യോശുവ 21 FHB Father's Heart Bible™

21 ¹അപ്പോൾ ലേവ്യരുടെ കുടുംബത്തലവന്മാർ പുരോഹിതനായ എലെയാസറിന്റെയും നൂന്റെ മകനായ യോശുവയുടെയും ഇസ്രായേൽ ഗോത്രങ്ങളുടെ കുടുംബത്തലവന്മാരുടെയും അടുക്കൽ വന്നു. ²കനാൻദേശത്തിലെ ശീലോവിൽവച്ച് അവർ അവരോട്: “ഞങ്ങൾക്കു വസിക്കാൻ നഗരങ്ങളും ഞങ്ങളുടെ കന്നുകാലികൾക്കുവേണ്ടി അവയുടെ പുൽമേടുകളും നല്കണമെന്ന് നമ്മുടെ പിതാവ് മോശവഴി കല്പിച്ചിരുന്നു” എന്നു പറഞ്ഞു.

³അങ്ങനെ ഇസ്രായേൽമക്കൾ നമ്മുടെ പിതാവിന്റെ കല്പനപ്രകാരം തങ്ങളുടെ അവകാശത്തിൽനിന്ന് ഈ നഗരങ്ങളും അവയുടെ പുൽമേടുകളും ലേവ്യർക്കു നല്കി. ⁴കഹാത്യരുടെ കുടുംബങ്ങൾക്കു നറുക്കു വീണു. ലേവ്യരുടെ കൂട്ടത്തിലുണ്ടായിരുന്ന പുരോഹിതനായ അഹരോന്റെ സന്തതികൾക്കു യെഹൂദാ, ശിമെയോൻ, ബന്യാമീൻ ഗോത്രങ്ങളിൽനിന്ന് നറുക്കുവഴി പതിമൂന്നു നഗരങ്ങൾ ലഭിച്ചു. ⁵ശേഷിച്ച കഹാത്യർക്ക് എഫ്രയീം ഗോത്രത്തിന്റെയും ദാൻ ഗോത്രത്തിന്റെയും മനശ്ശെയുടെ പാതിഗോത്രത്തിന്റെയും കുടുംബങ്ങളിൽനിന്ന് നറുക്കുവഴി പത്തു നഗരങ്ങൾ ലഭിച്ചു. ⁶ഗേർശോന്റെ സന്തതികൾക്ക് യിസ്സാഖാർ ഗോത്രത്തിന്റെയും ആശേർ ഗോത്രത്തിന്റെയും നഫ്താലി ഗോത്രത്തിന്റെയും ബാശാനിലെ മനശ്ശെയുടെ പാതിഗോത്രത്തിന്റെയും കുടുംബങ്ങളിൽനിന്ന് നറുക്കുവഴി പതിമൂന്നു നഗരങ്ങൾ ലഭിച്ചു. ⁷മെരാരിയുടെ സന്തതികൾക്ക് അവരുടെ കുടുംബങ്ങൾക്കൊത്തവണ്ണം രൂബേൻ ഗോത്രത്തിൽനിന്നും ഗാദ് ഗോത്രത്തിൽനിന്നും സെബൂലൂൻ ഗോത്രത്തിൽനിന്നും പന്ത്രണ്ടു നഗരങ്ങൾ ലഭിച്ചു. ⁸അങ്ങനെ നമ്മുടെ പിതാവ് മോശവഴി കല്പിച്ചിരുന്നതുപോലെ ഇസ്രായേൽമക്കൾ ഈ നഗരങ്ങളും അവയുടെ പുൽമേടുകളും നറുക്കുവഴി ലേവ്യർക്കു നല്കി. ⁹യെഹൂദാ ഗോത്രത്തിൽനിന്നും ശിമെയോൻ ഗോത്രത്തിൽനിന്നും ഇവിടെ പേരുചൊല്ലിയ നഗരങ്ങൾ അവർ നല്കി: ¹⁰ആദ്യത്തെ നറുക്ക് അവർക്കു വീണതുകൊണ്ട് ഇവ ലേവ്യരുടെ കഹാത്യകുടുംബങ്ങളിൽപ്പെട്ട അഹരോന്റെ സന്തതികൾക്കു ലഭിച്ചു. ¹¹യെഹൂദയുടെ മലനാട്ടിലുള്ള കിര്യത്ത്-അർബാ, അതായത് ഹെബ്രോൻ, അതിനു ചുറ്റുമുള്ള പുൽമേടുകളോടുകൂടെ അവർ അവർക്കു നല്കി (അർബാ അനാക്കിന്റെ പിതാവായിരുന്നു). ¹²എന്നാൽ ആ നഗരത്തിന്റെ വയലുകളും ഗ്രാമങ്ങളും അവർ യെഫുന്നയുടെ മകനായ കാലേബിന് അവന്റെ അവകാശമായി കൊടുത്തിരുന്നു. ¹³പുരോഹിതനായ അഹരോന്റെ സന്തതികൾക്ക് അവർ കൊലചെയ്യുന്നവനു സങ്കേതനഗരമായ ഹെബ്രോനും അതിന്റെ പുൽമേടുകളും ലിബ്നയും അതിന്റെ പുൽമേടുകളും നല്കി. ¹⁴യത്തീരും അതിന്റെ പുൽമേടുകളും, എസ്തെമോവയും അതിന്റെ പുൽമേടുകളും, ¹⁵ഹോലോനും അതിന്റെ പുൽമേടുകളും, ദെബീരും അതിന്റെ പുൽമേടുകളും, ¹⁶അയീൻ, യൂത്താ, ബേത്ത്-ശേമെശ് എന്നിവ ഓരോന്നും അതതിന്റെ പുൽമേടുകളോടുകൂടെ—ഈ രണ്ടു ഗോത്രങ്ങളിൽനിന്ന് ഒമ്പതു നഗരങ്ങൾ. ¹⁷ബന്യാമീൻ ഗോത്രത്തിൽനിന്ന്: ഗിബെയോനും അതിന്റെ പുൽമേടുകളും, ഗേബയും അതിന്റെ പുൽമേടുകളും, ¹⁸അനാഥോത്തും അതിന്റെ പുൽമേടുകളും, അൽമോനും അതിന്റെ പുൽമേടുകളും—നാലു നഗരങ്ങൾ. ¹⁹പുരോഹിതന്മാരായ അഹരോന്റെ സന്തതികളുടെ നഗരങ്ങളെല്ലാം അവയുടെ പുൽമേടുകളോടുകൂടെ പതിമൂന്നു നഗരങ്ങളായിരുന്നു.

