Tebui Jenokdak Yimtitem Agütsü
Memeteti nisung tepseter shiai idakji jenoka, pa ajongbena yongi tepseta aliba madang pei osang angashidaktsü asoshi, Tebui yimti terok shimtet. Ozüngji tetetshi lir: yimti süngkhüm nung pei osang ayimoktsü, o bendangba putir masü tashi aser nisung tetepsetsang asü tashi alitsü.
20 1Idangji Tebui Yihusua dang ashi,
2“Israel chirtem dang shiang, ‘Mosa ajanga ni nenok dang ashiba jenokdak yimtitem nenok asoshi shimtetang, 3anungji ajongbena, memeteti nisung tepseter shiai idakji jenoktsü; itemji azü mangyanger madang nenok asoshi jenokdak yimti alitsü. 4Item yimtitem ka nung jenoker shibai yimti süngkhüm pungchi noktaka, iba yimti tamburtem dang pei o shitsü. Anungji teloki pa anir arua, pa nem mapang ka agütsü, aser parnok rongnung pa alitsü. 5Azü mangyangeri pa aria ora, teloki nisung tepseterji pa ket nung mabendangtsü, kechiaser pai akhidang sempatepa maliba memeteti pei kiyonger tepset. 6Pai telok madang o bendangdak noktaktsü tashi, aser iba mapang nung tekülemba temaba putir masü tashi, iba yimti nung alitsü. Idangji nisung tepseter pei jena adoka yimti, pei yimti aser ki jagi meyipa aotsü.’”
7Parnoki Galil nung aliba Kedesh, Naftali tenem lima nung; Shekem, Efraim tenem lima nung; aser Kiriath-arba (aji Hebron), Yihuda tenem lima nung balaka ayu. 8Yordan ajanga or Yeriko anüdoklen tsütsü nung, parnoki lisem lima lenten nung aliba Bezer Reuben kidong nungi, Gilead nung Ramoth Gad kidong nungi, aser Bashan nung Golan Manase kidong nungi agütsü. 9Israel chirtem ajak aser parnok den amunger bendangertem asoshi shimtetba yimtitemji itemji liasü; ajongbena nisung tepseter shiai idakji jena aotsü, aser telok madang o bendangdak menoktak tashi azü mangyanger ket nungi masütsü.