Kogoito Kwanda Nganasook che Kimwechin
Ki tabaan Kwandanyo nganasook lo si komwechi olooto chii ne kabar chii amaingen eng' lelset, ak kogas kotomo kobar ineendet puch. Imanda ng'atuutik: imwa ng'olyoondeng'ung' eng' kurgeet, imeny agoi tuiyet, ak imeny agoi kome tisiindet ne oo.
Ng'alaali Kwandanyo eng' mustarisyek 2–6
20 1Yeityo ki ng'alaalji Kwandanyo Joshua, kole:
2“Leenji piigap Israel, kole: ‘Otabaanjigei nganasook che omwechini che ki amwaiwok eng' Musa, 3si komwechi age tugul ne kabar chii amaingen eng' lelset olooto; koek ole omwechini eng' yaaktaindetap mugetuut agobo korotiik. 4Ne mwechin nganaseet age eng' chuuto, ingotonon kurgeetap nganaseet, ak komwa ng'olyoondennyi eng' taitap poisyegap nganasanooto. Koibu icheek ineendet oriit, ak kogoochi ole menyei, ak komeny kobooto icheek. 5Ngo osup yaaktaindetap mugetuut agobo korotiik ineendet, matkonde parindet eutap, amu kabar chiitap kokwennyi amaingen, ne ki ma kowechei eng' tai. 6Ingomeny nganasanooto agoi kotonone eng' taitap tuiyet si kirwoogsan, ak agoi kome tisiindet ne oo ne poisyei eng' peetuusyechooto. Yeityo koweekyigei rumiindet nganasennyi ak kaanyi, nganaseet ne kiga mwechigei.’”
7Ki itabaan anyun Kedesh eng' Galilaya, emetap tuloonoogap Naphtali; ak Shekem, emetap tuloonoogap Ephraim; ak Kiriath-arba (nooto Hebron), emetap tuloonoogap Judah. 8Eng' Jordan pitoniin, komostap kong'asiis ne po Jeriko, ki igoochi Beser eng' surkwen eng' emetap warenget kobun pororyetap Reuben, Ramot eng' Gilead kobun pororyetap Gad, ak Golan eng' Bashan kobun pororyetap Manasseh. 9Chu ko nganasook che ki kitabaan agobo piigap Israel tugul ak toek che menyei kwenunnywa, si komwechi olooto age tugul ne kabar chii amaingen, ak matmachei eng' eutap yaaktaindetap mugetuut agobo korotiik kotom kotonone eng' taitap tuiyet.