²⁰ശേഷിച്ച കഹാത്യ ലേവ്യകുടുംബങ്ങൾക്ക് അവരുടെ നറുക്കുവീണ നഗരങ്ങൾ എഫ്രയീം ഗോത്രത്തിൽനിന്നു ലഭിച്ചു. ²¹എഫ്രയീമിന്റെ മലനാട്ടിലുള്ള, കൊലചെയ്യുന്നവനു സങ്കേതനഗരമായ ശേഖെമും അതിന്റെ പുൽമേടുകളും ഗേസെരും അതിന്റെ പുൽമേടുകളും അവർ അവർക്കു നല്കി. ²²കിബ്സയീമും അതിന്റെ പുൽമേടുകളും, ബേത്ത്-ഹോരോനും അതിന്റെ പുൽമേടുകളും—നാലു നഗരങ്ങൾ. ²³ദാൻ ഗോത്രത്തിൽനിന്ന്: എൽതെക്കേയും അതിന്റെ പുൽമേടുകളും, ഗിബ്ബെഥോനും അതിന്റെ പുൽമേടുകളും, ²⁴അയ്യാലോനും അതിന്റെ പുൽമേടുകളും, ഗത്ത്-രിമ്മോനും അതിന്റെ പുൽമേടുകളും—നാലു നഗരങ്ങൾ. ²⁵മനശ്ശെയുടെ പാതിഗോത്രത്തിൽനിന്ന്: താനാക്കും അതിന്റെ പുൽമേടുകളും, ഗത്ത്-രിമ്മോനും അതിന്റെ പുൽമേടുകളും—രണ്ടു നഗരങ്ങൾ. ²⁶ശേഷിച്ച കഹാത്യകുടുംബങ്ങൾക്കുള്ള ഇവയെല്ലാം അവയുടെ പുൽമേടുകളോടുകൂടെ പത്തു നഗരങ്ങളായിരുന്നു.

²⁷മനശ്ശെയുടെ പാതിഗോത്രത്തിൽനിന്ന് ഗേർശോന്റെ ലേവ്യകുലങ്ങൾക്ക്: കൊലചെയ്യുന്നവനു സങ്കേതനഗരമായ ബാശാനിലെ ഗോലാനും അതിന്റെ പുൽമേടുകളും ബെയെശ്തെരയും അതിന്റെ പുൽമേടുകളും—രണ്ടു നഗരങ്ങൾ. ²⁸യിസ്സാഖാർ ഗോത്രത്തിൽനിന്ന്: കിശ്യോനും അതിന്റെ പുൽമേടുകളും, ദാബെരത്തും അതിന്റെ പുൽമേടുകളും, ²⁹യർമൂത്തും അതിന്റെ പുൽമേടുകളും, ഏൻ-ഗന്നീമും അതിന്റെ പുൽമേടുകളും—നാലു നഗരങ്ങൾ. ³⁰ആശേർ ഗോത്രത്തിൽനിന്ന്: മിശാലും അതിന്റെ പുൽമേടുകളും, അബ്ദോനും അതിന്റെ പുൽമേടുകളും, ³¹ഹെൽക്കത്തും അതിന്റെ പുൽമേടുകളും, രെഹോബും അതിന്റെ പുൽമേടുകളും—നാലു നഗരങ്ങൾ. ³²നഫ്താലിയുടെ ഗോത്രത്തിൽനിന്ന്: കൊലചെയ്തവനു സങ്കേതനഗരമായ ഗലീലയിലെ കേദെശും അതിന്റെ പുൽമേടുകളും ഹമ്മോത്ത്-ദോരും അതിന്റെ പുൽമേടുകളും കർത്താനും അതിന്റെ പുൽമേടുകളും—മൂന്നു നഗരങ്ങൾ. ³³ഗേർശോന്യരുടെ നഗരങ്ങളെല്ലാം അവരുടെ കുടുംബങ്ങൾക്കൊത്തവണ്ണം അവയുടെ പുൽമേടുകളോടുകൂടെ പതിമൂന്നു നഗരങ്ങളായിരുന്നു.

