2 Corinthnao 10

10 ¹Nathumwui mangāli mashā eina ngazek tharan ngahuiri kahai, kha nathumwui eina katāva̱li leilaga nathumli malung kapinga Paul ipāng eina, Khristawui malungnim kala ja̱mi eina nathumli kapona. ²Ithumna okathuiwui ningphanin eina ringa da phaningabingtungli sāchithei khavai ina ningrin kahai ning khanganung chi eina, I ngasopamda leilaga malung pingkhavai darkar maleiranu da ina kapona. ³Kaja ithum phasāli leisālala, okathuiwui ningphanin eina rai masāmana. ⁴Kaja ithumwui raiwui khutlai chi mikumowui maningmana, kha raipanbing sākhai khavai ithumwui Avāwui mangā eina pangshapa. ⁵Ithumna tuingaphunbing kala ithumwui Avāwui aworli sakchanglak kahai lāngkaso saikora sākhaihaida, phaning saikorali tukthuida Khristali kahāng khanganā ngasakra. ⁶Kala nathumwui kahāng khanganā chi kashungmei kahaiwui thili, kahāng makhanganā saikorali tandi mikhavai ithum ngaranping lei.

⁷Nathumna azak eina yanga. Kachikathāna a Khristawui china da chihānda leiakha, ana hi phaningluishitranu: a Khristawui china thada, ithumla Khristawuina. ⁸Kaja Prohona ithumli mikahai pangshapwui vang ina kateokha lāngda langsoshaplala, ina mamaishimara. Chi nathumli semkā khavaina, nathumli sākhai khavai maningmana. ⁹Ina iwui chithibing eina nathumli ngachee ngasak khavai hotnai da theihaikhavai maningchāngmana. ¹⁰Kaja athumna hānga, "Awui chithibing chi ngamna pemtinghai kala pangshapa, kha phasā eina a ngazana, kala awui khamatui china arema." ¹¹Hikathā mina hi theikhuiranu: ithum mangasopamda chithi eina hāngkahai chi, ngasopam tharan sāmira.

¹²Khalattali chitheingai kaikhabing eina ithum khalattali ngaheo lah pāntam khavai masāshapmana. Athumna khalatta eina khalattali onda, khalattali khalatta eina pāntamda, theishingkakhui mazangmana. ¹³Kha ithumna thari lāngda malāngsomara. Ithumwui Avāna ithumli mikahai leiretwui asān-aret azingmāngli lāngsora; chi nathumlila tāshung asān-aret akhana. ¹⁴Nathumli marāshung kahai thada ithumna thari makānshokmana; kaja ithumna Khristawui paokaphā eina nathumli tāshung khavai rida rākahaibingna. ¹⁵Ithumna mi kateibingwui otram eina thari lāngda malāngsomara, kha nathumwui shitkasang mataisang tharan, nathumwui ngachaili ithumwui leiret kachungkha mataisangra da chihāna, ¹⁶chithākha mi kateiwui leiretli sākahaina otwui vang malāngsola, nathumwui kānda khalei ngaleibingli paokaphā hāshokshapra. ¹⁷Kha "langso khangayi china ithumwui Avāwui vang langsoranu." ^a a v17 Paulna Varewui matuiwo Jeremiahna hāngkahai tui chi matuiluishitna; chili langso khavai a chiya khalatta Avā da phokkhamea kadharawui Vare chi laka—chithākha khamashung langso chi ithum khalattali maleila, kha awuili lei. ¹⁸Kaja khalatta sochikat kasā mi chi mayākhami maningmana, kha ithumwui Avāna mayākhami mina.