕድሚ ምቕራቡ ብኢድ እቲ ፈዳዪ ደም ምእንቲ ኸይመውት፥ ንዅሎም ደቂ እስራኤልን ነቶም ኣብ መንጎኦም ዝነብሩ ጓኖትን ዝተፈለያ ነበራ።
