پلار د پناه ښارونه برابروى
زموږ پلار شپږ ښارونه بېلوي، څو هغه څوک چې په ناپوهۍ سره څوک ووژني، یو ځای ته وتښتي او مخکې له دې چې بدل یې واخیستل شي، د هغه خبره واورېدل شي. قاعدې روښانه دي: په دروازه کې خپله دعوه ووایه، تر محاکمې پورې هلته پاتې شه، او تر هغه وخته پاتې شه چې لوی کاهن مړ شي.
20 1بيا پلار يشوع ته وفرمائيل چې،
2”بنى اِسرائيلو ته ووايه چې، ’د پناه هغه ښارونه د ځان دپاره مقرر کړئ چې ما د موسىٰ په وسيله تاسو ته د هغوئ په حقله فرمائيلى وُو، 3ترڅو چې هر هغه څوک چې په ناپوهۍ کښې او بېارادې يو سړے مړ کړى، هغه هلته وتښتى، ترڅو چې دا ستاسو دپاره د وينې د بدل اخيستونکى نه د پناه ځائ وى. 4څوک چې د دغو ښارونو يوۀ ته وتښتى، نو هغه دې د ښار د دروازې په دخل کښې ودريږى او د هغه ښار مشرانو ته دې خپل حال بيان کړى. هغوئ به هغه ننه بوزى، يو ځائ به ورکړى او خپلو کښې به يې اوسوى. 5کۀ د وينې بدل اخيستونکے د هغۀ پسې راشى، نو هغوئ دې دا قاتل هغۀ ته حواله نۀ کړى، ځکه چې هغۀ خپل ګاونډى په ناپوهۍ کښې وواهو، او مخکښې ترې هيڅ دُښمنى نۀ وه. 6هغه دې په دغه ښار کښې اوسيږى ترڅو چې د جماعت په مخکښې عدالت ته ودريږى، او ترڅو چې هغه لوئ اِمام مړ شى چې په هغه وخت کښې خدمت کوى. بيا دا قاتل کولے شى چې خپل ښار او کور ته بيرته لاړ شى، هغه ښار ته چې هغه ترې تښتېدلے وو.‘“
7نو هغوئ په جليل کښې، د نفتالى په غرونو کښې قادس جُدا کړو؛ د اِفرائيم په غرونو کښې سِکم؛ او د يهوداه په غرونو کښې قريت اربع (يعنې حبرون). 8د اُردن د بلې غاړې، د يريحو ختيځ طرف ته، هغوئ د رُوبن د قبيلې نه په بيابان کښې په سطح مرتفع باندې بصر ورکړو، د جد د قبيلې نه په جِلعاد کښې راموت، او د منسى د قبيلې نه په بسن کښې جولان ورکړو. 9دا هغه ښارونه وُو چې د ټولو بنى اِسرائيلو او هغو پرديو دپاره مقرر شوى وُو چې د هغوئ په مينځ کښې اوسېدل، ترڅو چې هر هغه څوک چې يو سړے په بېارادې مړ کړى، هغه هلته وتښتى او د وينې د بدل اخيستونکى په لاس ونۀ مرى، ترهغه چې د جماعت په مخکښې عدالت ته ودريږى.