³⁴ശേഷിച്ച ലേവ്യരായ മെരാര്യകുലങ്ങൾക്ക് സെബൂലൂന്റെ ഗോത്രത്തിൽനിന്ന് അവർ നല്കിയത്: യൊക്നെയാമും അതിന്റെ പുൽമേടും കർത്തയും അതിന്റെ പുൽമേടും, ³⁵ദിമ്നയും അതിന്റെ പുൽമേടുകളും, നഹലാലും അതിന്റെ പുൽമേടുകളും—നാലു നഗരങ്ങൾ. ³⁶രൂബേൻ ഗോത്രത്തിൽനിന്ന്: ബേസെരും അതിന്റെ പുൽമേടുകളും, യഹ്സയും അതിന്റെ പുൽമേടുകളും, ^a a v36 36-37 വാക്യങ്ങൾ പല എബ്രായ കൈയെഴുത്തുപ്രതികളിലും കാണുന്നില്ല; എന്നാൽ മറ്റു ചിലതിലും പുരാതന ഗ്രീക്കിലും അവ ഉണ്ട്. ³⁷കെദേമോത്തും അതിന്റെ പുൽമേടുകളും, മെഫാത്തും അതിന്റെ പുൽമേടുകളും—നാലു നഗരങ്ങൾ. ³⁸ഗാദിന്റെ ഗോത്രത്തിൽനിന്ന്: കൊലചെയ്യുന്നവനു സങ്കേതനഗരമായ ഗിലെയാദിലെ രാമോത്തും അതിന്റെ പുൽമേടുകളും മഹനയീമും അതിന്റെ പുൽമേടുകളും. ³⁹ഹെശ്ബോനും അതിന്റെ പുൽമേടുകളും, യാസേരും അതിന്റെ പുൽമേടുകളും—ആകെ നാലു നഗരങ്ങൾ. ⁴⁰ശേഷിച്ച ലേവ്യകുടുംബങ്ങളായ മെരാരിയുടെ കുടുംബങ്ങൾക്കുള്ള നഗരങ്ങളെല്ലാം നറുക്കുവഴി ആകെ പന്ത്രണ്ടായിരുന്നു.

⁴¹ഇസ്രായേൽമക്കളുടെ അവകാശത്തിനുള്ളിലെ ലേവ്യരുടെ നഗരങ്ങളെല്ലാം അവയുടെ പുൽമേടുകളോടുകൂടെ നാല്പത്തെട്ടായിരുന്നു. ⁴²ഈ നഗരങ്ങളിൽ ഓരോന്നിനും ചുറ്റും അതതിന്റെ സ്വന്തം പുൽമേടുകൾ ഉണ്ടായിരുന്നു; അവയെല്ലാറ്റിന്റെയും കാര്യം ഇങ്ങനെതന്നെ ആയിരുന്നു.

⁴³അങ്ങനെ നമ്മുടെ പിതാവ് അവരുടെ പൂർവികന്മാരോടു ശപഥംചെയ്ത ദേശമെല്ലാം ഇസ്രായേലിനു നല്കി; അവർ അതു കൈവശമാക്കി അവിടെ വസിച്ചു. ⁴⁴നമ്മുടെ പിതാവ് അവരുടെ പൂർവികന്മാരോടു ശപഥംചെയ്തതുപോലെ അവിടുന്ന് ചുറ്റിലും അവർക്കു വിശ്രമം നല്കി. അവരുടെ ശത്രുക്കളിൽ ഒരുവനും അവർക്കെതിരേ നിൽക്കാൻ കഴിഞ്ഞില്ല; നമ്മുടെ പിതാവ് അവരുടെ സകല ശത്രുക്കളെയും അവരുടെ കൈയിൽ ഏല്പിച്ചു. ⁴⁵നമ്മുടെ പിതാവ് ഇസ്രായേൽഗൃഹത്തോടു ചെയ്ത സകല നല്ല വാഗ്ദാനങ്ങളിലും ഒന്നുപോലും വൃഥാവായില്ല; എല്ലാം നിവൃത്തിയായി.